Read nya huba 2 Korinti 2 Bible Online

2 Korinti 2 - nya huba bible

2 Korinti 2

¹Əja ya, sənda gwa'atə kəraya sha tsa yada hi səkəu, atsa yada ba'a yi tliya hi huɗahi.

²Aka ma ya ɗaka sər huɗətla nə hi ya, wa ngə ndə nda tə həyadzə kwa na'a hirgyaɗa? Kəl nda tsəu nahi nda tanyi.

³Sənda gwa'atə ya tsəfətə hi chul ndana tsəfa, aka a da yo i ya shili da nji'inda tsa'aka na'a hirgyaɗi, nda tliya ɗa huɗa ya wa. A da ya na kərmətlə kuhi ənda hirgyaɗi ɗa kwa ɗa ka hirgyaɗi kəhi dəhə hi wa.

⁴Ku bəji nda ya tsəfa nə hi tə nda, ku ɓwaɓwatə ana huɗətla dəgal nda ya, ana sələm yivəyivəu, a da ya tsəfa ka ga ya tla huɗa hi wa, kəl nda ga hya zəndə ənda ya kwa nyida hi gagaɗa.

⁵Ma vanya ndə tə mərtə sər huɗətla, a da huɗa ya nda cha tliya wa, təwa vanya lakəu dəhə hi nda cha tliya huɗahi. Naya tsə'u a da ufə nə ya kwa ufə hi wa.

⁶Ɓu nda badəgal nə hi tə ɓu ndə nga, a nji nyi ti.

⁷Sakan tsəu ja, kəl hya farbikə nyi, hya tsətə nyi ɗufəu, ngwa hya da ngya nyi huɗətla nyi zhaliya nyi wa.

⁸Aka ənga yo gədi hi, hya chabiyanyi ənda kwa nyida nyi hi.

⁹Ya tsəfətə hi kainau na ka ga ya dzətə hi na, ga ya la'a ndara ɓatliya tə hi ka nəu tsaubar ɗa mada sakamani.

¹⁰Madawa hya farbikə nyi, naya tsəu fartə ya bikə nyi. Ya ma ya farbikə nyi tsəu, macha vanya səda nda yo kina farbikəu, a tə nyanə hi ngə ya farbikə nyi, a huɗə Kəristi,

¹¹atsa Shantan da ba uya lakur shandə mən kər, aka kwa zəndə mən kwakunakur nyi.

¹²Nda ya shili ku mələm Toruwas ka ga ya bəzə Mafakə Mənakə nə Kəristi, ngə ya ngabiya Tlakə wurta mbəɗiya ɗa lakur mər tlər tangnda.

¹³Dəhə ka ənga, a da ya na piyarɗufəu wa, aka a da ya la'a Titus zamə ɗa nda yo nyida wa. Ana ənga, ngə ya təkə ka nda ga təra yi Makidoniya.

¹⁴Kəl ja, usaku nə Hyel, nacha nda kwa nəu namən məno kura ku Kəristi mada sakamani. Cho mər tlər namən ka ma'i na Mafakə zəndə nə Kəristi mada a bar wi sənda kwa shi'uni kwitəkwitəu.

¹⁵Aka anə Hyel pabiya da sənda kwa shi'uni kwitəkwitə mən nə Kəristi. Ku pama nji'inda kwa mbəɗa ana nji'inda kwa kuɗa.

¹⁶Anə nji'inda kwa kuɗa, wi muvuɗər tə mən nə nda, kəl ja, nə nji'inda kwa mbəɗa, muvuɗər pi mən. Wanga nji ka chul ngawa tləra?

¹⁷Na ea ya, a da ea wi alenya njir dunəya wa, nji'inda kwa mər tlər Hyel ka gwa'a gəna wa. Kəl ja, Hyel na sə ea, ɓwanya jiri nə eo pə huɗə nyi, wi njir mər tlər na gyalkur Kəristi.