Read nya huba Afisa 2 Bible Online

Afisa 2 - nya huba bible

Afisa 2

¹Ɗakaɗa, nji kuɗəkuɗə hi aka kəla ngatəndərkur ana ɗangkur səpəla'a kəhi.

²Hyo maka ngya aku səpəla'a, wi ngə tə alenya njir dunəya, kwa nəu nya sərtakəu nda kwa gəla gyalkur i nda pa'a njo la'a, nacha ngə shanguɗə nda kwa mər tləra aku ɗufwa nji, ga nda ngyar nəu nya Hyel.

³Dəhə mən, ta tə məna ngya wi nəkənda nga, kwa mər sə nda kumur dza mən kwa i, ana kwa nəu səpəla'a nda cho chima ana jigadəma, na mən tsəu təwa kumur dza, sər huɗətla mən nə Hyel wi ngə tə madawa.

⁴Kəl ja, aka 'ualkura nyida nda cha nə ka mən, Hyel, nda na uya 'ual nə təhuɗəu,

⁵tə mərtə mən na pi tsa'a na Kəristi, mada wi nda mən tətənyi ku mər səpəla'a, təwa ɗanghali Hyel ngə hya uya mbəɗa.

⁶Ya ngə Hyel a hya'andi mən na Kəristi ngə cha ngya nda mən kya huɗamələm ana cha,

⁷aka ku bəji nda kwa da shili cho nau char mən uyar ɗanghali nda cha ni, cha chabiyadza ku mənakəkur nda cha ni, nə mən ku Kəristi Yesu.

⁸Aka təwa ɗanghali Hyel ngə hya uya mbəɗa, təwa jirikur nda hi ni, ya a da aka mbadzə kəhi wa, kəl ja, ga'ar Hyel nga,

⁹a da təwa tlər wa, atsa ndə da uya sər wovi.

¹⁰Aka Hyel tə mərtə məna ɗa wi nə mən na, cha mərtə mən taɗə aku Kəristi Yesu aka tlər mənakəu, nda Hyel tə ɓatliya kaɗə ka məna məra.

¹¹Aka əngə ja, hya ɗənghatə sakanda a da hi njir Yahuda təwa yah wa, nji'inda kwa tla bədzang aka sə nda nda kwa mər nə dza nda, nda kwa nga hi, “Nji kəla tla bədzang.”

¹²Aku bəji nda a da hyo zəndə sə təkəra Kəristi wa, aka nji shilishili hi anə njir Isra'ila, ya a da hi ku mbandər nda Hyel tə mər nə nda wa, hya ngya aku dunəya a da na fəkər təkəra alkawal nda Hyel tə mər nə nda wa, ya a da hi na Hyel wa.

¹³Kəl ja, sakana aku Kəristi Yesu nahi nda ɗakaɗa naɗəu a shilitə nji nahi ləhəu təwa mashi Kəristi.

¹⁴Aka nacha təkərnyi piyarɗufəu kəmən cha, ndə nda tə mərtə njir Yahuda ana nji'inda pa'ada njir Yahuda nda ɗa nji zhang, ya ngə cha huɓunda bwaburum dawakur nda təkəbiya pama nda.

¹⁵Cha hənda gadlagadla ana tsaubar i'i təwa dza cha tə taməngəla. Jigadəma nyi nacha ngə aka cha batliya taɗər nji'inda biya ku nji mətləu inda. Aku ənga cha shili na piyarɗufəu,

¹⁶ana ənga cha daɓiya nda tsa'a kya'a ku dzə zhang anə Hyel təwa taməngəla, nda hənda təcha dawakur ku pama nda.

¹⁷Cha shili ga bəzə mafakə piyarɗufəu anə hi, nahi nji nda pa'a njir Yahuda, nda naɗəu, ana piyarɗufəu anə njir Yahuda nda ləhəu.

¹⁸Təwa nyi dəhə mən məna Uya yada Ada aku Shanguɗə zhang.

¹⁹Aka ənga a tsə'u hi nji shilishili ndara mihiɓi wa, kəl ja, ɗa təhi ka njir hə'i zhang ka njikə Hyel, ya njir ki Hyel.

²⁰Pabiya da hər hi nda nja səya hya cha ana njir mətakər ana changhabal. Yesu Kəristi na kərnyi nacha ngə hangu ɓəlkər.

²¹Nacha na kərnyi nga dləɓətə kəra nda ngə nda ɗaka mbwa'alə karti nda nja dzəvəya nə Tlakə nda.

²²Təwa Kəristi nahi ma'a a hərəu hi tə nji tsəu ku mbwar ngya Hyel nda təwa shanguɗə nyi.