Read nya huba 2 Korinti 12 Bible Online

2 Korinti 12 - nya huba bible

2 Korinti 12

¹Yo bukər ɗa mada a do vala ɗa wa, yo ɓwanya təkəra shi'uni puchi ana takər nda Tlakə tə char ɗa.

²A zəndətə ya vanya ndər nəu Kəristi, nda nja hətə gyatə makərkunya huɗamələm, ku fa kwabəfwaɗə nga tərabiya nga, kəl ja, a da ya zəndə ndara ku dza ndara ku shi'uni wa, kəl ja, Hyel zəndəti.[13]

³Ya zəndətə ya ndə nga, ndara ku dza ndara a da ku dza wa, a da ya zəndə wa, kəl ja, Hyel zəndəti,

⁴nja hətə nyi shi huɗamələm cha ngatə alenya sə nda a ɓwanya da kwa nau dəkəbiya wa, ya a da nja ngyar ndə cha ɓwanya təkər wa.

⁵Yo bukər ɗa na ndə wi nga, kəl ja, a da yo bukər ɗa wa, kəl nda təkəra təutə nda ya təuta.

⁶Mada ya tabiya ya bukər ɗa, a da yo ɗa ndə kəkəng wa, aka yo dəkə jiri. Kəl ja, a da yo bukər ɗa wa, aka a da ya kwa i vanya ndə hətə ɗa matsa ənda cho la'a ɗa ana ənda cho ngatə ɗa wa.

⁷Tsa yada bukər ɗa na sər məngəl ɗang nda ya la'a, kəl ngə nja sətə ɗa vanya chul shiləka tang wi ngə tə shikəɗi kwa tə ku dza. Shantan tə sətə ɗa chama nyi ka cha na'a ɓwaɓwatə cha katə ɗa tsa bukər ɗa.

⁸Zhaka makərəu ya gədi Tlakə cha hənda ɗa shikəɗi.

⁹Kəl ngə cha nar ɗa, “Ɗanghali ɗa nji nghə ti, aka gyalkur ɗa nyabiya tə dzə ku təutəkur.” Aka ənga, yo tsakətə bukər ɗa na hirgyaɗi ku təutə nda ya təuta, ka ga gyalkur Kəristi ngya naya.

¹⁰Aka ənga, dləukərtə ya na təutə nda ya təuta, ana ngəla, ana sa ɓwaɓwatəu, ana izza, ana təmachi aka Kəristi. Aka ma ya təuta, əngə yo ɗa na dunama.

¹¹A ɗa tə ya ndə kəkəng, kəl ja, nahi nga fəu ɗa kwa. Nahi tsəu kitə hyo faliya ɗa, madangə a da ya vanya sə wa, aka a da ya kushə ku huɗa nji ngə hyo na nə bəra, “Wawa'ar changhabal” ingə wa.

¹²Ku bəji nda ya kə'i hi, a mərtə nji sənda kwa chabiya ənda changhabal ya. Aku mbahuɗə a mərtə nji sər muniya, sər məngəl ana səshinshin ku pama hi.

¹³Ana mi alenya njir nəuwa ndiya hya? Aa ka nda a da ya gwa'a kwaba tsa hi wa ya? Far ma bikə ɗa!

¹⁴Makərkunya nda ya ɓatliya ka yo yada hi nə sakana, ya a da yo fəkəhi tədəɓəkur ɗa wa, aka nahi ngə yo yi kari, a da kwaba kəhi wa. Aka a da ki ngulisha'a ngə kwa gwa'a nə njir yah nda wa, kəl ja, njir yah nda ngə kwa gwa'a nənda.

¹⁵Ya kwa mər hirgyaɗi ya tsəya dəhə sənda tsa ya, ana kərɗa tsəu aka hi. Aman yo nyida hi 'ualə'ual ya, ba'a hyo nyida ɗa kusha?

¹⁶Hyo dləukə ɗa ngəcha ənda a da ya ngya ka hi wa. Kəl ja, vanya ndə kwa na ənda ya həkəhi dəma nga, ga shandə hi kər na gəzhi.

¹⁷A ɗiya hi təya təwa alenya nji'inda ya sə yada hi ya?

¹⁸Ya gədi Titus cha yada hi, ya sə vanya zama ku huɗa njir nəu kə'i cha. Kwa nahi Titus tə ɗiya hi ya? A da ku Shanguɗə zhang ngə ea kwa mər sə ma? A da laku zhang eo nəu nacha ma?

¹⁹Kwa nau ɗa hyo har ənda dəhə bəji nga, dlakəya hu'u mar fum ngə eo mər nə hi ya? A da wa! Jiri ngə eo dəkə nə hi mar Hyel wi nji'inda ku Kəristi, ənda madami eo məra, ka bazhi nda yo nyida, ka tsa kə dunama nə hi ngani.

²⁰Aka yo ləvər tsa ma ya yada hi a da yo yi həya hi wi nda yo i wa, naya tsə'u a da wi nda hyo i wa. Yo ləvər yada həya guhi, shishi, huɗətla, ikər, ngəla, nya zazaɓəu, həkər ana mwali.

²¹Yo ləvər ənda ma ya ɓəla yada hi, Hyel kwa mərtə yo ngatə kuzhi manə hi, ya huɗa yo yi tla təkəra nji'inda tə mər səpəla'a yahi, ya a da nda sha tsa hiɗahiɗakur, həyakur, ana shi'ushi'ukur nda nda kwa wa.