Read nya huba 2 Korinti 6 Bible Online

2 Korinti 6 - nya huba bible

2 Korinti 6

¹Aku tlər kəea ka Hyel, eo gədi hi nahi nda dləutsə ɗanghali Hyel, ngwa hya da ngyar cha ɗa sə ɓwa'atanyi wa.

²Ngatə ma sənda Hyel tə na, “Nda bəji nda yo char hi papa'akur tə shili a ngatə hi təya, aku bəjir dləuya tsəu vala hi təya.” Yo nar hi sakana bəjir papa'akur Hyel na, sakan nə pəchir dləuya.

³A da eo ngya chul ngya nda kwa gwa'atə madawa tləhi wa, tsa nja da uya ea na bikə ku tlər kəea.

⁴A təvəra ənga, aku dəhə sənda eo məra ea kwa char ənda njir mər tlər Hyel ea. Ya ea kwa mər ənga ana mbahuɗəu, ku ɓwaɓwatəu, izza ana ma'a təmachi.

⁵Nja dəgə ea, nja fəu ea ku jarum, nja takasiya ea ku mwali, ea mər tlər nda ndiya dunama kəea, ea hanyi kəla hanyi ana kəla sərsuma.

⁶Təwa ngya chichi kəea, ana zəndə nda ea ni, ana səsəu kəea, tsa'a na mənakəkur, ea kwa char ənda njir mər tlər Hyel ea təwa Shanguɗə Karti nda ku ea, ana nyida nda tsa'anyata,

⁷ana mafakə nə jiri kəea, ana gyalkur Hyel. Tsa'atsa'akur ngə sənda ea gəziya barabara ka balmi kəea.

⁸Təwa səli ana tar səli, ngəla ana fala. Nja hətə ea njir tla gəzhi, kəl ja, jiri ea kwa dəka.

⁹Wi a njo zəndə ea wa, kəl ja, dəhə nji kwa zəndə ea, wi eo tah, ya ana pi ea, nja dəgə ea, ya ana nja tsəya ea wa.

¹⁰Madangə ku huɗətla ea, kəl ja, ea kwa mər hirgyaɗi, nji ɗaliɗali ea, kəl ja, ea kwa mərtə nji ka njir gəna. Səda tsa ea wa, kəl ja, dəhə sə nəkəea nga.

¹¹Nahi njir Korinti, ea ɓwanya nə hi tə babaləu, ya kwa nyida hi ea tsa'anyata.

¹²A da ea ngya hi wa, kəl ja, nahi nga ngyar dləukə ea na ta zhang.

¹³Yo i hya wum na'a wi nguli ɗa hi, hya char ea ənda kwa nyida ea hi wi nda eo nyida hi!

¹⁴Ngwa hya dlətə kər ka nji kəla nəu Hyel wa. Aman tsa'atsa'akur kwa daɓə na ɗimikura? Aa mya daɓə vimbəlmbəla na kutla?

¹⁵Mi sənda tə pama Kəristi ana Sərtaka? Aa, mi sənda daɓə njir nənyi jiri ana nji kəla nənyi jira?

¹⁶Ətsəu ya, mya daɓə Mbwa'alə Hyel na kata? Aka Mbwa'alə Hyel nda na pi mən. Wi nda Hyel tə na, Yo ngya kə'i nda yo ma'i ku pama nda. Yo ɗa ka Hyel kənda, ya nda kwa ɗa na'awa nji.[1]

¹⁷Aka ənga, zəbiya ma ku pama nji kəla nənyi jiri, hya təkəbiya kərnəhi kə'i nda, ənghwandə Tlakəu. Ngwa hya tsəkar sə hiɗahiɗa wa, ya yo dləutsə hi.[2]

¹⁸Yo ɗa ka Adan hi, ya hyo ɗa ka nguli ɗa mahi'i ka shili, ənghwandə Tlakə ndər gyalkur.[3]