Read nya huba Ibrani 10 Bible Online

Ibrani 10 - nya huba bible

Ibrani 10

¹Gadlagadla ya, shanguɗa sə mənakə tanyi ingə nda kwa shili, a da nda təkəɗər sənda wa. Aka ənga a da hatəmachi ka fa ka fa da kwa shili na nji ləhə ka həsəli nə Hyel wa.

²Macha əngə ya, a da nda kwa ngyar hatəmachi ma? Aka nja kwa chinda njir həsəli zhaka zhang tanyi ka dəhə səu, ya a da nda kwa nda ɗana bikər səpəla'a kənda wa.

³Kəl ja, hatəmachi inga, ɗənghati səpəla'a ngə kala fa,

⁴aka cho ɗa dza'u mashi hahaldi ana nə kua cha hənda səpəla'a.

⁵Aka ənga, aku bəji nda Kəristi tə shili ku dunəya, cha na, “Hatəmachi ana lə ga'a a da ko gwa'a wa, kəl ja, a ɓatliya ɗa təkə dzəa;

⁶ya a da ko mər hirgyaɗi na lə ga'a ngi sə ngingya ana lə ga'a ka səpəla'a wa.

⁷Ngə ya na, ‘Janə tsəfətsəfə nyi cha təkəra ya ku likatəkata, Ya shili ka mər sənda ko i Hyelləu.’ ”

⁸Tangərma cha na, “Hatəmachi ana lə ga'a, lə ga'a nə sə ngingya ana lə ga'a ka səpəla'a a da ko gwa'a wa, ya a do nənghə hirgyaɗi wa.” (Madangə gadlagadla kwa gwa'a nja mər nda).

⁹Ngə cha na, “Janə ya, ya shili ka ya mər sənda ko i.” Cha far na tangərmanyi ka ga cha kukuya mətləkunyi.

¹⁰Aka Yesu Kəristi mər tə sənda Hyel kwa i, a mərtə mən tə nji ka nji karti təwa hatəmachi na dza kərnyi zhaka zhang tanyi.

¹¹Ba'aka saka nga fərist kwa ta'i ka mər tlər nyi nə həsəli; cha kwa hatəmachi inda pa'a kwa hənda səpəla'a atə vanyi atə vanyi.

¹²Kəl ja, ku bəji nda Kəristi tə handa təmachi zhaka zhang tanyi ka səpəla'a, cha ngyata nyi tə chisəma Hyel.

¹³Fwatə tə bəji nda cho səka bəji nda njo mərtə njir dawa nyi ka təmbəl pə hya cha,

¹⁴aka təwa hatəmachi zhang cha mərtə nji'inda nja mərtə ka nji karti tsa'atsa'a, ba'anawa.

¹⁵Shanguɗə Karti ma'a char mən tə sə təkəra sə'inga. Tangərma cha na:

¹⁶“Nənnə ngə mbandər nda yo mər na nda ahir bəji nda, ənghwandə Tlakəu. Yo fəu gadlagadla ɗa ku ɗufwa nda ana yo tsəfəu ku jigadəma kənda.”

¹⁷Ngə cha tsakətə na, “Səpəla'a kənda ana tar nəu gadlagadla a tsə'u yo ɗənghatə nə səkə wa.”

¹⁸Ya ma nja farbikə tsəu hatəmachi ka səpəla'a da wa.

¹⁹Aka əngə ja ka zama, manə kwa nau mən gwa ku Vi nda Ndiya na Kartikur gangkər təwa mashi Yesu,

²⁰təwa taɗər laku nda na pi nda nja mbəɗiya bang nə mən təwa miɗi nda, nacha ngə dza cha.

²¹Ya manə uyatə mən dəgalər gau fərist təkəra ki Hyel

²²Əja, məna shili ləhə dza Hyel ana ta zhang ku təkəɗər jirikur. Ana ɗufwa mən nda nja dzəvəya ga chinda tsa jigadəmar səpəla'a ana dza mən nda nja chinda na ɓiti ɗyaɗyanghəu.

²³Mən gəzəya fəkər nə məno bəzə nə ɓaɓaləu, aka nacha nda tə mər alkawal ndər jiri cha.

²⁴Kəl məna ɓəla kərnəmən ənda məno tsəkutə kərnəmən ka məna char nyida ana mər tlər mənakəkur.

²⁵Ngwa məna da ngyar daɓədzə kəmən wi nda alenya nji tə tsəl na mər wa, kəl ja, mən tsətə nyi ɗufəu nə kərnəmən, məna tsakətə mər ənga wi nə hyo la'a ənda pəchi ngə ɗatə ləhəu.

²⁶Ma məna biyama na mər səpəla'a ana ikur kəmən, ahir a zəndətə mən jiri, tsəu sakədar hatəmachi ka səpəla'a da wa,

²⁷kəl nda nəuma nda na ləvəra ba'a hu'u nda ndiya na kwakwaɗəkur nda kwa nginda njir dawa Hyel.

²⁸Kala ndə nda tə ngyar gadlagadla Musa kwa tah a da na təhuɗə wa, ma nji mətlə ndara makər tə dləukəri.

²⁹Hyo har ya a ɓwaɓwatə da kwa ndiya ɗa 'ual nə ndə nda tə həyatə Zər Hyel, tə mərtə mashi alkawal nda tə chinda mən dyadyaɓəu, ndə nda tə ngəngəlnda Shanguɗə Karti ma?

³⁰Aka a zəndətə mən ənda Hyel tə na, “Kisəkur na'a nga; na ya kwa kya,” ana tsəu, “Tlakə kwa mərtə nyi nəuma nə nənyi na nji.”

³¹Sər ləvər cha gagaɗa ndə gwa ku cha Hyel nda na pi.

³²Hya ɗənghatə hanyi inga təra yahi ahir nda hya dləutsə vimbəlmbəla, ku bəji nda hya ta'i ta'iu ku dzəa ana ɓwaɓwatə nda manə hi.

³³Alenya bəji nja kwa ngəl hi ana ɗa məndza'u nahi tə babal; alenya bəji tsəu hya kwa ta'i kə'i nji'inda tə sa chulkə ngə na ɓwaɓwatəu.

³⁴A ngatə təhi təhuɗər nji'inda ku jarum, ətsəu a mərtə hi hirgyaɗi nda nja dləuya kar kəhi, aka a zəndətə hi nahi təkərnəhi ənda hyo ɗana uya sə'inda ndiya mənakə kwa ngya ba'anawa.

³⁵Aka əngə ja, ngwa hya da vakənda dunamar fəkər nda hi nə wa; aka zhar nyi kwa ɗa bwaɓu.

³⁶A kiti hya səsəutə aka ma bəji nda hya mərtə sənda Hyel kwa i, hyo dləutsə sənda cha hətə salkur salkurnyi.

³⁷Aka ku bəji kushi tanyi, “Nacha nda kwa shili cho shili ya a da cho shivi wa,

³⁸Kəl ja, na'awa ndə nda tsa'atsa'a kwa ngya təwa jirikur. Kəl nda macha ɓəl yahi, a da yo mər hirgyaɗi nacha wa.”

³⁹Kəl ja, a da mən ku huɗa nji'inda tə ɓəl yahi ga kuɗə wa, kəl nda ku huɗa nji'inda tə nənyi jiri ga mbəɗa.