Read nya huba Filibi 3 Bible Online

Filibi 3 - nya huba bible

Filibi 3

¹Udiyanyi ja ka zamə ɗa, mər ma hirgyaɗi aku Tlakəu. A da ya kwa həɗa na tsəfə sə'inə nə hi səkə wa, ka ga cha ɓəlatə jiri kəhi.

²Gəla ma na həya inga, njir mər sə zazaɓə inga, njir tla dza nda kwa na tuku kəl na nja tla bədzang ka ga nja uya mbəɗa.

³Ya nganə ja, namən inda kwa həsəli təwa Shanguɗər Hyel ingə nji'inda nja tlanda nda bədzang nə jirijiri. Məna kwa ngya ka sənda Yesu Kəristi tə mərtə mən a da mən kwa ta'i ka dzə wa.

⁴Madangə naya na'a kwa nau ya ta'i ka sə'inda nə dza. Macha vanya ndə da kwa la'a wi kwa kina cha fəkər ka sə'inda nə dza, a ndiya nyi tə ya.

⁵Chisə tanyi hanyi ya ma nja tlanda ɗa bədzang. Ndər Isra'ila ya ujiləu, nyandəla Banyami, ndər Ibrani ujiləu, təwa gadlagadla ndər Farisi ya.

⁶Macha ka i tləra, a ɗatə ya məndza'u na njir nəu gagaɗa. Aku nəu gadlagadla tsəu, a nəubiya tə ya tsa'atsa'a, a tləhi da wa.

⁷Haaɗa, yo la'a sə'ingə wi sə dur, kəl ja, a fiya nda tə ya ka sə ɓwa'atanyi sakana, aka sənda Kəristi tə məra.

⁸A sə da ndiya ɗa vi wi ya zəndə Yesu Kəristi Tlakə ɗa wa. Ya fiya dəhə sə ka asar, ga ya zəndə nyi. Aka cha ngə ya tar dəhə səu, ya fiya nda ka sə ɓwa'atanyi, ga ya uya Kəristi,

⁹ya ɗa zhang na cha. A tsə'u ya kwa fəkər da ngya tsa'atsa'akur nda kwa shili təwa nəu gadlagadla wa, kəl nda nda njo uya təwa nənyi jiri nə Kəristi. Aka laku nda kwa mərtə mən tsa'atsa'a kwa hya'atə tsa Hyel ya təwa jirikur.

¹⁰Yo i ya zəndə Kəristi ana ya zəndəbiya gyalkur nda tə hya'andə nyi ku hwa. Yo i ya sa ɓwaɓwatə na cha ga ya ɗa wi na cha ku tah,

¹¹təwa ənga, yo fəkər njo da hya'andə ɗa ku hwa.

¹²A da bəra yo na a wurtə ya uya dəhə sə'ingə ndara a mərtə ɗa tə nji tsa'atsa'a wa, kəl nda yo mbadzə ka biyama, ka biyama ga ya uya sənda Yesu Kəristi tə tabiya ɗa kari.

¹³Ka zamə ɗa, a da bəra a wurtə ya uya sə'ingə wa. Kəl nda sə zhang da ya kwa məra, yo far na sə'inda təra yahi, yo mbadzə ka sə'inda biyama.

¹⁴A mbabiya tə ya dzə ka ya həya mbwa nda məməla hwi nə kwa wur ti, ga ya dləutsə wazəba nda Hyel tə nga ɗa kari təwa Yesu Kəristi.

¹⁵Ba namən inda tə dzangər ku Shanguɗə mən dləukər sə'ina. Macha jigadəma kəhi pam tsəu, Hyel kwa chabiya hi sənda jiri.

¹⁶Sənda tə ndiyavi, nacha ngə ea ma'i biyama ana sənda a wurtə ea uya.

¹⁷Ka zamə ɗa, daɓətə ma kər ka alenya nji ku nəu dərpə ɗa, hya ndzam nji'inda kwa ngya ku laku nda ea dlədləɓətə hi.

¹⁸Tang wi nda ya ɗaka nar hi, yo tsakətə nar hi ana ma'a sələm ku lya ya, ənda alenya nji da kwa mər dawa na taməngəla Kəristi.

¹⁹A tə udiyanyi nda kwa kuɗa, ta nda ngə hyel kənda, kuzhi tsəu səli kənda. Jigadəma kənda təkəra sər dunəya.

²⁰Kəl ja, namən, njir huɗamələm mən mbwa nda Tlakə Yesu Kəristi kwa ngya ti. Tərkus məno səkə Ndər Dləuya cha shili ka dləuya mən.

²¹Gyalkur tsa cha nda cho shili na dəhə sə da kiɗa cha, cho shabiya dza mən nda kwa yiɗa wi nənyi nda na səli.