Read nya huba 1 Timtawus 6 Bible Online

1 Timtawus 6 - nya huba bible

1 Timtawus 6

¹Dəhə nji'inda ku mavakur nda hətə nyi səli nə tlakən nda, atsa nji da pə ɓwanya ɗimi təkəra tləmər Hyel ana dlədləɓə kəmən.

²Ngwa mavi'i nda tlakən nda njir nəu Yesu da həyatə tlakən nda bəra, aka ma'a nanda njir nəu nda wa. A təvəra ənga, nda tsakətə mbadzər mər tləra, aka njir nəu inda kwa nyida ngə kwa uya sakədar tlər kənda, sə'inə ngə sənda hyo kina dlədləɓə nə nji.

³Dəhə ndə nda tə dlədləɓətə nyi vanya laku pam nə nji, ya a da cha dləukər ɓwanya jiri nə Tlakən mən Kəristi Yesu ana dlədləɓə lakur nəu Hyel kəmən wa,

⁴həkəra kərnyi zhaliya nyi ti, ya sə da zəndə cha wa. Jigadəma pəla'akur zhaliya nyi tə ga sətə nyi tə guhi ana kəpal təkəra ɓwanya, nda kwa shili na sələkəkur ana huɗətla, ngəl ndəu, jigadəma ɗimi təkəra ndəu,

⁵ana kəpal ka nji'inda na jigadəma pəla'a, nji'inda jiri da ku nya nda wa. Nda kwa har ənda nəu Hyel ngə lakur uya gəna.

⁶Kəpal da wa, gəna da 'ual ku nəu Hyel, anə ndə nda ɗufwa cha twas ana sə nda cha uya.

⁷Aka sə da məna shili nə tə dunəya wa, ya əngə tanyi tsəu sə da məno biya nə kwa wa.

⁸A ka əngə ja, ma məna kur uya sərsuma, ana sər handzi, ngə ma'a nji mən ti.

⁹Kəl ja, nji'inda kwa gwa'a ka nda ɗa ka njir gəna, a da nda kwa ta'i na gwa ku sərmbukə wa, ya ləbam nə ɗimiɗiminya mbukər dzə pampam kwa səya nda, kwa təɗəu nda yo səuwa, kwa fəu nda gu hu'u.

¹⁰Aka nyida kwaba ngə hya sənda kwa shili na dəhəkura ɗimikur. Ya mwaɓər kwaba ngə tə gwa'atə alenya nji tə tyatə tsa lakur jirikur, ga gwa'atə nda huɗətla ɗimiɗimi.

¹¹Kəl nakə ja mava Hyel, ka təkəbiya kər na dəhə səɗimi ina, ka fəu kərakə ku gwa'a tsa'atsa'akur, jigadəma nə Hyel, jirikur, nyida, səsə'ua, ana həyakər.

¹²Mbadzə nghə cha ɗa ka nə jirikur, ka gəzəya pi nda ba'anawa, nda nja nga nghə kari, aku bəji nda ka pəbiya jiri mar nji ɗanghəu.

¹³Yo tsau nghə bar a mar Hyel ndə nda kwa nənyi pi nə dəhə səu, ana a mar Kəristi Yesu ndə nda tə dəkəbiya jiri mar Buntus Bilatus.

¹⁴Ka ɓəlatə tsaubar nga, a da na sər ngəl ndara sə ɗyatlə tə wa, ba'a tə bəji nda Tlakən mən Kəristi Yesu kwa da chabiyadzə ti.

¹⁵Aka Hyel kwa da chabiya nyi tə bəji tsa'atsa'a, nacha nda Hyel ndər papa'akur, zhang tanyi Ndər Gyalkur, Təl təkəra təl i'i, Tlakənya tlakə i tsəu.

¹⁶Na cha zhang tanyi ngə pa'a kwa tah, kwa ngya tə vimbəlmbəl nda pa'a ndə kwa nau ɗa ləhə dzəri, ya ndə da ta la'a nyi wa, ya ndər la'a nyi da wa. Səli ana gyalkur nda a ɓəl nyi da wa, ngya tə nənyi ba'anawa. Aɗəmja.

¹⁷Ka tsau nyi bar nə njir gəna, ngwa nda da ngya ka wovi wa, ya ngwa nda da nənyi jiri nə gəna nda pa'a kwa ngya wa. Kəl ja, nda fətə kər da Hyel nda na pi, ndə nda gəna nyi da kwa wur wa, na cha ngə kwa nə mən dəhəkura sənda məno wahə ni.

¹⁸Ka dəkar nda, nda mər sə mənakəu, nda ɗa na gəna ku tlər mənakəu, nda ɗa na chi wunghəu, nda ɗa ka nji'inda kwa nau təkəya sə ka alenya nji.

¹⁹Təwa əngə nda kwa ɗəwanda nyi gəna nə kərnənda, nda kwa ɗa ka hya ngya kənda biyama.

²⁰Timtawus, ka ɓəla sə'inda nja tsau nghə ku cha ka, ka ɗa naɗə tsa ɓwanya kəla kər ana kəpal ɗimi, nda nji kwa na bəra “Zəndi” ya gəzhi.

²¹Nda gwa'atə alenya nji tə tyatə tsa jirikur təwa nəu chul dlədləɓə inga. Papa'akur Hyel cha ngya təkəra hi dəhəu.