Read nya huba 1 Tasalonika 5 Bible Online

1 Tasalonika 5 - nya huba bible

1 Tasalonika 5

¹Sakan ja ka zama, a da kəl ea tsəfə nə hi təkəra bəji ana hanyi wa,

²aka a zəndətə hi təkəɗəu ənda pəchir Tlakə kwa shili wi ndər həl əvu'i.

³Aku bəji nda nji kwa na ənda “piyarɗufəu da ya ləvər da wa,” kəl tah kwa ghahəya nda wi ngə tə ɓəlakərya kwa ghahəya mala huɗəu, ya a da nda kwa nau mbəɗə tsar wa.

⁴Kəl ja, nahi ka zama, a da hi ku kutlə pəlakər bəji ngo ghahəya hi wi ndər həl wa.

⁵Dəhə hi nguli vimbəlmbəl hi nə puchi. A da mən nə vu'i ndara nə kutlə wa.

⁶Aka əngə ja, ngwa məna da ɗa wi alenya nji'inda kwa njihanyi wa, kəl ja, mən ngya na ɓəla ana ngya kərə'u.

⁷Aka nji'inda kwa njihanyi kwa njihanyi vu'i, ana nji'inda kwa wi na mbadla kwa wi vu'i.

⁸Kəl ja, manda nə vimbəlmbəl mən, məna ɗa kərə'u, məna pəndzə jirikur ana nyida ka ləkutə pa kəmən, ana fəkər uya mbəɗa ka mavəkə kəmən.

⁹Aka Hyel da tabiya mən ka məna sa ɓwaɓwatər huɗətla wa, kəl nda məna uya mbəɗa təwa Kəristi Yesu.

¹⁰Cha tə ka mən aka mada ana pi mən ndara kuɗəkuɗənyi mən, məno ngya tsa'a kə'i cha.

¹¹Aka ənga, hya fətənyi ɗufəu nə kərnəhi ana hya tsakətə nyi dunama nə kərnəhi, wi ngə hya kwa mər nga.

¹²Sakan ja, eo gədi hi ka zama, hya nənyi səli nə nji'inda kwa mər tlər tsa'anyata ku pama hi, nji'inda təkəra hi ku Tlakəu, ana nji'inda kwa dəkə dəma nə hi.

¹³Hya gəzəya nda ana dəgalər səli ku nyida aka tlər kənda. Hya ngya na piyarɗufəu na kala ndəu.

¹⁴Ana eo gədi hi ka zama, təɗə ma himi nə njir ngya ɓwa'atanyi ku pama hi, hya tsəɗufəu nə njir ləvəra, hya vala nji təutətəuta, hya səsəu kala ndəu.

¹⁵Hya gəla, ngwa madawa cha ki ɗimikur na ɗimikur wa, kəl ja, wa'atanyi hya mbadzə na mər mənakəkur nə kərnəhi ana kala ndəu.

¹⁶Hya ngya na hirgyaɗi mada sakamani,

¹⁷hya pətlənya wa'atanyi,

¹⁸hya ɗa na usaku ku kala səu, aka nacha ngə sənda Hyel kwa i nahi ku Kəristi Yesu.

¹⁹Ngwa hya da katə tlər Shanguɗə wa,

²⁰ngwa hya da həyatə ɓwanya takər wa.

²¹Hya dzətə kala səu. Hya ta'i təkəra mənakəkur.

²²Hya təkəna kala ɗimikur.

²³Hyel təkərnyi, Hyel nda na piyarɗufəu, cha chinda hi pyasəu. Ga dəhə shanguɗa hi ana mambəl kəhi ba'a dza hi cha ngya kəla bikəu tsa'a tə bəji nda Tlakən mən Kəristi Yesu kwa ɓəla shili.

²⁴Ndə nda tə nga hi, ndər jiri cha, ya cho mərti.

²⁵Ka zama hya pətlənya ka ea.

²⁶Hya usar ka zama ana gaɓədzə karti.

²⁷Yo tsau hi bar ana gyalkur Tlakə ənda hya kəratsəntə nyi mafakə na nə dəhə ka zama.

²⁸Papa'akur Tlakən mən Yesu Kəristi cha ngya tsa'a nahi.