Read nya huba 1 Timtawus 4 Bible Online

1 Timtawus 4 - nya huba bible

1 Timtawus 4

¹Shanguɗə Hyel tə dəkar mən tə babal ənda ku bəji batəbatə alenya nji kwa shandə nyi yi nə jirikur nə jiri, nda kwa həsəli nə shanguɗə gəzhi ana dlədləɓə nə kwadzaɓi.

²Ngəna dlədləɓə i kwa shili təwa shakər nə njir tla gəzhi, nji'inda jigadəma kənda kuɗəkuɗənyi kurpəu.

³Chul nji inga kwa dlədləɓə nə nji ənda, hədza ana səm alenya sərsum da tsa'atsa'a wa. Kəl ja, Hyel tə mər sərsum ka ga nja səma, a hir njir nəuwa, nji'inda tə zəndə jiri tə pətlənya nə usaku.

⁴Dəhə sənda Hyel tə məra mənakə cha, sə da nda tatlər nja ngyar wa, kəl ja, dəhə sə nja dləutsə na pətlənya ana usaku,

⁵aka təwa ɓwanya Hyel ana pətlənya, Hyel kwa dləutsə dəhə səu.

⁶Ma ka dlədləɓətə nyi əngə nə njir nəuwa, ka kwa ɗa ka mava mənakə nə Kəristi Yesu, ma ko ngya təwa shanguɗə ku jirikur wi nga, ko həa ku ɓwanya ngha ana dlədləɓə nə jiri.

⁷Ngwa ka ɗinya bəji təkəra kəpal ɓwanya kəla kər nda pa'a nə Hyel wa, ka ɓutə kərnghə na mənakəkur chul nə Hyel.

⁸“Ɓu nda ndə kwa mər nə dza cha nda njo la'a mənakə cha, kəl ja, ngya chulkə nə Hyel ndiyatə sakəda, aka kwa gwa'atə papa'akur ku ngya nə sakana, ana nda biyama.”

⁹Ɓwanya nga təkəɗə cha, ya ɗatə tsa'atsa'a nja dləukəri.

¹⁰Nacha ngə sənda gwa'atə məno mər tlər tsa'anyata, məna kwa mbadza, aka fətə tə mən kər da Hyel nda na pi, nda Ndər Dləuya dəhə nji, a da wi nji tə nənyi jiri ma'a wa.

¹¹Ka tsau nda bar ana ka dlədləɓətə nda sə'ina.

¹²Madangə kə zər ngwa ka da i nja həyatə kə wa. Kəl ja, ka ɗa ka sər ba'ada ana sər dlədləɓa nə njir nəuwa, ku ɓwanya ngha, sənda ko məra, nyida ngha, jirikur ngha, ana ngya chaməu.

¹³Təvi yo yi, ka kəratsəntə likatəkatə Hyel na nə nji tə babal, ka dəkətə nda Mafakə Mənakəu, ka dlədləɓtə nda.

¹⁴Ngwa ka da ngyar ga'ar Shanguɗə Karti ngə ka dləutsə təwa ɓwanya mətakər nda nja pə təkəra ka, ku bəji nda njirawawa'a nə njir nəu tə fəkə nghə chi wa.

¹⁵Ka nənyi dəhə jigadəma ana kərnghə nə sə'inga, ga madawa la'a ənda ko biyama.

¹⁶Ka ɓəlatə kərngha ana sənda ko dlədləɓə nə nji, ka mər əngə wa'atanyi, təwa ənga ko mbəɗandə kərngha ana nji'inda kwa səhimi da ka.