Read nya huba Galati 2 Bible Online

Galati 2 - nya huba bible

Galati 2

¹Ahir fa kwabəfwaɗəu, ya ɓəla gi Urshalima, aku bəji na na ea na Barnabas ba'a Titus tsəu.

²Ya ma'i aka Hyel ngə tə chabiya ɗa ya ma'i, ya nganda wawa'ar nji ga ɓwanya nanda a təkəra chul Mafakə Mənakə nda ya kwa bəzə nə nji'inda pa'ada njir Yahuda. Ya par nda tsa yada ba'a mər tlər ɓwa'atanyi.

³Madangə a Titus bazhi mər tlər ɗa da ndər Yahuda wa, a ndə da chiu nyi ku tla bədzang na tuku wa.

⁴Ɓwanyar tla bədzang nga shili aka alenya njir tla gəzhi ənda njir nəu nda tə tləɗəu kərnənda gu pama mən. Nda səgwa aka nda dləuya dimukur nda mən nə ku Kəristi Yesu, nda mərtə mən ka mavi'i.

⁵Kəl ja, a da ea dləukə nda wa, aka ea ɓəlatə jirir Mafakə Mənakə aka hi.

⁶Ya a səda wawa'ar njir nəu kwa tsakətə təkəra mafakə nə ya kwa bəzə nə wa. (Aku la'a ɗa, madami nda, a da cha vanya sə na'a wa, aka a Hyel da kwa takəl wa).

⁷A təvəra ənga, nda la'a ənda Hyel na'a tə tlər bəzə Mafakə Mənakə nə nji'inda pa'a njir Yahuda, tang wi nda cha nənyi nə Bitrus ka cha bəzə Mafakə Mənakə nə njir Yahuda.

⁸Hyel nda tə mər tlər na Bitrus wi changhabal nə njir Yahuda kwa mər tlər naya tsəu ndə nda nja səndzə nyi nə nji'inda pa'a njir Yahuda.

⁹Yakubu, Bitrus ba'a Yohana inda tə ɗa ka njirawawa'a ngabiya tə ənda Hyel nga na'a ngawa tlər ɗanghali, aka ənga nda dləutsə ea na Barnabas ka bazhi mər tlər kə'i nda. A dləukərtə ea, nda kwa bəzə Mafakə Mənakə nə njir Yahuda, na ea tsəu nə nji'inda pa'a njir Yahuda.

¹⁰Wur sənda nda par ea nacha ngə, ea vala nji ɗaliɗali, ya nacha ngə sənda yo chim ya məra mada sakamani.

¹¹Nda Bitrus tə shili vu Antakiya, ya tsə nyi, aka a sənda cha mər da tsa'atsa'a wa.

¹²Nda cha ghəya shili, cho səm ka njir nəu inda pa'a njir Yahuda. Ahir nda Yakubu tə sə alenya nji yi Antakiya təma Bitrus a ngyar səm ka nji'inda pa'a njir Yahuda. Ləvər tə səya nyi tsa nji'inda kwa na tuku nja tla bədzang nda.

¹³Əngə alenya njir nəu inda njir Yahuda tə mər dəmənkur, ana ma'a Barnabas.

¹⁴Manda ya la'a ənda anda nəu jirir Mafakə Mənakə wa, ngə ya ɓwanya nə Bitrus a biyamar alenya nji'inda, “Mangə nakə nda nja yah ndər Yahuda ɓəliyatə gadlagadla kəhi ga ghəya ngya wi alenya nji, ma ngə ko gwa'a chiu alenya nji'inə ku sər jul njir Yahuda tsəu?”

¹⁵Naya naka njir Yahuda ma təwa yah, a da njir mər səpəla'a wi nji'inda pa'a njir Yahuda wa.

¹⁶Dəhə ka ənga a zəndətə mən ənda nja mərtə ndə tsa'atsa'a na Hyel təwa jirikur ku Yesu Kəristi, a da təwa ɓəlatə gadlagadla wa. Ya a nənyi təmən jiri nə Yesu Kəristi ga nja mərtə ma tsa'atsa'a na Hyel aka jirikur kəma ku Kəristi, a da aka ma ɓəlatə gadlagadla wa. Aka a ndə do mərtə dzə tsa'atsa'a na Hyel təwa ɓəlatə gadlagadla wa.

¹⁷Macha ɗa, məno gwa'a mən ɗa tsa'atsa'a na Hyel təwa Kəristi, ngə nja uya mən na bikəu ənda a da məna ɓəlatə gadlagadla wa, a chartə ənda Kəristi kwa mba sar nə səpəla'a ya? A laku da wa!

¹⁸Kəl ja, ma tə ɗa ya ɓəla hərbiya lakur gadlagadla inda ya ɗaka huɓənda, a ɗatə ya ka ndər mər səpəla'a ndani.

¹⁹Aka təwa gadlagadla, a wurtə ya tah nə gadlagadla ga ya ɗa na pi aka Hyel.

²⁰A wurtə nji kukwanda ɗa na Yesu Kəristi kyatə taməngəla, sakan ja, a tsə'u naya ngə na pi wa, kəl nda Kəristi ngə na pi ku ya. Yo ngya na jirikur ku nəna dza təwa fəkər da Zər Hyel nda tə nyidatə ɗa ga sənda pya cha ka ya.

²¹A da ya shandə ɗanghali Hyel ka sə ɓwa'atanyi wa. Aka macha ɓəlatə gadlagadla kwa mərtə cha ndə tsa'atsa'a na Hyel, yau, a sakədar tər Kəristi da ndani wa.