Read nya huba 2 Tasalonika 1 Bible Online

2 Tasalonika 1 - nya huba bible

2 Tasalonika 1

¹Hya'atə tsa Bulus ana Sila ba'a Timtawus, yada njir nəu inda hi Tasalonika aku tləmər Hyel Adan mən ana Tlakə Yesu Kəristi:

²Papa'akur ana piyarɗufəu hya'atə tsa Hyel Ada ana Tlakə Yesu Kəristi, cha ngya tsa'a nahi.

³A kiti ea usaku Hyel aka hi ka zama kala bəji, ya a ɗati tsa'atsa'a ənga, aka jirikur kəhi kwa həa ka biyama ka biyama, ana nyida nda kala ndə ni a nə madawa kwa tsaka.

⁴Aka ənga ja, aku huɗa njir nəu Hyel ea kwa wovi na səsəu kəhi ana jirikur nda hi ni ku dəhə ɗa məndza'u ana dzə nda hyo səsə'ua.

⁵Dəhə sə inga a chartə ənda nəumar Hyel tsa'atsa'a cha, ya ana ənga njo jiga hi ku huɗa nji'inda kwa kina təlkur Hyel, aka nacha ngə hyo sa ɓwaɓwatə kari.

⁶Hyel ndər mər sə tsa'atsa'a cha cho kinda nji'inda kwa nə hi ɓwaɓwatəu ana ɓwaɓwatəu

⁷ana cho nə hi ɓəlsar tsa ɓwaɓwatə kəhi, ana naea tsəu. Sə'ingə dəhə kwa ɗa ma bəji nda Tlakə Yesu tə chabiyadza, hya'ati kya huɗamələm ku hu'u gəɗəgəɗa, ana chama nyi inda na gyalkur.

⁸Cho nənyi ɓwaɓwatə nə nji'inda pa'a da zəndə Hyel, ya a da nda nəu sənda Mafakə Mənakə nə Tlakən mən Yesu tə na wa.

⁹Njo nənda ɓwaɓwatə nda ba'anawa ana njo hənda nda tsa huɗəma Tlakəu ana tsa səlir gyalkur nyi,

¹⁰a tə bəji nda cho shili tə aka nja hətə nyi səli aku nji karti nyi ana njo mər sər muniya nə ku pama dəhə nji'inda tə nənyi jiri. Aku huɗa nda hi, aka nənyi təhi jiri nə ɓwanya kəea.

¹¹Ana ənga ku jigadəma, ea kwa pətlənya kala bəji aka hi, ənda Hyel kəmən cha mərtə hya ɗa tsa'atsa'a ka nga hi nda nja nga hi, ana ənda təwa gyalkur nyi cha nyabiya kala sə mənakə nda cha hari kə'i hi ana tlər nda jirikur kəhi tə mərti.

¹²Eo pətlənya ənga aka ənda tləmər Tlakən mən Yesu cha ɗana səli təwa ngya kəhi, ya hyo ɗa na səli kə'i cha təwa papa'akur Hyel kəmən ana Tlakə Yesu Kəristi.