Read nya huba 2 Korinti 8 Bible Online

2 Korinti 8 - nya huba bible

2 Korinti 8

¹Ka zama ka kwama, eo i hya zəndə sənda ɗanghali Hyel tə mər ku pama njir nəu nda vu Makidoniya.

²Aka sa tənda ɓwaɓwatə gagaɗa, aka iza'ur ɓwaɓwatə nda gwa nda kwa, kəl ja, hirgyaɗi kənda tə gwa'atə nda kwa nənyi ga'a na wunghər chi nə alenya nji, madangə nji ɗaliɗali nda.

³Təkəɗə yo nar hi, a mər tənda ga'a ngə tsa'atsa'a na dunama kənda, nganə ma'a ndiya matsa dunama kənda, ya nda mər ku ikur kənda, a da na tuku wa.

⁴Nda gədi ea ənya əzəkəu ka ea nənda lakur fə ga'a, ga nda ɗa ku huɗa nji'inda kwa vala njir nəu nda vu Yahudiya.

⁵Nda mər ndiya matsa ənda ea hari. Tangərma nda nənyi kərnənda nə Tlakəu, ana nə ea tsəu, wi nda Hyel tə gwa'a nda məra.

⁶Mana Titus ngə tə tsətə hi ɗufəu hya fə ga'an tangərma, aka ənga ea gədi nyi cha dləutsə nəkə hi na ga'a, ga hya udiya tlər papa'akur nda hya ghəya.[5]

⁷Aku dəhə səu a biyama hi, aku jirikur, aku ɓwanya, aku zəndi, aku dəhə tlər tsa'anyata, ana aku nyida nda hyo nyida ea, aka ənga yo i hya biyama na fə ga'a chi wunghəu.

⁸A da bəra yo tsau hi bar nə wa, kəl nda ka ga ya char hi mbadzə alenya nji, ya dzətə jirikura nyida kəhi, ga ya məməlatə tsa'anyatakur alenya nji ana nəkə hi.

⁹Aka zəndətə hi ɗanghali nda Tlakən mən Yesu Kəristi ni, madangə ndər ngəna cha, kəl ja, aka nahi cha ɗa ka ndə ɗaliɗali, aka təwa ɗali nyi hya ɗa njir gəna.

¹⁰Janə dəma nda yo i ya dəkətə hi təkəra sənda ndiya na mənakə ku səna. Huna, nahi tangərma, a da ku fə ga'a tanyi wa, ma'a ana ɗufəu mər əngə tsə'u.

¹¹Yau, wurandə ma tlər ngə hya ghəya ngə ja, ga chim kəhi nda tangərma ɗa tsa'atsa'a na uya kəhi.

¹²Macha ɗufəu nənyi nə Hyel tsa hi, Hyel kwa dləutsə ga'a kəhi ma hya mər məlməl na uya kəhi. A Hyel da kwa i hya nənyi sənda pa'a tsa hi wa.

¹³A da bəra yo i ya nənyi sə kusə nə alenya nji, ba'a nahi ya fəkəhi sə tədəɓə wa, kəl nda nja ɗa məlmələu.

¹⁴Kəl ja, sakana, mangə a da nyaɓə tsa hi, hya nənyi nə nji nda a da nə wa, aka ku bəji nda səda tsa hi tsəu wa, nda kwa nə hi ku nyaɓəkura sənda tsa nda, təwa ənga hyo ɗa məlmələu.

¹⁵Wi nda likatəkatə tə na, “Ndə nda tsəmtə 'ualəu, a da kwa ɗa 'ual nənyi wa, ya ndə nda tsəmtə kushiu, a da kwa tutə nənyi wa.”[6]

¹⁶Usaku tə ea Hyel, ənda cha fəu ku ɗufwa Titus cha tsamartə hi wi nda ya tsamartə hi.

¹⁷Aka a da dləukər tanyi Titus tə dləukər ka yada hi wi nda ea gədi nyi wa, kəl nda i təcha cha yada hi na hirgyaɗi wi nda cha har ku ɗufwa cha.

¹⁸Janə ea sətə ma'a vanya zama kə'i cha, nda dəhə njir nəu kwa fala aka bəzə Mafakə Mənakə nə Hyel.

¹⁹Matsa ngə ma'a, njir nəu tə tabiya nyi ka ga cha ma'i ka ea, ma eo ma'i na ga'a nda gwa Urshalima, tlər nda kwa hətə nyi səli nə Tlakə na kərnyi, ana ga ea char ənda kwa chim ea ka ea vala nji.

²⁰Eo ma'i na ga'a ngə dəhə ea, aka eo hwi tsa nja da uya ea na bikə təkəri.

²¹Aka chim kəea nacha ngə ea mər sənda tsa'atsa'a, a da kəl mar Hyel tanyi wa, kəl ja, ma'a tə lya nji.[7]

²²Ətsəu, anə eo sə zamən mən kə'i nda, a dzətə nyi tə ea zhaka ɗang tanyi, kəl ja, ea la'a kwa chim cha cha vala, ndiya matsa ngə ma'a a da cha na kərmətlə təwanə hi mada kushi wa.

²³Aka Titus bazhi mər tlər ɗa nga, nda kwa mər tlər na ya aka hi. Alenya zama ingə kə'i cha nga, nanda ingə njir nəu tə səa, ya tlər kənda kwa shili na səli nə Kəristi.

²⁴Aka ənga hya char nda nyida kəhi, ana hya char nyi nə dəhə njir nəu ənda wovi kəea na hi tsa'atsa'a tanyi.