Read nya huba 1 Tasalonika 3 Bible Online

1 Tasalonika 3 - nya huba bible

1 Tasalonika 3

¹Aka manda a tsə'u eo nau səsəutə wa, ea la'a a ndiyatə vi nja ngya ea səkə ea vu Atina.

²Ea sətə Timtawus zamən ea, nda bazhi mər tlər Hyel nə bəzə Mafakə Mənakə nə Kəristi, aka ga cha yi tsakətə hi dunama ana cha tsətə hi ɗufəu ku jirikur kəhi,

³aka tsa vanya ndə da sha tsa məngya nyi ana dzə ina. A zəndətə hi təkəɗə ənda sə wi ngə ɗatə tuku manə mən.

⁴Aku bəji nda ea kə'i hi ea kwa dəkə nə hi wa'atanyi ənda njo da ɗa məndza'u na ea. Ya a ɗati ənga, wi ngə zəndə hi nga.

⁵Aka əngə ja, ma nda a yo nau səsəutə wa, ya səa aka ga ya zəndəbiya jirikur kəhi. Ana ləvər ya, ənda ndər dzə ndə nga kwa nau ɗa cho dzə hi ya tlər kəea kwa ɗa ɓwa'atanyi.

⁶Kəl ja, Timtawus shili tə da ea na Mafakə Mənakə təkəra jirikur kəhi ana nyida nda hi ni. Cha nar ea ənda kwa ɗənghatə hi ana hirgyaɗi ənda ea yi da hi, ya hyo chim hya la'a ea gagaɗə wi nə eo chim la'a hi na.

⁷Aka əngə ja ka zama ana piyarɗufəu ea ku ɓwaɓwatə ana məndza'u nə eo sa na, aka jirikur kəhi kwa fəɗufəu nə ea.

⁸Aka sakana tsa'anyata ana pi ea, ma nda ta'ita'inyi hi ku Tlakəu.

⁹Wi aman eo nyabiya usaku kəea nə Hyel ana hirgyaɗi nda ea nə mar Hyel kəmən ka hya?

¹⁰Vu'i na pəchi ea kwa pətlənya tsa'anyata ka ea la'a hi səkəu, aka ea nə hi sə'inda tar hi ku jirikur kəhi.

¹¹Sakan ja chim kəea nacha ngə Hyel nda Adan mən na kərnyi ana Tlakən mən Yesu, cha mbəɗiya laku ka ea uya yi da hi.

¹²Ngwa Tlakə tsakətə nyida kəhi cha ɗa bwaɓu aka kərnəhi ana aka madawa, wi nə tə nəkə ea a nə hi.

¹³Cha fətə hi ɗufəu ka hya ɗa kəla bikəu ana nji karti mar Hyel Ada ku bəji nda Tlakən mən Yesu kwa shili kə'i nji karti.