Read nya huba 1 Timtawus 2 Bible Online

1 Timtawus 2 - nya huba bible

1 Timtawus 2

¹Tangərma ja, ya kwa nar hi hya pətlənya ka dəhə nji, Hya gədi Hyel ana hya usaku nyi ka nda,

²hya pətlənya aka ka təl i ana nji'inda na gyalkur təkəra nji aka ga məna ngya mənakəu ana piyarɗufə ku ləvər Hyel.

³Nacha ngə sənda mənakəu, ya Hyel Ndər Dləuya mən, kwa mər hirgyaɗi ni.

⁴Nacha nda kwa i dəhə nji nda uya mbəɗa, ana nda zəndə jiri.

⁵Aka Hyel zhang, ndə nda tə ta'i ku pama Hyel ana nji tsəu zhang, nacha ngə Kəristi Yesu.

⁶Nacha təkərnyi ngə tə pəliya dəhəkura nji. Nacha ngə Mafakə Mənakə nda nja chabiya tə bəji tsa'atsa'a.

⁷Ya nacha ngə sənda gwa'atə nja tabiya ɗa ka ndər bəzə mafakə ana changhabal. Ya ɗa ka ndər dlədləɓə nəna mafakə təkəra jirikur ana jiri nə nji'inda pa'a njir Yahuda. Jiri nə ya kwa dəka a da gəzhi nə ya kwa tla wa.

⁸Aku kala vi pətlənya, ya kwa i shili, nda hatə nyi cha nda nə Hyel ku pətlənya, ngwa huɗa nda da tla, ndara nda kəpal wa.

⁹Ya kwa i mahi'i tsəu, nda gəla na ɓatlə kənda, nda pəndzə dzaki nda ki, ngwa nda ngya ka ɓatlə shishi kənda na sə mbəlmbəl wi ka bəjingha ndara nda pəndzə dzaki nə gaɗagaɗa nda njo ɗəl na kwaba 'ual wa.

¹⁰Kəl nda ana tlər mənakə wi sənda ndər nəu Hyel kwa kina məra.

¹¹Ngwa mahi'i da dlədləɓə na nya nda mbim wa, kəl nda ana həyakər.

¹²A da ya nənyi laku nə mahi'i nda dlədləɓə nə shili, ndara nda ɗa dəgal təkəra nda wa, kəl nda nda bəgə ɗiu, nda səhimi.

¹³Aka Adamu ngə Hyel tə ghəya mərtə tangərma, təvi cha nda mər Hawa'u.

¹⁴Ya a da Adamu ngə sərtakə tə shandə nyi kər wa, kəl nda malakə ngə cha shandə nyi kər ngə cha ɓəlnda gadlagadla Hyel, ga ɗa ndər bikəu.

¹⁵Dəhə ka ənga malakə kwa mbəɗa təwa yah ngulisha'a, macha ngya ku jirikur ana nyida ana kartikur mar Hyel, ana ɓəlatə kərnyi.