Read nya huba 2 Korinti 11 Bible Online

2 Korinti 11 - nya huba bible

2 Korinti 11

¹Chim ɗa hya mbahuɗə naya mada yo mər kəkəngkur kushiu, ya kwa mər hi.

²Yo mər sələkəkur nahi, ana sələkəkur nda Hyel ni. A ɓatliya hi təya nə sal zhang nacha ngə Kəristi, məlna yo nə hi nyi wi kwapəlyakə nda chaməu.

³Kəl ja, yo ləvər tsa jigadəma kəhi da wi cha səwandə hi tsa ɗa tsa'atsa'a na jiri ku Kəristi, wi nda pwabu tə shandə nyi kər ana kwakunakur nyi nə Hawa'u.[12]

⁴Ea ɓwanya nə hi təkəra Yesu, ya dləutsətə hi Shanguɗə Karti ga dləukər na Mafakə kəea. Kəl ja, ngə hya ngyar alenya nji tə ɓwanya nə hi təkəra vanya Yesu paməu, ga ma'a ɓatliya ka hyo dləutsə vanya shanguɗə ana vanya mafakəu.

⁵A da yo har bəra nji ngə hyo na nə bəra, “Wawa'ar changhabal” ngə ndiya ɗa tə na vanya sə wa.

⁶Kusə tanyi a da nja dlədləɓətə ɗa ɓwanya wa, kəl ja, zəndə da tsa ya. A wurtə ea chabiya hi sə'inga ku dəhə bəji ku kala laku.

⁷Bikə ngə mər ya ga tashiya kərɗa ga səli kəhi ɗa da təwa bəzə Mafakə Mənakə nə Hyel nə hi ga'a ya?

⁸Aku sakanda yo mər tlər ku pama hi, alenya njir nəu ngə kwa ki ɗa, təɗa wi fa'avi ngə ya mər ka ga ya uya lakur mər tlər nə hi.

⁹Ya ku sakanda ya kə'i hi a da ya wendə hi na gwa'a vala ma yo gwa'a kwaba wa, njir nəu inda vu Makidoniya shili tə na dəhə sənda yo gwa'a. A da ya ngya ka madawa wa, ya əngə tanyi yo biyama na məra.

¹⁰Tsa'anyata wi nda jirir Kəristi ku ya, a ndə da tə hə'i Akaya kwa katə ɗa tsa wovi wa.

¹¹A da bəra a yo nyida hi nga gwa'atə yo ɓwanya əngə wa, Hyel zəndətə kwa nyida hi ya.

¹²Kəl ja, yo biyama na mər sənda ya tsəl na məra, aka ga ya hwaɗəbiya hya nji nda kwa gwa'a nda ɗa məlməl na ea, aku sənda nda kwa bu kərnənda ni.

¹³Chul nji nga a da Kəristi ngə tə sə nda wa, kəl ja, njir mər tlər gəzhi inga. Nda kwa mərtə kərnənda wi changhabal.

¹⁴A da cha sər məngəl wa, mada Shantan na kərnyi kwa nau mərtə kərnyi wi chama vimbəlmbəla.

¹⁵Aka ənga, a da cha sər məngəl ma mavi'i nyi tə mərtə kəirnənda wi njir mər tlər tsa'atsa'akur wa. Aku udiyanyi nda kwa uya wazəba nda tsa'atsa'a na tlər kənda.

¹⁶Yo ɓəla na, ngwa vanya ndə da har ənda kəkəng ya wa, kəl ja, macha hyo har ənga, yau, dləukə ɗa ma wi ndə kəkəng, aka naya ma'a ya uya sər bukər ɗa.

¹⁷Aku nyar bukər ɗa na, a da sənda Tlakə tə i ya pə nə yo pə wa, kəl nda yo ɓwanya wi ndə kəkəng.

¹⁸Ma nji ɗang kwa bu kərnənda wi nda njir dunəya kwa məra, naya ma'a yo mər ənga.

¹⁹Nahi nəkə hi dəma tsa hi gagaɗa, hyo səhimi da nji kəkəng ana hirgyaɗi!

²⁰Aka kwa nau hya mbiyahuɗə madawa tə fəu hi ku mavakur, ndara cha mərtə hi dləutəɗa, ndara cha uya tlər ku dza hi, ndara cha char hi ənda nji tə cha, ndara cha zhau hi chi.

²¹Ya kwa ngatə kuzhir na ənda ea təutə tsa mər sənga! Kəl ja, macha vanya ndə kwa bukər nyi ənda vanya sə cha, naya ma'a yo mər ɗufəu yo mər ənga. A tangnga ya kwa ɓwanya wi ndə kəkəng.

²²Njir Ibrani nda ya? Naya ma'a əngə ya, njir Isra'ila nda ya? Naya ma'a əngə ya, nyandəla Ibrahim nda ya? Naya ma'a əngə ya.

²³Njir mər tlər Kəristi nda ya? A ndiya nda təya, ya kwa ɓwanya wi ndə bəlabəla kər, kəl ja, mər təya tlər tsa'anyata matsa nda! Nja fəu ɗa ku jarum zhaka ɗang tanyi, ya sa dəga pənda mal zhaka ɗanghəu, gwa təya ku təmachi tah zhaka ɗang tanyi.

²⁴Zhaka tufu njir Yahuda tə tlatə ɗa na wuɗa makərkumənyi parnya dla kala bəji.

²⁵Zhaka makərəu, njir Roma tə dəgə ɗa na zəwa, zhaka zhang nja vakənda ɗa na hangu. Zhaka makərəu, param tə huɓə təya kwa, ɗaka təya hanyi ga ɓuya pəchi ku fa'a dəgaləu, təvi nja həbiya ɗa.

²⁶Aku ma'i ɗa i'i, ɓətə ya na təmachi tə dəl i, ya ɓətə ya na njir fa'a laku, ɓətə ya na təmachi ku cha nji'inda ea hə'i zhang kə'iri. Ya gwa təya ku təmachi nji'inda pa'a njir Yahuda, gwa təya ku təmachi ku ta mələm, gwa təya ku təmachi biyatə ya mələm, gwa təya ku təmachi fa'a dəgal. Ya gwa təya ku təmachi ku cha ka zama gəzhigəzhi.

²⁷A mər təya tləra, ana ɓwaɓwatəu, ana hanyi kəla hanyi, ana huɓa, ana hili. Zhaka ɗang tanyi ya tar sərsuma, ya hanyi tə gyang, ya tar ləkutə nda yo handzi.

²⁸Matsa alenya səu, kala bəji ana tədəɓəkur ɗəngha ya aka dəhə njir nəuwa.

²⁹Ma vanya ndə tə təuta, yo ngatə wi naya nda təuta, ya ma vanya ndə tə dla ku səpəla'a, kwa gwa'atə huɗa yo tla ɗimiɗimi.

³⁰Macha ɗatə tuku ya bukər ɗa, yau, kəl ba ya bukər ɗa na təutə nda ya təuta.

³¹Hyel zəndətə a da gəzhi nə ya kwa tla wa, nacha nda Hyel, ya Adanya Tlakən mən Yesu Kəristi, fal ngya tə nənyi ba'anawa.

³²Aku bəji nda yahi Dimaska ngwamna nda tə kiɗa təl Aretas cha dati lakur gu ta mələm Dimaska ga cha səya ɗa.

³³Kəl ja, ka bazhi ɗa tə fəu ɗa ku tsəla ga lənda ɗa təwa ngu nda tə ɓangtili mələm nda, ngə ya mbəɗə tsa cha.