Read nya huba Kolosi 4 Bible Online

Kolosi 4 - nya huba bible

Kolosi 4

¹Nahi kə'i tlakəu, nənya ma nə mavi'i kəhi sənda nda kwa kina uya ana sənda tsa'atsa'a, hya ɗənghatə ənda ma'a nahi Tlakən hi da kya huɗamələm.

²Hya pətlənya wa'atanyi, təwa pətlənya hya ngya na ɓəla ana usaku nə Hyel.

³Hya pətlənya ka ea tsəu nə Hyel ənda eo ɗana uya lakur bəzə mafakə sə ɗəwaɗəwa nda təkəra Kəristi, aka nacha na gwa'atə təya ku jarum.

⁴Hya pətlənya ənda yo ɗana dəkəbiya mafakə nə tə babal, wi nda yo kina məra.

⁵Hya ngya na dəma ku sənda hyo məra ku huɗa nji'inda pa'a njir nəuwa, hya mər tlər na kala bəji nda hya uya.

⁶Ɓwanya kəhi cha ɗa na papa'akur nda kwa ɗa məsəɗakə nə nji, ka ga hya nau wum nə madawa.

⁷Tsəu Tikikus dəkar hi dəhə sənda tə ɗa naya. Zamən mən ngə nda məno nyida gagaɗa, ya ndər vala nda njo dləukər nga, bazhi mavakur ɗa tsəu ku Tlakəu.

⁸Sənda gwa'atə yo sənyi yada hi ga cha yi dəkar hi ənda ea tangna, ga cha tsətə hi ɗufəu.

⁹A ngə cho yi nanda na Onisimus zama nda məno dləukər nə ana nda məno nyida gagaɗa, zhang ku huɗa hi cha, nda kwa yi dəkar hi dəhə sənda kwa ɗa tangna.

¹⁰Aristakus nda ku jarum a naya kwa na nja usa hi, əngə tsəu Markus nda aji zhang na Barnabas. (Nacha nda ya nar hi hya dləutsə na hirgyaɗi macha shili dahi.)

¹¹Joshua nda njo nga Yustus, nacha ma'a cho usa hi. Nji'inə tanyi ngə njir Yahuda nda ku huɗa nji'inda ea kwa mər tlər təlkur Hyel kə'iri, ya fətə ɗa tənda ɗufəu 'ual'ualəu.

¹²Abafaras, zhang ku huɗa hi, ya mava Kəristi Yesu kwa usa hi. Wa'atanyi cha kwa mbadzə kə'i hi ku pətlənya, ənda hyo ɗana ngya tsa'atsa'a, hya nyabiya, dəhə sənda Hyel kwa i.

¹³Yo dəkar hi təkəɗəu, a mərtə cha tlər 'ual'ual kə'i hi, ana tsəu ka njir nəu nda vu Laudikiya ana Hirapolis.

¹⁴Luka nda məno nyida ndər zəndə kuzəkəu, ana Dimas, kwa usa hi.

¹⁵Hya usa ɗa dəhə njir nəu nda vu Laudikiya ana Nimfas ka njir nəu nda kwa daɓədzə ku ki nyi.

¹⁶Ma hya wur na kəratsən mafakə na, hya ta'i tsəu kəl na nji kəratsəntə nyi nə njir nəu nda vu Laudikiya. Nahi tsəu, hya kəratsəntə mafakə nda ya tsəfətə nyi nə njir Laudikiya nda.

¹⁷Ana hya nar nyi nə Arkibus “Fəu kərakə ku tlər nda ka dləutsi, tsa'aka ko nau nyabiya tlər nda Tlakə tə nə ngha.”

¹⁸Naya Bulus nə tə tsəfə mafakə usa nə na cha ya. Hya ɗənghatə ənda ku jarum naya. Papa'akur Hyel cha ngya tsa'a kə'i hi.