Read nya huba Galati 3 Bible Online

Galati 3 - nya huba bible

Galati 3

¹Njir Galati nji kəkəng! Wa nda shandə hi kəra? Aka a chabiya hi tə nji dəhə sə bwabwa'a təkəra Yesu Kəristi nda nja kukwanda kyatə taməngəla.

²Ngwa ya jawar hi, Shanguɗə Karti ngə hya dləutsə ngə ya, təwa ɓəlatə gadlagadla Musa ngə ya? A da wa! Hya dləutsə Shanguɗəu aka hya nənyi jiri nə ɓwanya nda hya ngatə təkəra Kəristi.

³Mya mərtə hi kəkəng ənga? Nahi nda ghəya ngya kəhi nə njir nəu ku Shanguɗəu, ma'a ngə hyo gwa'a udiya ku dza?

⁴Ɓwa'atanyi ngə hya sa ɓwaɓwatə gagaɗə ya? A nənyi tə ya jiri a da ɓwa'atanyi wa, aa ɓwa'atanyi ya?

⁵Yo tsakətə jau hi, aka hya ɓəlatə gadlagadla ngə Hyel tə nə hi Shanguɗə Karti ga mər səshinshin i ku pama hi ya? A da wa! Kəl nda aka hya nənyi jiri nə mafakə nda hya ngatə təkəra Kəristi.

⁶Ndzamar ma Ibrahim, likatəkatə tə na, “Ibrahim tə nənyi jiri nə Hyel, ngə Hyel tə jigau nyi ku pama nji'inda tsa'atsa'a nacha aka jirikur nyi.”

⁷Ya nguli Ibrahim nə jirijiri na nda ingə nji'inda nənyi jiri nə Hyel.

⁸Likatəkatə tə na, Hyel kwa mərtə nji'inda pa'a njir Yahuda tsa'atsa'a nacha təwa jirikur. Hyel a bəzəya nyi Mafakə Mənakə nə Ibrahim ɗəɗəməu, “Dəhə dunəya kwa uya papa'akur təwa ngha.”

⁹Aka ənga ja, nji'inda tə nənyi jiri nə Yesu uyatə papa'akur tsa'aka Ibrahim, nacha nda ndər jirikur.

¹⁰Kəl ja, nji'inda kwa ta'i ka gadlagadla kwa ngya da kiɗa shu'ua, aka likatəkatə tə na, “Sər təhuɗə na dəhə ndə nda kəla kwa ɓəlatə dəhə sənda nja tsəfətə ku likatəkatə gadlagadla.”

¹¹A chabiyatədzə tə babal, a ndə da kwa ɗa tsa'a na Hyel təwa ɓəlatə gadlagadla wa, aka likatəkatə tə na, “Ndər mər sə tsa'atsa'a kwa ɗa na pi təwa jirikur.”

¹²Lakur jirikur na, pam cha matsa lakur gadlagadla nda tə na, “Təwa ɓəlati gadlagadla ngə nda kwa uya pi.”

¹³Sakan ja, Kəristi dləuya mən ti ku cha shu'u ngə gadlagadla tə təɗə kəmən nga, cha həkər shu'u səpəla'a kəmən təkəra kərnyi, aka a natə nji, “Sər təhuɗə na dəhə ndə nda nja kukwanda kyatə wua.”

¹⁴Təwa Yesu Kəristi, Hyel tə səkə nyi papa'akur nə nji'inda pa'a njir Yahuda ana papa'akur nda cha mər alkawal nə Ibrahim, tsa'aka namən inda njir nəu kwa dləutsə Shanguɗə Karti nda nja mər alkawal təwa jirikur.

¹⁵Ka zama, ngwa ya mərtə hi ba'ada wi sənda hya tsəl na la'a. Wi ngə ma nji mətlə tə mbandər a ndə da kwa nau ɓəliya ndara cha tsakəkəri vanya sə wa, əngə tanyi ana nəna səu.

¹⁶Hyel tə mər alkawal nə Ibrahim ana zər nyi. Likatəkatə da na, “Nyandəla cha wa,” nda kwa cha wi ɗang nda wa. Kəl nda nja na, “Zər nyi,” ya a kəpal da wa Kəristi ngə njo ɓwanya təkəri.

¹⁷Janə sənda yo ɓwanya təkəri, Hyel tə mərtə nyi alkawal nə Ibrahim ya natə cha cho mərtə sənda cha na. A gadlagadla nda nja nda shili nə ahir fa gharəu fwaɗə na makərkumənyi da kwa nau ɓəliya alkawal nda Hyel tə mər wa.

¹⁸Macha kəl təwa ɓəlatə gadlagadla ngə njo uya ga'ar Hyel, a tsə'u do ta'i ka alkawal wa. Kəl ja, Hyel ku ɗanghali nyi tə nənyi papa'akur nyi nə Ibrahim təwa alkawal.

¹⁹Ya mi ngə sakədar gadlagadla nganə ja? Nja shili na cha ka chabiya səpəla'a nji. Ka nja mər tlər nə yi tsa'a tə bəji nda Zər nda nja mər alkawal kwa shili. Hyel tə lətə gadlagadla təwa chama nyi nə Musa nda tə ɗa ku pama Hyel ka nji.

²⁰Ma nji mətlə kwa mbandər nacha ngə njo gwa'a ndər ta'i ku pama nda. Kəl Hyel nda zhang tanyi, a da gwa'a ndər ta'i ku pam bəji nda cha mər alkawal nə Ibrahim wa.

²¹Aman nganə ja, səngo char ənda gadlagadla kwa mər dawa na alkawal Hyel ya? A da pa'a wa! Macha gadlagadla kwa nau cha nə mən taɗər pi, njo nau mərtə mən tsa'atsa'a na Hyel təwa ɓəlatə nyi.

²²Anyar ənga, likatəkatə Hyel tə na, dəhə dunəya da kiɗa təlkur səpəla'a. Aka ənga məna dləutsə alkawal Hyel nə mbəɗandə mən təwa nənyi jiri nə Yesu Kəristi.

²³Təvi lakur jirikur shili, a da kiɗa gadlagadla mən wi ku jarum. A lakur biya da wa kəl təwa nənyi jiri nə Yesu, nda nja chabiya.

²⁴Gadlagadla ngə tə ɓəla mən yi tsa'a tə bəji nda Kəristi tə shili ti, a ɓəlatə mən kəl bəji nda nja mərtə mən tsa'atsa'a na Hyel təwa jirikur.

²⁵Sakan ja, ana shilir jirikur, a tsə'u mən da kiɗa ɓəla nə gadlagadla wa.

²⁶Təwa jirikur ku Yesu Kəristi ngə hya ɗa ka nguli Hyel.

²⁷Aka nahi nda daɓətə dzə na Yesu aku baɓtisma a handzə təhi Kəristi, wi nda njo ha taɗər ləkutəu.

²⁸A tsə'u pam da ku pama ndər Yahuda ana ndər Heleni wa, ndara mava ndara dimu, sal ndara malakəu. Aka dəhə hi zhang ku Yesu Kəristi.

²⁹Sakana nə Kəristi hi, nguli Ibrahim hi nə jirijiri. Nyandəla cha hi, ya alkawal Hyel nə Ibrahim nəkə hi nga.