Read nya huba Afisa 5 Bible Online

Afisa 5 - nya huba bible

Afisa 5

¹Dlədləɓə ma tsa Hyel, wi ngulisha'a nda njo nyida,

²hya ngya na nyida, wi nda Kəristi tə nyidatə mən ga nə mən kərnyi ga'a, sər hatəmachi nda Hyel kwa ngatə məsəɗakəkur ni.

³Ngwa nja da ngatə kasalikur, hiɗahiɗakur, ndara huɓərsə ku pama hi wa. Chul ngəna səpəla'a do kina ɗa ku pama njir nəu Hyel wa.

⁴Əngə tanyi tsəu ngwa hya pə sər kuzhi wa, pə sə kəla kər, ana ngwa hya da ɓəlnyaguma təkəra sə shiushiu wa, a do ki na njir nəu wa. A təvəra ənga, hya maka usaku Hyel.

⁵Hya zəndə ənda dəhə ndər mər kasalikur, ana ndər mər sə hiɗahiɗa, ana ndər huɓərsəu, (nda nacha ana ndər həsəli nə katəu sə zhang nda), a da nda kwa uya zhar təlkur Kəristi ana nə Hyel bada kushi wa.

⁶Ngwa hya da i madawa cha shandə hi kər ana ɓwanya gəzhi wa, aka chul ngəna səpəla'a ingə huɗətlar Hyel kwa shili təkəra nji'inda kəla kwa ngatə ndəra.

⁷Aka ənga, ngwa hya da daɓəkər kə'i nda wa.

⁸Aka ɗəɗəm aku kutlə hi, kəl ja, sakana, a uyatə hi vimbəlmbəla təwa Tlakəu. Hya ngya wi nguli vimbəlmbəla,

⁹aka vimbəlmbəl nacha ngə kwa mər sakəda 'ualəu, mənakəkur, ngya tsa'atsa'akur, ana ngyar jiri.

¹⁰Hya gwa'abiya sənda kwa ɗa mənakə nə Tlakəu.

¹¹Hya təkəna tlər kəla sakəda nə kutla nda nji kwa məra, kəl nda hya chukuɗabiya nda.

¹²Aka sər kuzhi cha, mada nja ɓwanya təkəra sə'inda nji kəla nəu Hyel kwa mər tə ɗəwa.

¹³Kəl ja, vimbəlmbəl kwa da chabiya ɗimikur kənda.

¹⁴Nacha nga gwa'atə nja na, “Hya'atə ndər njihanyi, hya'ati ku tah, ka Kəristi kwa mbəl nə ngha.”

¹⁵Aka ənga kəl hya gəla na ngya kəhi, ngwa hya da ngya wi nji kəkəng wa, kəl nda wi nji'inda na dəma.

¹⁶Hya mər tlər na bəji nda hya uya ka mər sə mənakəu, aka bəji ɗimi nə mən kwa.

¹⁷Ngwa hya da ɗa dzadza ja wa, kəl nda hya mbabiyadza ənda hyo ɗana gwa'abiya sənda Tlakə kwa i hya məra.

¹⁸Ngwa hya da wi na mbadlə wa, aka cho səwandə hi. A təvəra ənga hya nyi na Shanguɗə Karti,

¹⁹hya ɓwanya nə kərnəhi aku miya Dəla Nda Karti ana miya fala, ana miya shanguɗəu, hya vəra na miya fala ana tsa sə tsatsa nə Tlakəu ana dəhə ɗufwa hi.

²⁰Mada sakamani hya usaku Hyel Ada aka dəhə sə ku Tləmər Tlakən mən Yesu Kəristi.

²¹Hya ɗana kəriwa nə kərnəhi aka həsəli kəhi nə Kəristi.

²²Mahi'i, hya ɗana kəriwa nə shili kəhi wi anə Tlakəu.

²³Aka sal nacha ngə tlakə təkəra mala wi ngətə Kəristi Tlakə təkəra njir nəuwa, nda dza cha, nda nacha ngə ndər dləuya nyi.

²⁴Sakan ja wi ngətə njir nəuwa tə ɗa da kiɗa Kəristi, əngə tanyi tsəu mahi'i nda ɗa da kiɗa shili kənda aku dəhə səu.

²⁵Shili, nyida ma mahi'i kəhi, wi ngə tə Kəristi tə nyidatə njir nəuwa ga sənda pya cha aka nda,

²⁶aka ga cha mərtə njir nəu chaməu, chichinyi ana ɓiti təwa ɓwanya Hyel,

²⁷ana ga cha yi na cha nə kərnyi wi njir nəu inda na səli, nda a da na ɗyatlə tə ndara sər ngəl wa, kəl nda chaməu, ya kəla bikəu.

²⁸Əngə tanyi tsəu, shili nda nyida mahi'i kənda wi dza kərnənda. Ndə nda kwa nyida mala nyi kərnyi nda cha kwa nyida.

²⁹Aa ndə ta ngyar dza kərnyi ya? Kəl nda cho nənyi sərsuma, cho ɓəlatə nyi tsəu wi ngətə Kəristi kwa mər na njir nəuwa.

³⁰Aka mədlə dza cha mən.

³¹Wi nda likatəkatə tə na, “Aka ənga, ndə kwa ngyar ada nyi ana ama nyi, nda kwa daɓətə dzə na mala nyi, nji mətlə inda nda kwa ɗa zhang.”

³²Sə nga, jiri cha nda a ndər nau dəkəbiya da wa, kəl ja, ba'ada nga a təkəra Kəristi ana njir nəuwa.

³³Dəhə ka əngə ja, madawa ku pama hi cha nyida mala nyi wi nda cho nyida kərnyi, ana mala tsəu cha hətə nyi səli nə sal nyi.