Read nya huba 2 Korinti 3 Bible Online

2 Korinti 3 - nya huba bible

2 Korinti 3

¹Amaya, ghəya tə ea bu kərnəea səkə ya? Aa eo gwa'a tsəfətsəfər kainau təkəra ea yada hi ndara hya'atə tsahi wi sənda alenya nji kwa mər ya?

²Nahi təkərnəhi ngə tsəfətsəfər kainau nda tsa ea, nda nja tsəfətə ku ɗufwa ea nda dəhə nji kwa la'a kwa kəratsənti.

³Char tə hi ənda tsəfətsəfər kainau hya'atə tsa Kəristi hi, təwa tlər nda ea məra. Tsəfətsəfər kainau nə tsəu, a da na sər tsəfə nja tsəfə wa, kəl nda ana Shanguɗə Karti nə Hyel nda na Pi, a da tə təmbəl fafa nja tsəfə wa, kəl nda ku ɗufwa nji.

⁴Gangkərtəyi ea ku sənda ea chinda mar Hyel təwa Kəristi.

⁵Na ea təkərnəea a səda nda eo nau wa, tlalwakur nda ea ni hya'atə tsa Hyel cha.

⁶Nacha gwa'atə ea kwa nau mər tlər taɗər alkawal ana tlalwakur, nda a da təwa tsaubar tsəfə wa kəl nda təwa Shanguɗəu. Ɗəɗəmər tsəfətsəfər alkawal tə udiya na tah, kəl ja, taɗər alkawal təwa Shanguɗə kwa shili na pi.

⁷Gadlagadla nda nja tsəfətə tə təmbəl fafa tə shili na səli. Səli nga tə gwa'atə huɗəma Musa kwa mbəl gagaɗa nda katə njir Isra'ila tsa ndzam huɗəma cha ganghəu, madangə mbəl nda cho mbəla kwa tərabiya. Macha gadlagadla nda tə shili na tah tə nau shili na səli,

⁸səlir tlər Tlakəu kwa ndiya nyi na dəgalkur gagaɗa.

⁹Macha sənda tə shili na nəumar tah tə uya səli dəgaləu, sənda kwa shili na tsa'atsa'akur mar Hyel kwa ndiya nyi səli.

¹⁰Kəpal da wa, səlir ɗəɗəmər alkawal tsəu da wa, ma nja məməla nyi na səli dəgal nə taɗər alkawal na.

¹¹Ya macha sənda kwa wura tə shili na səli, 'ualkura səlir sənda pa'a kwa wur kwa ndiya nyi na dəgalkur gagaɗa.

¹²Aka chul fəkər nə tsa ea na, nacha na tsətə ea ɗufəu gagaɗa

¹³Naea, a da ea wi Musa wa, nda tə tuləu pahuɗə ku huɗəma cha, tsa njir Isra'ila da la'a ənda mbəl nda kwa wura.

¹⁴Kəl ja, ba'aka ənya jigadəma kənda yiɗiya tə dza, ma dəhə bəji nda nda kwa kəratsen ɗəɗəmər alkawal nda ti, kəl pahuɗə nda kwa hənda jigadəma kənda tsa nda da ngabiya jiri, ya kəl ndə nda kwa nənyi jiri nə Kəristi ngə kwa nau hənda pahuɗə nda.

¹⁵Mada ənya na, dəhə bəji nda nda kwa kəratsən gadlagadla Musa ti, pahuɗə nda kwa haɗənda jigadəma kənda.

¹⁶Kəl ja, ma ndə nda tə sha yada Tlakəu, njo hənda nyi pahuɗə nda.

¹⁷Sakan ja, Tlakə ngə Shanguɗəu, ya tangnda Shanguɗə Tlakə ti, dimukur da.

¹⁸Namən ja, hənda mən tə nji pahuɗə ku huɗəma mən, məno mbəl ku səlir Hyel. Ya Tlakə kwa ɓatlə mən, məna kwa tsakə na ɗa wi nacha ku səli nda kwa hya'atə tsa Tlakəu, nacha nda Shanguɗəu.