Read nya huba 1 Tasalonika 1 Bible Online

1 Tasalonika 1 - nya huba bible

1 Tasalonika 1

¹Hya'ati tsa Bulus ana Sila ba'a Timtawus, yada njir nəu inda vu Tasalonika, nda nə Hyel Ada ana Tlakən mən Yesu Kəristi. Papa'akur ana piyarɗufəu cha ngya tsa'a nahi.

²Mada sakamani ea kwa usaku Hyel aka hi dəhəu, ətsəu, ea kwa pətlənya kə'i hi kala bəji.

³Ea kwa ɗənghatə na ənda hyo mər tlər na jirikur kəhi a mar Hyel Adan mən ana chulkə mbadzə nda hya məra nə nyida, ana fəkər kəhi nda na səsə'u ku Tlakən mən Yesu Kəristi.

⁴Ka zama nda Hyel kwa nyida, a zəndətə ea ənda Hyel ngə tə tabiya hi,

⁵aka mafakə kəea tə shili nə hi a da na ɓwanya tanyi wa, kəl ja, ana ma'a gyalkur, ana Shanguɗə Karti, ba'a fəkər pa'apa'anyi. A zəndətə hi chulkə ngya nda ea ngya ku pama hi aka hi ngani.

⁶Ngə hya ɗa njir dlədləɓə na ea ana Tlakəu, hya dləutsə mafakə ana hirgyaɗi nda Shanguɗə Karti kwa shili ni, madangə satə hi ɓwaɓwatə 'ual'ualəu.

⁷Təwa əngə hya ɗa sər ba'ada nə njir nəu inda tə hə'i Makidoniya ana Akaya.

⁸Aka atsa hi ngə ɓwanya Tlakəu tə wiɗətədza, ya a da kəl tə hə'i Makidoniya ana Akaya tanyi wa, ma'a ba'amani a zəndətə nji jirikur kəhi ku Hyel, a da kəl ea na wa.

⁹Aka nji ngə tə kərnənda kwa na chulkə dləu ea nda hya dləu ea, ana ənda hya təkə na katəu hya ɓəl shili da Hyel, aka hya hətə nyi səli nə Hyel nda na pi,

¹⁰ətsəu, hya səkə shilir zər nyi hya'ati kya huɗamələm. Hyel tə hya'andə Zər nyi ku hwa, nacha ngə Yesu nda mbəɗandə mən tsa huɗətlar Hyel ngo shili nga.