Read nya huba Filibi 1 Bible Online

Filibi 1 - nya huba bible

Filibi 1

¹Hya'atə tsa Bulus ana Timtawus, mavi'i Kəristi Yesu. Yada dəhə nji chichi inda kwa nəu Kəristi Yesu vu Filibi, ana gau inda təkəra njir nəuwa, ana nji'inda kwa mər tlər nənyi.

²Papa'akur ana piyarɗufəu nə Hyel Adan mən ana Tlakə Yesu Kəristi cha ngya tsa'a na hi.

³Yo usaku Hyel dəhə bəji nda ya kwa jigadəma təkəra hi.

⁴Ku dəhə pətlənya ɗa ka hi, wa'atanyi yo pətlənya na hirgyaɗi,

⁵aka hya daɓəkər naya aku tlər bəzə Mafakə Mənakəu, fwatə tə tangərmar pəchi ba'a sakana.

⁶A nənyi tə ya jiri ənda, Hyel nda ghəya mər tlər mənakə nə aku pama hi, kwa udiya yi tsa'a tə bəji nda Kəristi Yesu kwa ɓəla shili.

⁷A ɗatə tsa'atsa'a ya jigadəma əngə təkəra hi mangə aku ɗufwa yahi. Nahi ingə nji'inda kwa ta'i ka ya ku ɗanghali Hyel, ma yo ɓwanya təkəra Mafakə Mənakəu, ndara tə mba ya, ndara huɗə nəuma.

⁸Hyel zəndəbiyatə ənda yo nyida hi ana chul nyidar Yesu Kəristi.

⁹Pətlənya ɗa ja, nyida kəhi tsakə mada sakamani, hya tsakə ku dəma ana ngabiya dəhə səu,

¹⁰aka ga hya nau ngabiya sə'inda tsa'atsa'a, aka ma bəji nda Kəristi kwa ɓəla shili ti cha shili həya hi chichinyi a da na vanya sər ngəl wa.

¹¹Ga hya nyabiyadzə ku tlər tsa'atsa'akur nda kwa shili təwa Yesu Kəristi ka ga nja hətə nyi səli nə Hyel ana nja fal nyi.

¹²Ka zama ka kwama, yo i hya zəndəbiya ənda, dəhə sə'inda ɗa naya vala tə ka nja bəzə Mafakə Mənakəu.

¹³Aka dəhə njir ɓəla ki təl ana madawa zəndəbiyatə ənda təkəra Kəristi ngə nja tsau ɗa ku jarum.

¹⁴Ngya ɗa ku jarum nga tə tsətə nyi ɗufəu nə njir nəu ɗanghəu, tə nənda dunamar bəzə mafakə Hyel a da na ləvər wa.

¹⁵Jiri, alenya nji da kwa bəzə mafakə Kəristi ku shishi ana sələkəkur, kəl ja, alenyi tsəu ana ta zhang.

¹⁶Chul nji'inə ngə kwa nyida ɗa, aka a zəndətə nda a təkəra Mafakə Mənakə ngə nja tsau ɗa ku jarum na.

¹⁷Alenya nji ingə tsəu kwa bəzə mafakə təkəra Kəristi ana ikər, a da na ɗufəu mənakə wa. Chim kənda ya tsakətə sa ɓwaɓwatə ku jarum na.

¹⁸Kəl ja ya, a səngə nda kwa mər ngə da sər ɗəngha wa, kəl ja, sənda ndiya, mada'a nə jirijiri ndara gəzhigəzhi, a bəzə tə nji ɓwanya təkəra Kəristi, ya ana əngə ya kwa mər hirgyaɗi, ya yo tsakətə mər hirgyaɗi.

¹⁹A zəndəbiyatə ya, təwa pətlənya kəhi ka ya, ana Shanguɗə Yesu Kəristi kwa vala ɗa, njo dəliya ɗa.

²⁰Chim ɗa gagaɗa ana fəkər, ngwa yada ba'a ngatə kuzhi wa, kəl nda ya ta'i ka Kəristi wi nda ya ghəya tangərma. Yo fə ɗufəu ənda ngya ɗa kwa shili na səli anə Kəristi, mada ana pi ya ndara tətənyi ya.

²¹Ba naya na'a, ma ya ɗa na pi, nacha ngə ngya aka Kəristi, tə tsə'u zhar cha.

²²Ya mangə ya ɗa na pi, yo nau mər tlər nda na sakəda. Əja ya, manə nə yo tabiya? A da ya zəndə wa.

²³Jan kəraya təkəbiya tə dzaɗəu, yo fə ɗufəu ya gi ngya na Kəristi, nacha ngə sənda kwa ndiya ɗa mənakə na'a gagaɗa.

²⁴Kəl ja, a ndiya hi tə vi ya ɗa na pi ku dza.

²⁵Mangə a ngabiya tə ya ənga, a zəndətə ya yo ngya kə'i hi, ka biyama kəhi ana hirgyaɗi ku jirikur kəhi,

²⁶aka ma yada shili da hi səkəu, hyo tsakətə uya sər jalvi aku Kəristi Yesu təwa ɗa.

²⁷Sənda ndiyavi dəhəu, tuku ngya kəhi ɗa wi sənda Mafakə Mənakə Kəristi tə na. Əja, mada ya shili da hi səkəu, ndara mafakə tanyi uya ya təkəra hi, yo zəndi ənda a ta'i təhi na jiri ku Shanguɗə zhang wi ndə zhang hyo ta'i aka jirikur mafakə Kəristi.

²⁸Ngwa hya da ba'a ngatə ləvər njir dawa kəhi pa'a wa. Nacha ngo char ənda nda kwa kuɗa, nahi tsəu hyo uya mbəɗa təwa Hyel tə kərnyi.

²⁹A da ka hya nənyi jiri nə Kəristi tanyi ngə nja nga hi wa, kəl nda ga hya sa ma'a ɓwaɓwatə ka cha tsəu.

³⁰Dəhə mən nə kwa mbadzə na, wi nda la'atə hi mbadzə ɗa yahi, ya zəndətə hi ba'a sakana tsə'uta ɗa kwa.