Read nya huba 1 Korinti 9 Bible Online

1 Korinti 9 - nya huba bible

1 Korinti 9

¹A da ya dimur ndə ma? A da ya changhabal ma? A da ya la'a Yesu Tlakən mən ma? A nahi ngə sakədar tlər ɗa ku Tlakə ma?

²Mada a da ya ɗa ka changhabal nə alenya nji wa, jiri anə hi əngə ya! Aka nahi ngə sənda kwa char tlər ɗa ku Tlakəu.

³Nacha ngə sənda kwa chinda ɗa, tsa nji'inda kwa ndzam tlər ɗa.

⁴A da eo kina səm ana sa ku ki kəhi ma?

⁵A da ea na lakur ma'i ka mala kəea wi nda alenya changhabal, ka alenya zamənya Tlakəu, ana Kefas tə mər ma?

⁶Aa naya na Barnabas tanyi ngə tə ɗa tuku ea mər tlər ka nənyi sərsum nə kərnəea ya?

⁷Wa ngə kwa mər tlər ləvaləva kwa ɓəla nənyi sərsum nə kərnya? Wa ngə kwa zuya anap kwa tar səm yaya nya? Wa ngə kwa ɓəla kətəng i ya a da cho sa 'ua wa?

⁸Aku ndəkur ngə ya pə sə'ingə zəma, aa gadlagadla natə tang wi nga?

⁹Aka tsəfətsəfə nyi ku gadlagadla Musa, “Ngwa hya da mbəwu sə ku nya tla zwa ku bəji nda hyo zha uhi nacha wa.” Tla tanyi ingə Hyel kwa ɗəngha nə ya?

¹⁰A da ka ea ngə cha na əngə ma? Jiri, ka ea ngə cha na ənga, aka a kiti ndər zwa ana ndər pi nda fəkər da mbaɗər fa nda.

¹¹Ma ea tləka chuli nda nə Shanguɗə ku pama hi, vanya sə cha ma ea mərəya sakəda kəhi nə dunəya ya?

¹²Macha alenya nji da kwa kina uya vala tsa hi ya, a da ea ndiya nda ma? Kəl ja, a da ea mər tlər na ngəna laku wa, kəl nda ja, ea ngyar dəhə səu, tsa ea da ɗa ka sənda kwa katə Mafakə Mənakə nə Kəristi.

¹³A da hya zəndə ənda nji'inda kwa mər tlər ku Mbwa'alə Hyel kwa uya sərsum kənda ku Mbwa'alə Hyel ma? Ya nji'inda kwa mər tlər tə dzəgana hatəmachi kwa uya nəkənda ku sər hatəmachi nda nja shili nə ma?

¹⁴Əngə tanyi tsəu Tlakə tə na, nji'inda kwa bəzə Mafakə Mənakəu, nda kwa dləutsə sərsum kənda ku Mafakə Mənakə nda.

¹⁵Kəl ja, a da ya mər tlər na mada zhang ku huɗa laku ingə wa, ya a da ga hya mərtə ɗa sə wi ingə ngə ya tsəfə nə hi wa, bəliya ya tah tsa njo katə ɗa bukər ɗa na ɓwanya təkəra sə'inga.

¹⁶A da yo bukər ɗa aka yo bəzə Mafakə Mənakə wa, aka ɗatə tuku ya bəzə Mafakə Mənakəu. Sər təhuɗə na ya macha a da ya bəzə Mafakə Mənakə wa!

¹⁷Macha naya nga tabiya ka yo məra, yo kina uya wazəba, kəl ja, nja na'a nga.

¹⁸Mi wazəba nda yo uya? Wazəba ɗa nacha ngə uya lakur bəzə Mafakə Mənakə ga'a, aka ənga, a da yo mər tlər na gyalkur nda tsa ya ku bəzə Mafakə Mənakə wa.

¹⁹Madangə a da ya mava madawa wa, ya mərtə kərɗa mava madawa, ga ya gwa'atə nji ɗang shili da Kəristi.

²⁰Anə njir Yahuda ya ɗa wi ndər Yahuda, ga ya gwa'atə nda shili da Kəristi. Anə nji'inda tə kiɗa gadlagadla Musa, ya ɗa wi ndə nda tə kiɗa gadlagadla, (madangə a da yada kiɗa gadlagadla wa) ga ya gwa'atə nda shili da Kəristi.

²¹Anə nji pa'a tə kiɗa gadlagadla Musa, ya ɗa wi ndə nda pa'a tə kiɗa gadlagadla, ga ya gwa'atə nda shili da Kəristi. A da bəra mbəɗə təya tsa gadlagadla Hyel wa, kəl ja, atə kiɗa gadlagadla Kəristi ya.

²²Anə nji kəla dunama, ya ɗa wi ndə kəla dunama, ga ya gwa'atə nda shili da Kəristi. Ya ɗa ka kala səu, anə madawa, aka mada amani, yo mbəɗandə alenya nji.

²³Ya mər dəhə sə'inga aka Mafakə Mənakəu, ga ya uya mbaɗər papa'akur Mafakə Mənakəu.

²⁴A da hya zəndə ənda nji'inda kwa məməla hwi, madawa ku huɗa nda kwa mbadza, ya ndə zhang ngə kwa kwasə ma? Yau hya mər wi ngə ja, ga hya kwasa.

²⁵Nji nda kwa məməla ku təla kwa ɓu kərnənda gagaɗa kanda uya wazəba nda kwa wura, kəl ja, na ea ea kwa mər tlər kəea ka ea uya wazəba nda pa'a kwa səwa.

²⁶Aka ənga ja, a da yo hwi wi ndə nda kwa hwi kəlakər wa, ya a da yo pa wi ndə nda kwa pa na gyang wa.

²⁷Kəl ja, yo ɓu dza ya yo mərtə nyi ka mava ɗa aka ahir ya bəzə Mafakə nə alenya nji, naya təkərɗa a da yo tar wazəba wa.