Read nya huba 1 Timtawus 3 Bible Online

1 Timtawus 3 - nya huba bible

1 Timtawus 3

¹Ɓwanya təkəɗə na, ma ndə kwa chim ka cha ɗa gau təkəra njir nəuwa, tlər durdur ngə cha kwa chima.

²Ndə nda gau təkəra njir nəuwa cha ɗa, ndə kəla bikəu, ndər mala zhang, ndər chinda kərnyi, ndər ngya na dəma, ndə nda kwa ɓəlatə ki nyi, ndə nda kwa dləu mihiɓi na hirgyaɗi, ndə nda kwa nau dlədləɓətə nyi sə nə alenya nji.

³Ngwa cha da ɗa ndər sa mbadla, ndara ndər gwa'a pa wa, cha ɗa ndər səli, a da ndə nda kwa nyida guhi wa, ndə kəla nyida kwaba tsəu.

⁴Cha ɗa ndə nda kwa gəlatə nji'inda ku ki nyi, kwa tsamartə nda mənakəu. Ndə nda nguli nyi ɓuɓunyi kwa ngatə nya cha.

⁵Ma'a ndə da nau tsamartə nji'inda ku ki nyi mənakəu wa ya, aman cho ɗana nau ɓəlatə njir nəu Hyella?

⁶Ngwa cha da ɗa ndə nda təka dləutsə Yesu wa, cha da bukər nyi cha dla, nja tlanda nyi nəuma wi nə sərtakə nda.

⁷Cha ɗa tsəu, ndə nda mada nji'inda pa'a ku huɗa njir nəu kwa la'a səli nyi, cha da gwa ku sər kuzhi cha dla ku ləbam sərtakəu.

⁸Əngə tanyi nji'inda nja ɗəmtsə ka vala ku huɗa njir nəuwa, nda ɗa nji'inda kwa mər tlər na jiri, ngwa nda da ɗa nji da kwa pə nya mətləu wa, ngwa nda da ɗa njir sa mbadla, ndara njir nyida kwaba wa.

⁹A ɗatə tuku nda gəzəya jirikur nda Hyel tə chabiya, ana jigadəma mənakəu.

¹⁰Təvi hyo ɗəmtsə nda, tangərma hya dzar nda, ma hya la'a sə da ɗimi ku ngya kənda ja wa, hya dzəgwa fəkə nda təkəra tləra.

¹¹Əngə tanyi mahi'i kənda tsəu, nda ɗa ka nji'inda na səli, a da njir nya zazaɓə wa. Tuku nda ɗa njir chinda kərnənda, nda ɗa na jiri ku dəhə səu.

¹²Ndər vala ku huɗa njir nəu tsəu, cha ɗa ndər mala zhang, ndə nda kwa nau tsamartə ki nyi, kwa gəlatə ngulisha'a nyi mənakəu.

¹³Nji nda kwa mər tlər kənda mənakə ku huɗa njir nəuwa, kwa uya səli tsa nji, ya nda kwa nau ɓwanya tə babal təkəra jirikur kənda ku Kəristi Yesu.

¹⁴Ya kwa tsəfə sə'inə nə ngha, madangə ya kwa fəkər ka ya dakə kacha'ana

¹⁵aka ma nja finda ɗa, ka zəndə ənda nji kwa kina nəuna kərnənda ku ki Hyel, nda nacha ngə daɓədzər njir nəu Hyel nda na pi, nda shimbal ana ngilangha jiri.

¹⁶A kəpal da təkəra sə ɗəwaɗəwa dəgal nda ku lakur nəu Hyel kəmən wa. Kəristi tə chabiyadza, ku dzə wi ndəu, Shanguɗə Karti tə chabiya ənda tsa'atsa'a cha, ngə chama Hyel tə la'a nyi, ga bəzəya nyi nə dəhə nji, ngə nja nənyi jiri ku dunəya, ngə nja hətə nyi sha huɗamələm ku səli.