Read nya huba Galati 4 Bible Online

Galati 4 - nya huba bible

Galati 4

¹Əja, a pam da ku pama mava ana zər kushə nda kwa səkə sər fa'aki wa, madangə dəhə sənda ada nyi tə ngyari, nənyi nga.

²Kəl nda kwa ngya da kiɗa ndə nda təkəra cha, kəl bəji nda adanya zər nda tə fiya tə ɗa.

³Əngə tanyi mən bəji nda mən ngulisha'a, məna mər mavakur a da kiɗa təlkur ana gyalkur dunəya na.

⁴Kəl ja, nda bəji nda Hyel a fiya tə nyabiyadza, ngə cha sətə zər nyi, yar malakəu, cha ngya da kiɗa gadlagadla njir Yahuda.

⁵Hyel tə sətə nyi ka cha dləuya nji'inda da kiɗa gadlagadla, ka cha shandə mən ka nguli nyi.

⁶Aka nguli Hyel mən, cha nə mən Shanguɗə Zər nyi ku ɗufwa mən, nda tə gwa'atə məno nga Hyel, “Ada.”

⁷Sakan ja, a tsə'u hi mavi'i wa kəl nda nguli Hyel, ya mangə nguli Hyel hi, a mərtə hi tə cha ka nji'inda kwa uya sər fa'aki nyi.

⁸Təvi hya zəndə Hyel, mavi'i hi anə alenya hyel inda pa'a na pi.

⁹Kəl ja, sakana a zəndətə hi Hyel, ndara nja na Hyel tə zəndə hi, ma'a ngə hyo gwa'a ɓəla mər mavakur nə təlkur gyalkur kəla sakəda nə dunəya nda pa'a da na dunama?

¹⁰Hyo gwa'a hya ɗa tsa'atsa'a na Hyel təwa hətə nyi səli nə alenya pəchi, ndara hya, ndara fa i'i.

¹¹A tlənda ɗa təhi shanguɗa ya ana səngə hya mər ənga. Yo la'a wi dəhə ɓwaɓwatə nda ya sa təkəra hi ɓwa'atanyi.

¹²Yo gədi hi ja ka zama, hya ɗa wi naya aka a ɗa tə ya wi nahi, a səda hya zandə ɗa wa.

¹³Wi nda hya zəndə ənda ku bəji nda shiləkə tə səya ɗa nda, ya ghəya bəzə Mafakə Mənakə nə hi.

¹⁴Madangə shiləkə ɗa ɗatə ka ɓwaɓwatə nə hi, a da hya shar ɗa yi ndara hya həyatə ya wa. Kəl nda hya dləutsə ɗa wi chama Hyel ya, ndara Yesu Kəristi təkərnyi.

¹⁵Mya ɗa na nyida ana hirgyaɗi nda hya mər təkəra ya bəji nda? A nənyi tə ya jiri, kwa nda hi huɗakbiya lya hi hya na'a macha kwa nda hi nau.

¹⁶A ɗatə ya ka ndər dawa kəhi sakanə aka yo dəkə jiri nə hi ya?

¹⁷Nji ingə kwa i ka nda dlətə bazhikur kə'i hi gagaɗa, ya nda a da nda kwa chim sə dur ka hi wa. Nda kwa gwa'a nda təkəbiya ea ka hi, ga jigadəma kəhi təra ya kəra nda.

¹⁸Macha nda njir gwa'a mər sə mənakə nda nə hi, tsa'atsa'a tanyi, kəl ja, nda mərtə hi wa'atanyi, a da kəl bəji nda ya kə'i hi wa.

¹⁹Ngulisha'a ɗa! Ya ngatə wi ku ɓəlakər yah kəhi naya səkəu, ya a do wur wa kəl ma Kəristi tə chiya dzə ku ɗufwa hi.

²⁰Chim ɗa, nja na kə'i hi ya sakana ga ya ndər nə hi na vanya kurakə paməu. Aka kwa ɗəngha ya təkəra hi gagaɗa.

²¹Par ɗa ma, nahi inda kwa gwa'a ngya da kiɗa gadlagadla ya, kwa zəndə hi ndara mi ngə gadlagadla kwa cha ya?

²²Likatəkatə tə na, ngulisha'a shili Ibrahim mətləu, zhang təwa kwatəra, zhang tsəu təwa dimur malakəu.

²³Zər kwatəra nda nja ya nyi təwa ndəkur, kəl ja, zər dimur mala nda nja ya nyi təwa alkawal Hyel.

²⁴Ba'ada nga, mahi'i mətlə inga nanda ngə mbandər Hyel tsa'a mətləu. Hajara ngə ba'adar Mə Sinai nda kwa ya mavi'i.

²⁵Hajara ɗatə ka ba'adar Dəgəl dəgal nə Sinai nda hya'atə tə hə'i njir Arabiya. Nacha ngə ba'adar Urshalima nə sakan na, aka Hajara ka nguli nyi mavi'i nda.

²⁶Kəl ja, dimur mala nda, Saratu, nacha ngə ba'adar Urshalima nə huɗamələm, ya nacha ngə ama kəmən.

²⁷Aka a tsəfətə tənji, “Mər hirgyaɗi, nakə mala kəla yah, nakə nda pa'a ta yah! Səya kyalali hirgyaɗi, nakə nda pa'a ta ɗar ɓəlakər yah! Aka nguli mala nda sal nyi tə ngya nyi ɗatə ɗanghəu, matsa mala nda da saləu!”

²⁸Sakanə ja ka zama, a ɗatə mən ka nguli alkawal wi Ishaku.

²⁹Aku bəji nda, zər nda nja yah təwa ndəkurndəu tə ɗa məndza'u na zər nda nja yah təwa gyalkur Shanguɗə Hyel. Ya əngə tanyi ngə njo mər nə mən ənya.

³⁰Kəl ja, mi sənda likatəkatə tə na təkəra sənga? “Gədlənda kwatəra ngə na zər nyi, aka a mbaɗə nyi da ku sər fa'aki zər dimur mala wa.”

³¹Aka əngə ja ka zama, a da mən nguli kwatəra wa, kəl ndara nguli dimur malakəu.