Read nya huba 2 Korinti 10 Bible Online

2 Korinti 10 - nya huba bible

2 Korinti 10

¹Təwa həyakər ana sənamkur Kəristi, naya Bulus, yo gədi hi, naya nda njo na “ndə shishi'u” ma mən kə'i hi, kəl ja, “ndə gangkərtəyi” ma a da ya kə'i hi wa.

²Yo gədi hi sakana, aka ma ya shili a da yo nau ɗa gangkərtəyi nə nji'inda kwa har ənda məno ngya wi ngyar dunəya wa.

³Madangə ku dunəya mən, kəl ja, pa kəmən a da chul nə dunəya wa.

⁴Aka karə pa kəmən a da nə dunəya wa, kəl nda nə gyalkur Hyel, nda kwa huɓənda jigadəmar ndəkurndəu, ana kwa wazənda kəpal gəzhi.

⁵Eo wazənda dəhə kəpala, eo wazənda dəhə sər həkər inda kwa katə zəndə Hyel, eo fa'aya jigadəma nji ba'a mərtə nda nəu nya Kəristi.

⁶A ɓatliya tə ea ka eo ɓu dəhə ndə nda kəla kwa ngatə ndəra, a hir hya nəu nya Kəristi ku dəhə səu.

⁷Abiyabibiya tanyi ngə hyo ndzam sə'inga, macha vanya ndə kwa har ənda nə Kəristi cha, cho kina zəndə tsəu ənda na ea ma'a nə Kəristi ea.[10] Alenya tsəfa tə na, “Ndzamar ma sənda tə babal.”

⁸Aka mada ya wovi gagaɗə na gyalkur nə Tlakə tə nə ea ka ea hər hi ni, matsa wazənda hi, a da yo ngatə kuzhi tsar wa.

⁹Ngwa hya da har wi yo gwa'a ləvərandə hi na kainau ɗa inə wa.

¹⁰Aka alenya nji kwa na, “Kainau Bulus tədəɓəu, ya ana dunama, kəl ja, macha tangnə cha kə'i ea, a da cha ndər ɓwanya na dunama wa, ya ɓwanya nyi da sə wa.”

¹¹Chul nji ingə kwa kina ngabiya ənda a pam da ku sənda ea tsəfətə ku kainau kəea ma ea shonghəu, ana sənda eo mər ma ea tangnə kə'i hi wa!

¹²A da ea nji ka eo dzangərbiya kərnəea ndara ea məməlandə kərnəea ka nji'inda kwa fal kərnənda wa. Ma nda kwa dzə kərnənda na kərnənda, ana ma nda kwa məməla kərnənda na kərnənda, nji dzadza inga!

¹³Kəl ja, a da eo wovi matsa nda eo kina mər wa, kəl nda ea ta'ita ea tangnda Hyel tə tlanda ea mər tlər ti, ya ma'a nahi ku tlər nə hi.

¹⁴A da ea ndəɗə fa na chuli na wovi kəea wa, wi nda cho nda kina ɗa macha a da ea yi da hi wa, aka ma'i tə ea na Mafakə Kəristi tsa'a yada hi.

¹⁵Wovi kəea a da ndiya matsa ənda cho kina ɗa wa, ya a da tsəkar tlər alenya nji wa. Kəl ja, fəkər kəea, wi nda jirikur kəhi cha tsakə na həa, təwa ənga babal mər tlər kəea kwa tsakə ku pama hi gagaɗa.

¹⁶Təwa ənga eo nau bəzə Mafakə Mənakə ku alenya hə'i nda biyaman hi, a da na gwa'a tləm ku tlər nda vanya ndə tə mərtə wa.

¹⁷Kəl ja, wi nda ɓwanya Hyel tə na, “Dəhə ndə nda kwa wovi, cha wovi na Tlakəu.”[11]

¹⁸Aka a da njo dləukər na nji'inda kwa fal kərnənda wa, kəl ndə nda Tlakə tə faliya.