Read nya huba 2 Timtawus 1 Bible Online

2 Timtawus 1 - nya huba bible

2 Timtawus 1

¹Hya'atə tsa Bulus, changhabal Kəristi Yesu təwa ikur Hyel, nja sə ɗa ka ga ya dəkar nyi nə alenya nji alkawal pi nda njo uya təwa jirikur ku Kəristi Yesu.

²Ya kwa tsəfə nə Timtawus zər ɗa nda yo nyida. Papa'akur Hyel Adan mən, ana təhuɗə nyi, ana piyarɗufə nə Kəristi Yesu Tlakən mən ngya təkəra ka.

³A usaku tə ya Hyel nə ya kwa mər tlər nənyi ana ta zhang na, wi nda tə ka jival ɗa tə ɗaka məra, wa'atanyi ya kwa ɗənghatə nghə ku pətlənya ɗa.

⁴Ma ya ɗənghatə nda ka tiwi na sələm, kəl ya kwa chim ya la'a ngha ga ya nyi na hirgyaɗi.

⁵Kwa ɗənghatə ya jirikur jiri ngha, chul jirikur nda aji nghə Loyis ana ama nghə Yunis ni, zəndətə ya təkəɗəu, ma'a nakə a da kə ni.

⁶Aka əngə ja, ya kwa ɗənghatə nghə ga'ar Hyel nda cha nənghə bəji nda ya fəkə nghə cha ya tə nda, ka ghəzandzənyi hu'u.

⁷Aka Hyel da nə mən shanguɗə nə ləvər wa, kəl nda shanguɗə nə gyalkur, nyida, ana nə ɓu kərnəmən.

⁸Aka əngə ja, ngwa ka ngatə kuzhi tsa ɓwanya təkəra Tlakən mən, ndara tsa ya naya nda ku jarum ka Kəristi wa, kəl nda ka ɗa ku huɗa njir sa ɓwaɓwatə tə nyar Mafakə Mənakəu, wi nda Hyel tə nə mən dunamar məra.

⁹Nacha ngə tə dləuya mən ga nga mən, ka ga məna ɗa ka nji karti, a da ka tlər kəmən wa. Kəl ja, ka sənda ku jigadəma nyi, ana ɗanghali nyi, cha dləuya mən təwa Kəristi Yesu təvi nja mər dunəya.

¹⁰Ya sakana chabiya mən tə cha təwa shilir Ndər Dləuya mən Kəristi Yesu, nda tə hənda tah, ga chabiya mən lakur pi nda ba'anawa tə babal, təwa Mafakə Mənakəu.

¹¹Ya ngə Hyel tə tabiya ɗa ka ga ya ɗa ka ndər bəzə mafakəu, changhabal, ana ndər dlədləɓə Mafakə Mənakə nə nji.

¹²Nacha na gwa'atə yo sa ɓwaɓwatə ku jarum, kəl ja, dəhə ka əngə a da yo ngatə kuzhi wa, aka zəndətə ya ndə nda ya nənyi jiri. Tsau nyi tə ya dəhə səu ku cha cha, ya zəndətə ya cho nau ɓəlati, ba'a tə pəchi nda Kəristi kwa ɓəla shili.

¹³Ka gəzəya ɓwanya jiri ngə ya dlədləɓətə nghə nga, cha ɗa ka ba'ada nə ngha, ana ka ngya ku jirikur ana nyida nda ku Kəristi Yesu.

¹⁴Ka ɓəla jiri durdur ngə Hyel tə tsau nghə təwa gyalkur Shanguɗə Karti ngə ku ɗufwa mən nga.

¹⁵Zəndətə kə madawa tə hə'i Asiya ngya ɗa ti, ma'a ka Fijelus na Hamajenis.

¹⁶Ga Tlakə ngatə təhuɗər Onisforus ana njir ki nyi, aka zhaka ɗang tanyi cho usa ɗa kwa fətə ɗa ɗufəu. A da cha ngatə kuzhi na ənda ya ku jarum wa,

¹⁷kəl ja, nda cha dzəva vu Roma, cha gwa'a ɗa taɓə ɓiti ku pəla kəl nda cha nda uya ɗa.

¹⁸Ga Tlaka ngatə təhuɗə nyi ɗəmja tə pəchi nda Kəristi kwa ɓəla shili ti. Kərnghə zəndətə chul vala ɗa nda cha vala ɗa vu Afisa.