Read nya huba 2 Korinti 4 Bible Online

2 Korinti 4 - nya huba bible

2 Korinti 4

¹Aka əngə ja, mangə Hyel ku təhuɗə nyi nə mən tə nawa tləra, a da məno tsəya ɗufwa mən wa.

²A ngyar tə mən dəhə sər kuzhi ana mər ɗimikur tə ɗəwa, a da eo mər tlər shakər ndara ea tla gəzhi na ɓwanya Hyel wa. Kəl ja, ea kwa dəkə jiri tə babal təwa ənga nji kwa zəndə ku ɗufwa nda ənda jiri nə ea dəka.

³Aka mada Mafakə Mənakə kəea tə ɗa ɗəwaɗəwanyi, anə nji'inda sasanyi tanyi ngə cha ɗəwaɗəwanyi.

⁴A da nda nənyi jiri wa, aka shantan nda hyel nə dunəya na wuləfənda tə jigadəma nji'inda pa'a tə nənyi jiri, tsa nda da la'a vimbəlmbəla nda shili təwa Mafakə Mənakə təkəra səlir Kəristi, ndə nda pabiya Hyel.

⁵Aka a da Mafakə kərnəea nə ea kwa bəzə wa, kəl ja, Mafakə Yesu Kəristi ənda nacha ngə Tlakəu, ya na ea tsəu mavi'i kəhi ea aka Yesu.

⁶Aka Hyel nda na, “Ngwa vimbəlmbəla mbəl zəbiya ku kutla,” nacha Hyel nda ngə tə mərtə vimbəlmbəl tə mbəl ku ɗufwa mən, aka ga məna zəndə səlir Hyel nda nja kwa la'a ku huɗəma Kəristi.

⁷Kəl ja, namən nda na gəna nə Shanguɗəu wi jadla mən, ka ga məna char ənda gyalkur dəgal nga nə Hyel nga, a da nəkəmən wa.

⁸Nja kwa nə mən ɓwaɓwatə pampaməu, dəhə ka ənga a da gwa'atə məna kuɗə wa. Vanya pəchi ana kərmətlə mən, kəl ja, a da məna sənda kər da wa.

⁹Nja ɗa məndza'u na ea, kəl ja, Hyel da ngya ea wa, nja nə ea ɓwaɓwatəu, kəl ja, a da nja kuɗənda ea wa.

¹⁰Wa'atanyi eo ma'i na tər Yesu ku dza ea, aka ga ngyakəngyar Yesu chabiyadzə ku dza ea nə kwa tə na.

¹¹Aka ku nya tə ea wa'atanyi aka Yesu, ka ga nja la'a ngyakəngyar Yesu ku dza ea nə kwa tə na.

¹²Ngə nga chari, ənda na ea ku nya tə ea, kəl ja, nahi pi cha nə hi.

¹³Tsəfətsəfə nyi, “A nənyi təya jiri, aka ənga a ɓwanya təya.” Ana Shanguɗə zhang nə jirikur, ea nənyi jiri, ga ɓwanya.

¹⁴A zəndətə ea Hyel nda hya'andə Tlakə Yesu na pi, cho hya'andə ea kə'i Yesu tsəu, ba hətə mən gya huɗə nyi.

¹⁵Dəhə sə'inga ka hi ngani, aka ɗanghali Hyel nda kwa həya nji ɗanghəu, cho ɗa ka sər usaku nə Hyel ga nja hətə səli nyi.

¹⁶Aka əngə ja, ngwa ɗufwa mən da tsəya dzə wa, madangə anə dza mən kwa səuwa, kəl ja, ku ɗufwa mən kəl ɗəɗa məno ɗəɗa ənya əzəkəu.

¹⁷Aka zər ɓwaɓwatə nə məno sa sakan nə kwa da shili namən səli nda ndiya dəhəu, ya kwa ngya ba'anawa

¹⁸Aka a da sənda nji kwa la'a na li nə ea kwa ndzam wa, kəl ja, sənda pa'a nji kwa la'a. Aka sənda nji kwa la'a da kwa ngya ba'anawa wa, kəl nda sənda pa'a nji kwa la'a.