Read nya huba Afisa 1 Bible Online

Afisa 1 - nya huba bible

Afisa 1

¹Hya'atə tsa Bulus nda changhabal nə Yesu Kəristi təwa ikur Hyel, yi nə nji nda nə Hyel vu Afisa,[1] nda na jiri ku Yesu Kəristi;

²papa'akur ana piyarɗufəu hya'atə tsa Hyel Adan mən ana Tlakən mən Yesu Kəristi cha ngya tsa'a nahi.

³Fal nə Hyel ana Adanya Tlakən mən Yesu Kəristi, ndə nda tə səkə mən papa'akur hya'ati kya huɗamələm ana kala papa'akur nə Shanguɗə aka ku Kəristi mən.

⁴Aka cha ɗəmtsə mən ka məna ɗa ka nənyi təwa Kəristi təvi nja mər dunəya aka məna ɗa karti ana kəla sər ngəla a tə lya cha. Aku nyida

⁵Hyel tə ɓatliya ka məna ɗa ka nguli ta cha təwa Yesu Kəristi, məlməl na sənda kwa ɗa mənakə nənyi ana ikur nyi.

⁶A mən fal Hyel aka səlir ɗanghali nyi, nda cha nə mən ga'a tanyi aku zər nyi nda cho nyida.

⁷Aku cha məna uya mbəɗa təwa mashi nyi, nda nacha ngə farbikəu, təwa 'ualkur ɗanghali nə Hyel

⁸nda cha nə mən bwaɓ tanyi ana dəhə dəma ana ngabiya.

⁹Ana cha mərtə məna zəndə sə ɗəwaɗəwa nə ɗufwa cha, aka mənakəkur nyi nda cha chim ku Kəristi,

¹⁰nacha ngə jigadəma nyi ma bəji nda ɗa cha tsəmiya dəhə sə da kiɗa Kəristi, dəhə sənda kya huɗamələm ana a tə hə'i.

¹¹Hyel tə ɓatliya dəhə sə məlməl na sənda ku ɗufwa cha. Ɗəɗəm tanyi tsə'u cha ɗəmtsə mən, məna ɗa ka sər fa'aki nyi aku Kəristi.

¹²Aka namən nda tə ɗa ka tangərmar njir fəkər ku Kəristi, məna fal səli nyi.

¹³Ma'a nahi nji'inda pa'a da njir Yahuda a jigau hi tə nji aku Kəristi a tə bəji nda hya ngatə ɓwanya nə jiri, Mafakə Mənakə nə dləuya kəhi. Manda hya nənyi jiri, ngə cha nə hi Shanguɗə Karti nda cha mər alkawal nyi ɗəɗəm, nda a ɗa ka sər ba'ada ənda nənyi hi.

¹⁴Shanguɗə Karti nacha ngo chari ənda Hyel kwa nə mən sər fa'aki nda cha mər alkawal nyi, kəl bəji nda cha pəliya mən məna ɗaka nənyi na nji. Cha mər ənga ka məna fal nyi ana həsəli nənyi.

¹⁵Aka ənga ja, manda ya ngatə jirikur kəhi ku Tlakə Yesu ana nyida nda hi ni, nə dəhə njir nəuwa,

¹⁶naya ta'ində mər usaku ka hi wa, yo ɗənghatə hi ku pətlənya ɗa i.

¹⁷Ya kwa gədi ənda Hyel nə Tlakən mən Yesu Kəristi, Ada nda na səli, cha nə hi Shanguɗə nə dəma ana takər, ənda hya ɗa na zəndə nyi mənakəu.

¹⁸Yo pətlənya tsə'u ənda jigadəma kəhi kwa ɗana mbəɗa ga hya zəndə fəkər nda cha nga hi kari, ana 'ualkura sər fa'aki ndana səli nda cha mərtə nyi alkawal nə njir nəuwa.

¹⁹Ana yo pətlənya tsəu ga hya zəndəbiya 'ualkura gyalkur nda cha ni, aka mən nda kwa nənyi jiri nda a sər məməla nyi da wa. Gyalkur ndana dunama nda kwa mər tlər dəgaləu,

²⁰nda cha char aku Kəristi aku bəji nda cha hya'andə nyi tə ku hwa, ngə cha njinda nyi tə chisəma cha aku ngyar huɗamələm.

²¹Sakana a ndiya tə cha dəhə nji təltəl ana gyalkur ana njir dunama ana gau i ana zəwa dəgalkur da tsa cha nda ndiya dəhəu, a da kəl ku dunəya sakan wa, kəl ja, ba'a tə bəji ngə zəkəu.

²²Ya Hyel a fiya tə dəhə səu a da kiɗa gyalkur nyi, ngə cha tabiya nyi cha ɗaka gavərma a təkəra dəhə səu aka sakədar njir nəuwa,

²³ya nanda ngə dza Kəristi nda tə nyabiyadzə nacha, nda nacha təkərnyi tə nyabiya madami aku kala laku.