Read nya huba Ibrani 1 Bible Online

Ibrani 1 - nya huba bible

Ibrani 1

¹Ɗakaɗa Hyel tə ɓwanya na ka jival kəmən təwa nya njir mətakər a tə bəji pampamə ana ku laku pampaməu,

²kəl ja, aku bəji batəbatə na cha ɓwanya nə mən təwa Zər nyi, ndə nda cha tabiya ka cha ɗa ka ndər fa'aki nə dəhə səu, ya təwa nyi cha ɓatlə dunəya.

³Zər nga nacha ngə mbəlmbələr səlir Hyel ana pa'akura ənda cha, təwa gyalkur ɓwanya nyi cha mərtə dəhə sə ngya wi nda cha. Ahir cha chinda mən tsa səpəla'a, cha ngya tə chisəma Hyel Ndər Gyalkur nda kya huɗamələm.

⁴Ngə cha ɗa dəgal matsa chama i'i wi ngə tə tləm nda nja nənyi tə ɗa dəgal matsa nəkənda.

⁵Aka a nə wa ku huɗa Chama ngə Hyel ta na, “Nakə Zər ɗa ka; ənya a ɗa tə ya ka Ada ngha?” Ndara, “Yo ɗa ka Ada nyi, ya cho ɗa ka Zər ɗa?”

⁶Əsəkəu, aku bəji nda Hyel tə shili na Zər tangərmanyi ku dunəya, cha na, “Dəhə chama Hyel nda həsəli nənyi.”

⁷Cha ɓwanya təkəra chama i'i ga na, “Cha mərtə chama nyi i wi gyang, mavi'i nyi wi kyara hu'u.”

⁸Kəl ja, a təkəra Zər nda cha na, “Dzəga təlkur nghə Hyeləu cho ngya ba'anawa, ya tsa'atsa'akur cho ɗa ka zəwa təlkur ngha.

⁹Ka nyidatə tsa'atsa'akur ga ngyar ɗimikur; aka ənga, Hyel, nda Hyel ngha, a fətə nghə tə təkəra ka bazhi ngha təwa dzəvəya nghə na mal hirgyaɗi.”

¹⁰Ətsəu cha na, “Aku ghəyanyi Tlakəu, ka səya hya dunəya, ya huɗamələm tlər chakə inga.

¹¹Nda kwa kuɗa, kəl ja, naka ko ngya; nanda tsəu nda kwa hal wi dzaki;

¹²ko pəɗətə nda wi daura; ko vakənda nda wi guzhalguzhal. Kəl ja, naka wi nda tangha, ya fa nghə da kwa wur wa.”

¹³A nə chama manə Hyel ta na, “Ngya tə chisəma ya, kəl ma ya shandə njir dawa nghə ka təmbəl pə hya ka?”

¹⁴Dəhə Chama ya, a da mambəl mər tlər inda nja sə ka mər tlər nə nji'inda kwa uya mbəɗə ingə ma?