Read nya huba 2 Korinti 5 Bible Online

2 Korinti 5 - nya huba bible

2 Korinti 5

¹Aka zəndətə mən madləɓa nə məno ngya kwa tə dunəya na, nacha ngə dza mən, kwa waza, Hyel kwa ɓatlətə mən ki nda ba'anawa kya huɗamələm, ki nda nacha na kərnyi tə ɓatliya.

²Kəl ja, sakana məno mbahuɗəu, məno chim na hirgyaɗi gagaɗə ənda njo nə mən taɗər dzə nə huɗamələm, nda pabiya da taɗər ləkutəu.

³Aka ma məna handzə dzə nə huɗamələm, a tsə'u məno ɗa dura'a wa.

⁴Aka wi nə mən ku dzə nə dunəya na, njo hikə mən gagaɗa, məna kwa ngi'i aka a da məno i nja səɗənda mən dura'a wa, kəl ja, nja handzə mən dzə nə huɗamələm nda pa'a kwa tah, aka ga sənda na pi cha ndasənya sənda kwa tah.

⁵Sakana Hyel ngə tə ɓatliya mən ka ngəna səu, ga nə mən Shanguɗə nyi nda kwa char alkawal nyi təkəra sə'inda kwa shili.

⁶Aka əngə nacha gwa'atə a da mən na kərmətlə wa, ya zəndətə mən ma məna ɗa ku dza, ɗatə mən naɗə tsa Hyel.

⁷Aka məno ngya təwa jirikur, a da təwa sənda njo la'a wa.

⁸Jiri a da mən na kərmətlə wa, ya ndiya tə mən i'i məna təkə na dzə na, məna gi ngya ka Tlakəu.

⁹Aka ənga, a ndiya təmən i cha ngatə mənakə namən, mada ku dunəya nə mən ndara ki huɗamələm.

¹⁰Aka tuku dəhə mən kwa chabiyadzə mar Kəristi ka cha mərtə mən nəuma, ya madawa kwa dləutsə wazəba nyi tsa'atsa'a na sənda cha mər ku dzə nə dunəya na, ndara mənakə nyi, ndara ɗimi nyi.

¹¹Mana zəndətə mən sənda njo na ləvər Tlakə ni, nacha gwa'atə eo mbadzə ea təɗətə alenya nji. Hyel zəndətə ənda ea, ya yo chima, a zəndətə hi tsəu.

¹²A da bəra eo i ea faliya kərnəea nə hi nə wa, kəl ja, eo i ea nə hi sənda kwa gwa'atə hya kwa ngatə mənakə na ea ku ɗufwa hi, ga hya nau wum nə nji'inda kwa həkəra kərnənda təkəra ənda nda, a da təkəra ngyakəngya kənda wa.

¹³Macha kəra ea da tsəkə wa, aka Hyel ngani, macha kəra ea tsəkə tsəu, aka hi ngani.

¹⁴Aka nyidar Kəristi ngə kwa gəla ea, aka ngabiya tə ea ənda ndə zhang tə tah ka dəhə nji, aka ənga dəhə nji kuɗəti.

¹⁵Ya cha tah ka dəhə nji, tsa nji'inda na pi da ngya ka kərnənda, kəl nda ka cha, nacha nda tah ka nda, ngə nja hya'andə nyi səkəu.

¹⁶Aka əngə ja, a tsə'u məno ndzam madawa na lir ndəkurndə wa. Madangə əngə məno ɗaka ndzam Kəristi, kəl ja, sakana a tsə'u məno ndzam nyi əngə wa.

¹⁷Aka ma ndə tə ɗa ku Kəristi, a ɗatə cha taɗər ndəu, sə halhal tərabiya tə, janə dəhə sə ɗatə taɗəu.

¹⁸Dəhə sə'ina, hya'atə tsa Hyel ngani, nda ɓəlandə mən shili da kərnyi təwa Kəristi, ga nə mən tlər ɓatlə pama nji na Hyel.

¹⁹Mafakə kəmən nacha ngə Hyel kwa ɓəlandə nji dəhə yada cha təwa Kəristi, a tsə'u cho jiga səpəla'a kənda wa, ya nə mən tə cha mafakə nda kwa dəkə ənda cha ɓəlandə mən yada kərnyi.

²⁰Aka na ea ngə nja sə ka ɓwanya tə nyar Kəristi, wi Hyel ngə na kərnyi kwa ɓwanya nə hi təwanə ea, aku tləmər Kəristi ea kwa gədi hi, hya ɗa ka bazhinya Hyel a da njir dawa nyi wa!

²¹Kəristi da ta mər bikə wa, kəl ja, Hyel tə mərtə nyi cha ɗa ka səpəla'a a tə nyanə mən, aka ga məna uya tsa'atsa'akur Hyel təwa daɓəkər ka cha.