Read nya huba Filimun 1 Bible Online

Filimun 1 - nya huba bible

Filimun 1

¹Hya'atə tsa Bulus, ndə nja fəu ku jarum a təkəra bəzə mafakə Yesu Kəristi, ana zamən mən Timtawus, a yada Filimun bazhi mər tlər kəea nda eo nyida,

²ana kwamən mən Afiya ana Arkibus bazhi mər tləra, daɓə dəhə njir nəu inda kwa daɓədzə ku ki ngha.

³Papa'akur ana piyarɗufəu hya'atə tsa Hyel Adan mən ana Tlakən mən Yesu Kəristi ngya tsa'a na hi.

⁴Dəhə bəjir pətlənya ɗa, wa'atanyi ya kwa pətlənya ana usaku Hyel aka ka.

⁵Aka kwa uya ya mafakə təkəra jirikur ngha aku Tlakə Yesu ana nyida nda ko cha nə dəhə nji'inda nə Hyel.

⁶Gədi ɗa, nacha ngə daɓəkər kəmən kə'i kə ku jirikur kwa gwa'atə ko ngabiya mənakəkur nda mən nə ku daɓəkər ka Kəristi.

⁷Zama, nyida nghə tə gwa'atə ɗa hirgyaɗi gagaɗa, ana tsəɗufəu. Aka ɗufwa nji'inda nə Hyel ɗa tə twas təwa ngha.

⁸Aka ənga, madangə ku Kəristi kwa nau ya nənghə tsaubar ka mər sənda tsa'atsa'a,

⁹dəhə ka ənga aka nyida nda yo nyida ngha, a ndiya ɗa tə vi ya gədi ngha. Naya Bulus ndə halhala, ya sakana ku jarum aka Yesu Kəristi.

¹⁰Yo gədi nghə ka ngatə təhuɗə zər ɗa Onisimus, nda ya ɗa ka ada nyi ku Kəristi bəji nə ya ku jarum na.

¹¹Ɗakaɗa a sakəda nyi da nə nghə wa, kəl nəchanə ja, sər sakəda cha nə ma.

¹²Jan yo ɓəlandə nyi yada ka, na cha nda dəhə ɗufwa ya tə cha.

¹³A i tiya ya nda gəzəya nyi bəji nə ya ku jarum aka bəzə Mafakə Mənakə na, aka cha vala ɗa tə nya ngha.

¹⁴Kəl ja, a da ya i ya mər madami a da na zəndəkur nghə wa. Tsa mənakəkur nghə da ba'a ɗa wi sər tuku, kəl nda sənda ko i.

¹⁵Kustanyi nacha ngə tə gwa'atə hya təkə nə zər bəji kushəu, ka kə dləutsə nyi hya ngya ba'anawa.

¹⁶A tsə'u cha mava nghə tanyi wa. A ndəɗə tə cha mava, aka kuvanghə ndər nəu cha nda njo nyida. Kwa nyida nyi ya gagaɗa, ya zəndətə ya ko ndiya ɗa nyida nyi wi kuvanghə ndəu ana ndə nda tə nənyi jiri nə Tlakəu.

¹⁷Aka əngə ja, macha bazhi mər tlər ɗa ka, dləutsə nyi wi nda ko dləu ɗa.

¹⁸Macha ndara vanya bikə da cha mərtə nghə ndara ko nəu nyi məl vanya səu, fəkər təkəra ya.

¹⁹Naya Bulus ngə kwa tsəfə kainau nə na cha ya, yo kinda ngha. (A da ya kwa ndər təkəra ənda ka uya taɗər pi ku Kəristi təwa ɗa wa.)

²⁰Əja zamə ɗa, matikuɗi, mərtə ɗa mənakəkur na aka Tlakəu. Tsətə ɗa ɗufəu ku Kəristi.

²¹A nənyi tə ya jiri ko mərtə sənda ya gədi, ndiya matsa ngə ma'a, nacha nga gwa'atə ya tsəfətə nghə kainau na.

²²Əsəkəu, yo i ka ɓatliya ɗa vi mihiɓi, aka yo fəkər təwa pətlənya kəhi Hyel kwa ɓəlandə ɗa shili da hi ɗəɗəwu.

²³Abafaras, ndə nda ku jarum na ya aka Yesu Kəristi kwa usa ngha.

²⁴Əngə ma'a Markus, ana Aristakus ana Dimas ba'a Luka dəhə nda bazhi tlər ɗa inga.

²⁵Papa'akur Tlakə Yesu Kəristi ngya na shanguɗə kəhi dəhəu.