Read nya huba Filibi 4 Bible Online

Filibi 4 - nya huba bible

Filibi 4

¹Əja ka zamə ɗa nda yo nyida, yo chim ka ya la'a hi, ka bazhi ɗa, ana nahi ngə hirgyaɗi ɗa ana wazəba ɗa, hya ta'i ku Tlakə ja ana dunama.

²Ka Afodiya ana Sintiki, yo gədi hi hya ɓatliya pama hi aku Tlakəu.

³Nakə tsəu bazhi mər tlər ɗa, yo gədi ngha ka vala mahi'i mətlə inga, aka a mərtə nda tlər naya tsa'anyata aku bəzə Mafakə Mənakə anə alenya nji. Əngə ma'a Klement ana alenya nji'inda tləmən nda tsəfətsəfə nyi ku likatəkatə pi.

⁴Mər ma hirgyaɗi wa'atanyi ku Tlakəu, yo tsakətə na, mər ma hirgyaɗi!

⁵Ngyar ma madawa la'a sənamkur kəhi. Kaɗə Tlakə shili.

⁶Ngwa hya da ɗəngha təkəra madami wa, kəl nda hya pətlənya ana gədi təkəra dəhə səu, ana usaku hya dəkarnyi dəhə sənda hyo gwa'a nə Hyel,

⁷təwa ənga Hyel kwa nə hi piyarɗufəu nda kwa ndiya dəhə sənda ndəu kwa zəndi, cho ɓəlatə ɗufwa hi ana jigadəma kəhi aku Kəristi Yesu.

⁸Udiyanyi ja ka zama, hya fətə ɗufwa hi təkəra dəhə sənda jiri, sənda na səli, sənda tsa'atsa'a, sənda chichinyi, sənda njo nyida, dəhə sər fala, dəhə sənda kwa ndiya na mənakəkur ana sənda njo kina fala.

⁹Hya mər tlər na dəhə sənda hya dlədləɓətə ana sənda hya dləutsə tsa ya, ba'a sənda hya ngatə ga la'a tsa ya. Əngə ja, Hyel nda na piyarɗufəu kwa ngya tsa'a nahi.

¹⁰A mər təya hirgyaɗi ku Tlakə gagaɗa aka hya ɓəla char ənda kwa ɗəngha hi naya sakana, madangə kwa ɗəngha hi naya haaɗa kəl lakur char ɗa pa'a hya uya.

¹¹A da bəra yo tiwi tar ngə wa. A dlədləɓətə tə ya ənda yo ngya ana piyarɗufəu aku dəhə sənda ya ghahə na kərɗa kwa.

¹²Nau tə ya ngya ku ɗali ana ku uya. A chul ngya da pa'a ya nau wa, nau tə ya ngya na huɓwa ndara ana nyi, mada sə tsa ya mada səda tsa ya wa.

¹³Yo nau mər dəhə sə təwa Kəristi nda kwa na'a dunama.

¹⁴Dəhə ka ənga, tsa'atsa'a tanyi nda hya vala ɗa aku bəjir ɓwaɓwatə ɗa nda.

¹⁵Wi nda a zəndətə hi tsəu njir Filibi, aku bəji nda ya ghəya bəzə Mafakə Mənakə na, ahir nda ya ngyar Makidoniya, a vanya daɓədzər njir nəu da vala ɗa wa kəl nda nahi.

¹⁶Mada nda ya vu Tasalonika, a lətə ɗa təhi vala, a da zhaka zhang wa ya a mətlə wa.

¹⁷A da ka ga ya uya ga'a tsa hi ngə ya kwa na əngə wa, kəl nda yo i hya uya papa'akur təwa vala nda hya kwa mər nə nji.

¹⁸A kinda ɗa tə hi ndiya matsa ənda hyo kina məra. A səda tar ya wa, mangə a uya təya ga'a nda hya sə Abaforiditus nə na'a. Sər hatəmachi ngə nda kwa shi'uni kwitkwitəu, ga'a nda Hyel kwa ngatə məsəɗakur ni.

¹⁹Hyel ɗa tsəu, kwa nə hi dəhə sənda hyo gwa'a, hya'atə ku səlir bwaɓəkura uya nda tsa cha aku Yesu Kəristi.

²⁰Səli ngya tə nə Hyel ana Adan mən ba'a ba'anawa. Aɗəmja.

²¹Hya usar ɗa dəhə nji chichi inda ku Kəristi Yesu. Ka zama inda ka ya tangna kwa usa hi.

²²Dəhə nji chichi kwa usa hi, a da wi nji'inda atə patla Kaisar ma'a wa.

²³Papa'akur Tlakən mən Yesu Kəristi cha ngya tsa'a nahi. Aɗəmja.