Read nya huba 1 Tasalonika 2 Bible Online

1 Tasalonika 2 - nya huba bible

1 Tasalonika 2

¹Kwa zəndə hi ka zama, ənda shili kəea dahi da ɓwa'atanyi wa.

²Madangə, wi nda hya zəndə a wurtə ea sa ɓwaɓwatə ana həyatəvi a hi Filibi, kəl ja, ana vala Hyel a bəzə təea Mafakə Mənakə nə hi, madangə a ɗatə nji məndza'u naea 'ual'ualəu.

³Aka a shakər da ku mafakə kəea, ndara jigadəma ɗimi ndara kwakunakur wa.

⁴Kəl ja, wi nji'inda Hyel tə dləukər ni, cha nə ea tlər bəzə Mafakə Mənakəu, ya əngə tanyi eo dəka aka a da eo gwa'a ka ea mərtə ɗufwa ndə twas wa, kəl nda nə Hyel nda tə dzətə ɗufwa ea.

⁵Wi nda hya zəndi, a da ea shili na ɓwanya məsəɗakə wa, ya tsəu Hyel zəndəti, a da gwa ngə ea mbukər təkəra huɓursə wa.

⁶A da abəra eo gwa'a fal tsa nji, mada tsa hi ndara alenya nji wa. Madangə kwa nda ea nau mər tlər na gyalkur nə changhabalkur kəea ka gwa'a vala tsahi.

⁷Kəl ja, ea ɗa na sənam ku pama hi, wi ngətə ama kwa tsamartə nguli nyi.

⁸Ea nyidatə hi gagaɗa nda a da Mafakə Mənakə nə Hyel tanyi ea dəkar hi wa, kəl ja, ea sənda pya ea ka hi, aka a səya təhi tə ɗufwa ea gagaɗa.

⁹Ka zama kwa ɗənghatə hi tləra ana ɓwaɓwatə nda ea sa! Ea mər tlər vu'i na pəchi atsa ea da fəkənyi tədəɓəkur kəea təkəra madawa ku pama hi ku bəji nda eo bəzə Mafakə Mənakə Hyel nə hi.

¹⁰Nahi təkərnəhi la'ati, Hyel la'atə tsəu, chulkə ngya nda ea ngya karti, ngya tsa'atsa'a, ya kəla bikəu ku pama hi nahi njir nənyi jiri.

¹¹Wi nda hya zəndi, ea nəu nahi wi ngətə ada kwa nəu na nguli nyi.

¹²Ea tsə ɗufwa nə hi, ea fətə hi ɗufəu, ea gədi hi ənda ngya kəhi cha ɗa mənakə nə Hyel, nacha nda nga hi gu təlkur nyi ana səli nyi.

¹³Aka əngə eo usaku Hyel kala bəji aka hi, aka ku bəji nda hya dləutsə ɓwanya Hyel nda hya ngatə tsa ea, a da hya dləutsə wi ɓwanya ndə cha wa, kəl nda wi nda cha nda, nacha ngə ɓwanya Hyel, nda kwa mər tlər ku ɗufwa hi nahi nda tə nənyi jiri.

¹⁴Aka nahi ka zama, a ɗa təhi njir dlədləɓə njir nəu Hyel inda tə hə'i Yahudiya, nji'inda ku Kəristi Yesu, a satə hi ɓwaɓwatə tsa njikə hi, wi nda njir nəu inda tə sa ɓwaɓwatə tsa njir Yahuda.

¹⁵Njir Yahuda ngə tə tsəya Tlakən mən Yesu ga kuɗənda njir mətakər, nda gədlənda ea tsəu. Nda kwa tla huɗa Hyel gagaɗa! Nda kwa tlə mwali nə dəhə nji!

¹⁶Nda kwa ka ea tsa ɓwanya nə nji'inda pa'a njir Yahuda tsa nda da uya mbəɗa. A təkəra əngə nda kwa nyabiya kyawa dəkə səpəla'a kənda. Kəl ja, hya zəndə huɗətla Hyel wurtə səya təkəra nda.

¹⁷Ka zama, aku bəji nda nja təkəbiya mən kə'i hi nə zər bəji kushi tanyi, nacha ngə təkə ku dza a da ku ɗufəu wa, ea kwa chima ea kwa gwa'a laku nda eo ɗana la'a hi li na li.

¹⁸A chim tə ea, ea yada hi a da na kərmətlə wa. Naya Bulus təkərɗa ma'a a mbatə ya dzə ka ya yada hi a da zhaka zhang wa, ya a mətlə wa, kəl ja, Shantan tə katə ea.

¹⁹Aka mi ngə sər fəkər kəea, ana sər hirgyaɗi kəea, ana tsəu sər wovi kəea mar Tlakən mən Yesu atə pəchir shili nyi, macha a nahi wa?

²⁰Nahi ngə sər wovi kəea ana sər hirgyaɗi kəea.