Read nya huba 2 Timtawus 4 Bible Online

2 Timtawus 4 - nya huba bible

2 Timtawus 4

¹Tsa'anyata yo tsau nghə bar mar Hyel ana Kəristi Yesu ndə nda kwa da mərtə nyi nəuma nə nji'inda na pi ana nji kuɗəkuɗa, ya cho ɓəl shili ka səm təlkur, yo tsau nghə bar ja,

²ka mbabiyadzə ka bəzə ɓwanya Hyel nə nji mada laku da ndara a laku da wa. Ka chabiya səɗimi nda nji kwa məra, ka guhi nda, ətsəu ka fətə nda ɗufəu ka dlədləɓə nə nda na səsə'ua.

³Aka bəji kwa shili nda a tsə'u nji da kwa i dlədləɓə nə jiri wa. Nda kwa nəu sənda jigadəma kənda nda kwa i, manda hima nda kwa ɓəɓa nda, nda kwa gwa'a kəl njir dlədləɓə inda kwa dəkar nda sənda hima nda kwa i ngati.

⁴Nda kwa ngyar səhimi da jiri, nda kwa ngya kəl ka səhimi da pəkətəpəkətiya i'i.

⁵Kəl ja, naka, ka gəla na kərnghə ku dəhə sə'inda ko məra. Ka səsə'utə ɓwaɓwatəu, ka mər tlər ndər bəzə Mafakə Mənakəu. Ka nyabiya dəhə tlər nda Hyel tə nə ngha.

⁶Aka naya, bəji gəlatə ka yo ɗa wi sər hatəmachi, bəjir tə ɗa ɗatə ləhəu.

⁷A pa nda təya pa mənakəu, wurandə tə ya məməla hwi, ya gəzəya tə ya alkawal jirikur nda nja na'a.

⁸Ya sakana wazəba kwa səkə ɗa, nacha ngə pahuɗə mba kər nə tsa'atsa'akur, nda Tlakə ndər nəuma tsa'atsa'a kwa na'a tə pəchi nda cho ɓəl shili ti. Wazəba nga a da kəl a na'a wa, ma'a anə kala ndə nda ngya kwa fəkər na hirgyaɗi, ka cha la'a shili nyi.

⁹Ka gwa'a laku ka shili da ya ɗəɗəu.

¹⁰Aka Dimas ngya ɗa tə ga tərata nyi yi Tasalonika aka nyida sər dunəya. Ya Karaskas təratə yi Galati, Titus tsəu təratə yi Dalmatiya.

¹¹A tsə'u ndə da ea nə wa, kəl Luka sənyi. Ka gwa'a Markus ɗəɗəu hya shili kya'a hi, aka sakəda nyi da na'a ku tlər na.

¹²Tikikus tsə'u, ya sənyi yi Afisa.

¹³Ma ko shili, ka mar ɗa gujiva ɗa nda ya ngyar tsa Karpus vu Toruwas nda; ka hətə ɗa likatəkatə ɗa inda, a da wi chi ɗa inda na tsəfə tə nda ma'a wa, ngwa ka da far wa.

¹⁴Alekzanda yakə fətə sə fətəfəta tə mərtə ɗa ɗimikur, kəl ja, Tlakə kwa kinda nyi məlməl na sənda cha məra.

¹⁵Nakə ma'a kəl ka gəla nacha, aka a da cho i ngatə ɓwanya kəma wa.

¹⁶Aku nda ya yi mar njir nəuma tangərma ka wum jawa, a ndə da tə mbatə ɗa sar wa, dəhə nji tə ngya ɗa, yo chima ngwa Hyel da hə nacha ngə ka bikə təkəra nda wa.

¹⁷Kəl ja, Tlakə da ngya ɗa wa, cha na'a dunama ya bəzə Mafakə Mənakə nə dəhə nji'inda pa'a njir Yahuda ga nda ngati. Ana ya mbəɗa ku nya ləvari.

¹⁸Tlakə kwa dləuya ɗa tsa dəhə səɗimi, cho gina ya yiying gyo təlkur nyi kya huɗamələm. Səli ngya tə nənyi ba'anawa. Aɗəmja.

¹⁹Ka usar ɗa ka Bəriskila ana Akila tsa'a na njir ki Onisforus.

²⁰Arastus, avu Korinti cha, ana ya ngyar Tarofimus vu Militus a da cha yiying wa.

²¹Ka mbadzə ka shili, fwakə kwa ɗa. Yubulus kwa usa ngha, əngə ma'a ka Pudens, Lainus, Kalaudiya, ana dəhə kə'i zama ka kwama ku Kəristi.

²²Ga Tlaka ngya na ɗufwa hi, papa'akur Hyel cha ngya na hi.