Read nya huba 2 Timtawus 2 Bible Online

2 Timtawus 2 - nya huba bible

2 Timtawus 2

¹Nakə ja zər ɗa, ka tsətə kərnghə təwa ɗanghali nda Hyel tə nənghə ku Kəristi Yesu.

²Dəhə sənda ka ngatə ya dlədləɓə mar nji ɗang nda, ka dlədləɓətə nyi nə nji'inda ka dləukər ni, nji'inda pəlakər kwa nau dlədləɓətə nyi nə alenya nji.

³Ka səsə'u ɓwaɓwatə ka ea wi ləvaləva mənakə nə Kəristi Yesu.

⁴Aka ləvaləva da kwa gwa ku sənda nji'inda pa'a ləvaləva kwa mər wa, kəl sənda ndə nda dəgal təkəra cha kwa mər hirgyaɗi ni.

⁵Ya a ndər məməla hwi da kwa kwasə wazəba wa, kəl cha ɓəlatə gadlagadla inda kwa.

⁶Ndər zwa nda tə mbabiyadzər zwa tsa'anyata, na cha ngə ndə nda kwa kina uya sakəda sə zwazwa nda nja mərəya tangərma.

⁷Ka jigadəma təkəra sə'inə yo dəkə nənghə na, Tlakə tsəu kwa vala nghə ko ngabiya dəhə sə'ina.

⁸Ka ɗənghati, Kəristi Yesu nyandəla Dauda tə hya'atə ku hwa, nacha nə Mafakə Mənakə nə yo bəzə na.

⁹Aka Mafakə Mənakə nə ngə ya sa ɓwaɓwatəu, ya nacha nə sənda mbiya ɗa nji təkər wi ndər bikəu. Kəl ja, a nji da kwa nau mbiya ɓwanya Hyel wa.

¹⁰Aka əngə ja, yo səsə'u kala səu ka nji ɗəmɗəm nə Hyel, ga nda uya mbəɗa təwa Kəristi Yesu, tsa'a na ga nda gwa ku səli nda ba'anawa.

¹¹Ɓwanya na, təkəɗə nə bəra, “Ma məna tə kə'i cha, məno hya'atə kə'i cha tsəu.

¹²Ma məna ngya na səsə'ua, məno səm təlkur kə'i cha tsəu. Ma məna kəpal zəndə nyi, na cha tsə'u cho kəpal zəndə mən.

¹³Macha a da mən njir gəzə alkawal wa, nacha nənyi ndər gəzə alkawal cha, aka a da cha kwa kəpal zəndə kərnyi wa.”

¹⁴Ka ɗənghatə nda sə'ina, ana ka təɗə himya nda biyama mar Hyel ənda ngwa nda da bəla nya təkəra ɓwanya wa. Sakəda nyi da wa, kəl nda cha səwandə nji nda kwa səhimi.

¹⁵Ka mər tlər tsa'anyata, ka chabiya nyi kərnghə nə Hyel wi ndə nda cha tabiya, ndə nda pa'a kwa ngatə kuzhi tsa tlər nyi, ndə nda kwa dlədləɓə ɓwanya jiri nə nji.

¹⁶Ka ɗa naɗə tsa ɓwanya pəla'apəla'a nə kəkəngkur, nda kwa gwa'atə nji kwa həyatə Hyel.

¹⁷Chul ngəna ɓwanya kwa mwadlər wi kəti məha. Ku pama njir pə chul ngəna ɓwanya, anə ma'a ka Himeniyus ana Filetus.

¹⁸A ngyar tə nda laku jiri, nda kwa na abəra hya'atər nji kuɗəkuɗə wurtə tərabiya, nda kwa zhəzhərandə nji tsa jirikur.

¹⁹Kəl ja, jirir Hyel ta'itə na dunama wi hyavi, janə ɓwanya inda nja tsəfətə ti, bəra, “Tlakə zəndətə nji'inda nənyi,” ana, “Dəhə nji'inda tə na ənda nə Tlakə nda, kəl nda ngyar mər pəla'akur.”

²⁰Aku ki njir gəna shala ana təm da pampaməu, alenyi da nda nja ɓatlə na azurfa ana bəjingha, alenyi da tsəu nja ɓatlə na nyingha ka ana wua. Alenyi ka dləu mihiɓi ana ladər, alenyi tsəu ka tlər huɗəvi.

²¹Ma ndə tə ɓəlati kərnyi tsa mər dəhə sənda ɗimi, cho ɗa ka sər mər tlər nda mənakəu. Ngya nyi kwa ɗa karti, ɓatləɓatlənyi ka mər kala tlər mənakə nə Tlakə nyi.

²²Ka hwi tanghə tsa mwaɓər ɗimiɗimi nə tlakalakur. Mbadzə ka gwa'a tsa'atsa'akur, jirikur, nyida, ana piyarɗufəu, nahi ka nji'inda kwa gədi Tlakə na ta zhang.

²³Ngwa ka da gwa ku kəpal pəla'apəla'a kəla sakəda wa, aka a zəndətə kə kwa shili na guhi.

²⁴Mava Hyel da kwa guhi wa, kəl nda cha ɗa ndər mər mənakəkur nə dəhə nji, ndə nda kwa nau dlədləɓətə nyi sə nə nji, ya kwa mbiyahuɗəu.

²⁵Ka tsau nyi bar nə ndə nda kwa mər dawa na dlədləɓə ngha ana sənam, ndara tsə'u Hyel ngya nda na lakur tubi tsa səpəla'a, nda zəndəbiya jiri.

²⁶Nda kwa ɓəl shili ku jigadəma kənda, nda kwa mbəɗə ku ləbam sərtakəu. Aka cha ɗaka səya nda nda kwa mər sənda cho i.