Read nya huba Afisa 4 Bible Online

Afisa 4 - nya huba bible

Afisa 4

¹Aka əngə ja, naya nda nja fəu ku jarum aka tlər Tlakəu, yo gədi hi hya ngya tsa'atsa'a wi sənda kwa kina sənda nja nga hi kari.

²Aku dəhə səu hya həyakər ana shishi'ur hali; hya ɗana səsə'ua, hya mbahuɗə na kərnəhi aku nyida.

³Mbabiya ma dza ənda hyo ɗana ngya zhang aku Shanguɗəu, təwa piyarɗufəu nda tə gəzətə hi.

⁴Aka dzə zhang Shanguɗə zhang, wi nda tə fəkər zhang nda akari ngə Hyel tə nga hi.

⁵Aka Tlakə zhang, jirikur zhang, baɓtisma zhang,

⁶Hyel zhang, nacha ngə Adanya dəhə njir nəuwa. Nacha ngə təkəra dəhə njir nəuwa, kwa mər tlər nyi təwa dəhə njir nəuwa, nacha ngə ku dəhə njir nəuwa.

⁷Aka ənga a nənyi tə nji gyalkur Kəristi nə madawa ku huɗa mən məlməl na sənda cha ɓatliya.

⁸Wi nda ɓwanya tə na, “Aku bəji nda cha gyatə mbwa dzəgam ti, ngə cha fa'atə nji'inda nja səya, ətsə'u cha nənyi ga'a pampam nə nji.”

⁹Sakan ja ya, mi sənda, “Cha təra gya” chara? A chari, tangərma cha səya ga təra bətə səyo mbəla hə'i!

¹⁰Nacha nda səya nda, nacha ngə tsə'u a təra gya mar huɗamələm, ga cha nyandə huɗamələm ana hə'i dəhəu.

¹¹Nacha ngə tsəu tə nənyi ga'a nə nji; Alenya nji cha mərtə nda nda ɗaka kə'i changhabal, alenya nji tsəu njir mətakər, alenya nji nda ɗaka njir bəzə Mafakə Mənakəu, alenya nji nda ɗaka njir nəuna nji ana njir dlədləɓə nə nji.

¹²Cha mər ənga ka ga nda ɓatliya njir nəu Hyel ka nda mər tlər nənyi, aka ga njir nəu nda nanda ngə dza Kəristi həa ana dunama.

¹³Təwa ənga, dəhə məno shili tə mbwar zhang aku zhangkur nda ku jirikur kəmən ana ku zəndə Zər Hyel; məno ɗaka nji dzangərdzangəra, məno nyabiyadzə wi ngətə Kəristi nda nyinyinyi.

¹⁴Aka əngə ja, a tsə'u məno ɓəla ɗaka ngulisha'a səkə wa, ndara məna ɗa wi nji'inda njo wendə jigadəma kənda na taɗər dlədləɓa, wi ngətə gyang kwa fi wa, nji'inda njir dəma kwa shakər nənda na kwakunakur kənda wa.

¹⁵A təvəra ənga, məno pə jiri aku nyida, ga məna həa ku dəhə ngya kəmən nda kwa mərtə məna ɗa wi Kəristi nda kər nə dza.

¹⁶Aka dəhə dzə kwa ngya ka Kəristi wi ngə dəhə mədlər dzə tə gəzətə dza ana dəhə vala nda bəlatə ni. Wi nda kala mədlər dzə kwa mər tlər nyi, dəhə dzə kwa həa ku nyida.

¹⁷Aku tləmər Tlakə ja, yo təɗəhimi nə hi; ngwa tsəu hya ngya wi nji'inda pa'a do zəndə Hyel wa, nji'inda jigadəma kənda da na sakəda wa.

¹⁸Nji'inda jigadəma kənda na kutla, a təkəbiya nda tə nji na pir Hyel aka tar zəndə ana ɓaɓalkura ɗufwa nda.

¹⁹A tsə'u da nda kwa la'a sər kuzhi wi vanya sə wa, nda kwa mər sə hiɗahiɗa wa'atanyi ya kər mər tanyi nda kwa chim məra.

²⁰Kəl ja, a da sə nda hya dlədləɓətə təkəra Kəristi ngə wa!

²¹Vəlvəl a ngatə hi sə təkəra cha, manda njir nəu nyi hi, ya dəkətə hi tə nji jiri nda ku Yesu.

²²Aka əngə ja, təkəbiya ma dzə na ngya ɗəɗəm kəhi nda, ngya nda kwa səwa təwa nyida sər shakər i.

²³Ɗufwa hi ana jigadəma kəhi nda ɗa taɗəu,

²⁴ya ɗatə tuku hya ɗaka taɗər nji, nda nja ɓatlətə pabiya da Hyel nda chabiya kərnyi ku jirir jirikur, nda tsa'atsa'a, ya chaməu.

²⁵Aka əngə ja, hya ngyar tla gəzhi, madawa ku pama hi cha dəkə jiri nə kuvanyi, aka dəhə mən dzə zhang mən.

²⁶Aku huɗətla kəhi ngwa hya da mər səpəla'a wa, ya ngwa hya da i pəchi təɗə təkəra huɗətla kəhi wa.

²⁷Atsa hya da nənyi laku nə sərtakəu.

²⁸Əngwa ndər həl da tsakətə həl wa. A təvəra ənga cha mər tlər mənakə ana cha cha nda cho nau uya sənda cho vala alenya nji'inda tə tari.

²⁹Ngwa vanya ɓwanya ɗimi da biya ku nya hi wa. Dəhə sənda kwa biya ku nya hi cha ɗa sə mənakəu ana sər vala, məlna dəhə ɓwanya kəhi cho ɗa sər fətənyi ɗufəu nə nji'inda kwa səhimi.

³⁰Ngwa hya da tliyanyi huɗa Shanguɗə Karti nə Hyel wa, aka nacha ngə kwa da char ənda nə Hyel hi atə bəjir dləuya.

³¹Hya təkəbiyadzə na dəhə dzaukur, huɗətla, həɗufəu, pa, ngəl dza, ana paha.

³²Hya mərtə nyi mənakəkur nə kərnəhi, hya ngatə təhuɗə kərnəhi, hya farbikər kərnəhi, wi nda Hyel tə far nəkəhi təwa Kəristi.