Read nya huba 1 Tasalonika 4 Bible Online

1 Tasalonika 4 - nya huba bible

1 Tasalonika 4

¹Udiyanyi ja ka zama, a nar hi tə ea hya ngya nda Hyel kwa i, ya kwa mər hi ənga. Sakan ja, eo gədi hi ana tsətə hi ɗufəu aku Tlakə Yesu, hya biyama na mər ənga.

²Aka a zəndətə hi chulkə tsaubar nda ea nə hi təwa gyalkur Tlakən mən Yesu.

³Chimər Hyel ja, hya ɗa karti, ənda hyo tyatinda kasalikur.

⁴Kala ndə zəndə ənda cho ɓəlatə dza cha aku laku karti ana səli,

⁵a da na mwaɓər dzə wi njir nəu katə ingə wa, nji'inda a da kwa zəndə Hyel wa.

⁶Ana əngə ja, ngwa vanya ndə da zandə nyi sə nə kuvanyi ndara cha ɗiya nyi wa. Tlakə kwa tlanda nyi nəuma nə nji təkəra chul səpəla'a inga, wi nda ea nar hi ga təɗəhima hi təkəri.

⁷Aka a Hyel da nga mən ka ngya ku hiɗahiɗakur wa, kəl nda, ka məna ngya ku kartikur.

⁸Aka əngə ja, ndə nda tə ngyar tsaubar na, a da ndə ngə ngyar cha wa, Hyel ngə ngyar cha, nda nə hi Shanguɗə Karti.

⁹Sakana ja, a təkəra nyida dza, a da kəl ea tsəfə nə hi təkər wa, aka nahi na kərnəhi Hyel dlədləɓətə hi tə hya nyida kərnəhi.

¹⁰Wi ngə kwa nyida hi dəhə ka zama tə hə'i Makidoniya. Dəhə ka ənga eo gədi hi ka zama hya tsakətə nyida.

¹¹Hya mbadzə ənda hyo ɗa na ngya kərə'u, hya mər sənda manə hi tanyi, hya kwa mər tlər na cha hi wi nda ea na hya məra.

¹²Təwa ənga hyo ɗa na səli mar nji'inda a da njir nəu wa, ya tsə'u a da hyo ngya ka ndə wa.

¹³Ka zama, a da eo i hya ɗa na tar zəndə təkəra nji'inda kuɗa, ndara hya mər huɗətla wi nda alenya nji'inda pa'a na fəkər kwa mər wa.

¹⁴A nənyi tə mən jiri ənda Yesu tə tah ga hya'atə səkəu, ana ənga a nənyi tə mən jiri ənda Hyel kwa fa'a njir nənyi jiri inda kuɗə sha huɗamələm tsa'aka Yesu.

¹⁵Ea kwa nar hi sənda Tlakə tə na bəra, namən nda tsə'uta mən na pi pəshinda Tlakə kwa ɓəla shili, a da namən kwa ghəya hya'ati tsa nji'inda kuɗə wa.

¹⁶Aka Tlakə na kərnyi kwa səya kya huɗamələm ana kurakə dzəgam dzəgaməu, ana kuraka gau chama, ana tsəu kurakər tələm Hyel. Nji nda kuɗa ku Kəristi nanda kwa ghəya hya'atə tangərma.

¹⁷Ahir nga, namən nda tsə'uta mən na pi ku bəji nga, njo hətə mən tsa'a kanda sha ku ləmbəkəu, ka məna ɓə na Tlakə biya huɗamələm, məno ngya ka Tlakə ba'anawa.

¹⁸Aka əngə ja hya fətənyi ɗufəu nə kərnəhi na ɓwanya nga.