Read nya huba 2 Timtawus 3 Bible Online

2 Timtawus 3 - nya huba bible

2 Timtawus 3

¹Ka zəndə ja, ku batəbatər bəji njo sa ɓwaɓwatə gagaɗa.

²Aka nji kwa ɗa ka njir i kərnənda, njir nyida kwaba, njir bu kərnənda, njir wovi, njir ngəl nji, nji kəra nəu nya njir yah nda, nji kəla usaku, nji kəla ləvər Hyel.

³Ana nji kəla nyida nji, njir gəzə ndə nya ta, njir səwa tləm nə alenya nji, nji kəla nau chinda kərnənda, njir paha, njir mər dawa na dəhə sənda mənakəu,

⁴Ba'a njir tləɗa nji, nji kəla dəma, chaɓə na wovi, njir i məsəɗakəkur matsa nyida Hyel.

⁵Nda kwa mərtə kərnənda wi njir ləvər Hyel, kəl ja, nda kwa kəpal təkəɗər gyalkur Hyel. Ka təkəbiyadzə na nji wi inga.

⁶Nanda ingə chul nji'inda kwa tləɗəu kərnənda gwa ku ki nji, nda kwa shakər nə mahi'i dzadza, inda səpəla'a kənda tə ngəya wulya nda, ya mwaɓər dəhə chulkə jigadəma pəla'a zhaliya nda ti.

⁷Kala bəji nda kwa nəu taɗər dlədləɓa, kəl ja, a da nda kwa nau zəndəbiya jiri wa.

⁸Tang wi nda ka Yannis na Yambris tə mər dawa na Musa, əngə tanyi tsəu nji nə kwa mər dawa na jiri, nji'inda jigadəma kənda səwasəwanyi ya jirikur kənda tsəu ɓwa'atanyi.

⁹Kəl ja, a da nda kwa ma'i naɗə nə wa, aka dzadzakur kənda kwa biya tə babal wi nə ka Yannis na Yambris nda.

¹⁰Kəl ja, naka nəubiya təkə dlədləɓə ɗa, ənda yo ngya, sənda yo i məra, jirikur ɗa, mbahuɗə ɗa, nyida ɗa ana səsə'u ɗa.

¹¹A zəndətə kə məndza'u na ɓwaɓwatə nda uya ɗa vu Antakiya, Ikoniya ana Listra, kəl ja, Tlakə tə mbəɗandə ɗa kwa dəhəu.

¹²Jiri nga, dəhə ndə nda kwa i ka cha ngya na ləvər Hyel ku Kəristi Yesu, kəl nja ɗa məndza'u na cha.

¹³Kəl ja, njir mər ɗimikur kəl tsakə ɗimikur kənda kwa tsaka, nda kwa shakər nə nji ya nanda tsəu njo shakər nənda.

¹⁴Kəl ja, naka, ka biyama na nəu sənda ka dlədləɓətə ga nənyi jiri, aka zəndətə kə nji'inda ka dlədləɓə tsari.

¹⁵Ka ɗənghati, a zəndətə kə likatəkatə karti nə Hyel tsəu kə zər, nda kwa nau nənghə dəma nda kwa gwa'atə ko uya mbəɗa, təwa nənyi jiri nə Kəristi Yesu.

¹⁶Dəhə likatəkatə təwa gyalkur Hyel tsəfə nji, ya sər sakəda cha ka dlədləɓə jiri, guhi, ɓatlə dalatsən, ana tsaubar ka ngya tsa'atsa'a,

¹⁷ka ga mava Hyel ɗa ɓatləɓatlənyi gagaɗa, ka dəhə tlər mənakəu.