Read nya huba 2 Korinti 13 Bible Online

2 Korinti 13 - nya huba bible

2 Korinti 13

¹Nənnə ngə makərkunya da yo yada hi. Wi nda ɓwanya Hyel tə na, “Dəhə ɓwanya nda nji mətlə ndara makərə tə dləukəri ɗatə ngyangyanyi.”[14]

²Aku mətləkunya yi ɗa da hi a təɗə təya himi nə nji'inda tə mər səpəla'a. Sakana yo tsakətə manə ya shwanghəu, tsa'akar ma ya yi a ndə do mbəɗə tanyi tsa ɓu ngə wa, ndara nji'inda tə mər səpəla'a yahi, ndara alenyi nji,

³manə hyo gwa'a sənda kwa char ənda Kəristi kwa ɓwanya təwa ɗa. Kəristi da təuti ku pama hi wa, kəl ja, ana gyalkur cha ku pama hi.

⁴Madangə ku təutətəutəkur nyi nja kukwanda nyi, dəhə ka ənga cha hya'atə təwa gyalkur Hyel. Namən ma'a nji təutətəutə mən ku cha, kəl ja, təwa gyalkur Hyel, məno ɗa na pi kə'i cha ka ea mər tlər nə hi.

⁵Dzətə ma kərnəhi ga hya zəndə nda ku jirikur hi. A da hya ngabiya ənda Kəristi Yesu ku hi ma? Ku hi cha, kəl nda macha dla təhi dzə nda.

⁶Nənyi tə ya jiri hyo zəndə ənda a da ea dla dzə nda wa.

⁷Eo pətlənya nə Hyel ənda a da hyo mər sənda a da tsa'atsa'a wa, a da bəra eo char ənda kwasətə ea wa, kəl ja, ga hya mər sənda tsa'atsa'a madangə njo la'a wi dlatə ea.

⁸Aka a da eo nau mər madami sənda kwa mər dawa na jiri wa, kəl ka jiri tanyi.

⁹Eo mər hirgyaɗi ku dəhə bəji nda ea təuta kəl ja, ana dunama hi, ya eo pətlənya ka hya nyabiyadza.

¹⁰Nacha gwa'atə ya tsəfətə hi sə'ina manda a da ya kə'i hi wa təvi ya yada hi. Aka ma ya shili, tsa yada izza hi təwa mər tlər na gyalkur nda Hyel tə na'a, gyalkur nə hərti hi, a da nə dlanda hi wa.

¹¹Udiyanyi ka zama, kəl vanya pəchi. Hya mbadzə ka hya nyabiyadza, səya ma himi da ɓwanya ɗa, hya dləukər na kərnəhi hya ngya piyarɗufəu na kərnəhi. Təwa əngə Hyel ndər nyida ndər piyarɗufəu kwa ngya na hi.

¹²Hya usar kərnəhi na gaɓədzə chicha.

¹³Dəhə njir nəu Hyel kwa usa hi.

¹⁴Papa'akur Tlakə Yesu Kəristi, ana nyidar Hyel, ana daɓəkər nə Shanguɗə Karti, cha ngya kə'i hi dəhəu.