Read nya huba 2 Korinti 1 Bible Online

2 Korinti 1 - nya huba bible

2 Korinti 1

¹Hya'atə tsa Bulus changhabal Kəristi təwa ikur Hyel ana Timtawus nda zamən mən. Yada njir nəu inda vu Korinti ana dəhə nji'inda nə Hyel tə hə'i Akaya.

²Papa'akur ana piyarɗufəu hya'atə tsa Hyel Adan mən ana Tlakən mən Yesu Kəristi cha ngya tsa'a nahi.

³Fal ta'itə nə Hyel, nda Adanya Tlakən mən Yesu Kəristi, Hyel nda na dəhə təhuɗəu ana kala fə ɗufəu.

⁴Nacha nda kwa fətə mən ɗufəu ku dəhə ɓwaɓwatə kəmən, məlna namən tsəu məno nau fətənyi ɗufəu nə alenya nji'inda kwa sa ɓwaɓwatə ana fəɗufəu nda məna dləutsə tsa Hyel.

⁵Aka wi nə məno sa ɓwaɓwatər Kəristi ku ngya kəmən na, əngə tanyi tsəu təwa Kəristi məno uya fəɗufəu gagaɗa.

⁶Mada eo sa ɓwaɓwatəu, aka fəɗufəu ana mbəɗə kəhi ngani, aka ma nja fətə ea ɗufəu, na ea tsə'u a kəpal dawa eo fətə hi ɗufəu, ga hya nau mbiyhuɗə səsə'utə ɓwaɓwatə wi nda eo səsə'uti.

⁷A da ea na kərmətlə təkəra hi wa, aka wi nda hyo sa ɓwaɓwatə kə'i ea, əngə tanyi tsəu hyo uya fəɗufəu nda Hyel kwa nə mən.

⁸Ka zamə ɗa, a da eo i ngya hi ku tar zəndə təkəra chul ɓwaɓwatə nda ea sa tə hə'i Asiya wa, ɓwaɓwatə tə lədiya ea gagaɗa ga ndəɗə dunama kəea, sənda tə ea ma'a kər ənda tsə'u ta ea na pi.

⁹Tsa'anyata, har tə ea ku ɗufwa ea ənda tlanda ea tə nji nəumar tah. Kəl ja, səngə təɗa tsa ea da ba'a ngya ka kərnəea, kəl nda ea ngya ka Hyel nda kwa hya'andə nji kuɗəkuɗa.

¹⁰Hyel tə mbəɗandə ea tsa chul ngəna təmachi nə tah, ya cho dləuya mən, ya fətə tə ea kər nacha cho ɓəla dləuya mən,

¹¹ma hya daɓətəkər ka ea ku pətlənya. Təwa ənga nji ɗang kwa usaku Hyel aka cha wum pətlənya nda nji tə məra ana ɗanghali nda cha nə mən.

¹²Sakanə janə sənda eo wovi ni, kəra ea taltal təwa ngya kəea ku dunəya, a da wi ənda ea ngya na hi ma'a wa, ku chamkur ana tsa'anyatakur nda hya'atə tsa Hyel. A da ea ngya ka dəma nə dunəya wa kəl nda aka ɗanghali nə Hyel.

¹³Aka a da ea tsəfətə hi sənda a da hyo nau kəratsəntə ana ngabiya wa. Ya yo fəkər ənda,

¹⁴a ngabiya ea təhi kushiu sakana, ya yo chima biyama hyo ngabiya dəhə səu tsa'aka hyo wovi na ea wi nda eo da wovi nahi pəshinda Tlakən mən Yesu kwa da shili.

¹⁵Aka a da ya na kərmətlə wa, a ɓatliya tə ya ya yi da hi tangərma ga hya uya papa'akur zhaka mətləu.

¹⁶Tangərma, ma yo təra yi Makidoniya ana mətləkunyi ma yo da sha, məlna bəji nga hyo nau sə ɗa yi Yahudiya.

¹⁷Hyo la'a səngə ya ɓatliya ngə kəshar ya? Ma hyo har yo mər sə wi nə njir dunəya nda kwa na “Ah” ba ɓəla na “A'a” ya?

¹⁸Kəl ja, wi ngə hya zəndə Hyel ndər jiri cha, əngə tanyi ngə mafakə kəea nə hi a da “Ah” ana “A'a” wa.

¹⁹Aka Yesu Kəristi Zər Hyel, nda naya Bulus, Sila ana Timtawus tə bəzə mafakə nyi nə hi a da cha “Ah” ana “A'a” wa. Kəl ja, nacha nənyi “Ah” wa'atanyi.

²⁰Aka təwa nyi Hyel tə nyabiya dəhə alkawal nyi. Nacha gwa'atə təwa Yesu Kəristi məno na Aɗəmja aka səlir Hyel.

²¹Sakana Hyel na kərnyi nə kwa ɓatlə ea kə'i hi, ga məna ta'i na dunama ku Kəristi. Cha dzəvəya mən,

²²ya Hyel fəndzə mən tə tləm, nda kwa char ənda nənyi mən, cha nə mən Shanguɗə nyi ku ɗufwa mən nda kwa char sənda mən təkər biyama.

²³Sakanə ja janə cha ya mar Hyel nda kwa la'a ɗa macha gəzhi nə yo tla. Sənda gwa'atə a da ya ɓəla yi Korinti wa tsa hya da ba'a uya guhi ɗimiɗimi tsa ya.

²⁴A da tlər tuku nə eo gwa'a ea chiu hi kwa təkəra jirikur kəhi wa, kəl nda kwa zəndə nji ənda hya chiyadza ku Kəristi. A təvəra ənga, dəhə məno mər tləra aka hirgyaɗi kəhi.