Read nya huba Ibrani 12 Bible Online

Ibrani 12 - nya huba bible

Ibrani 12

¹Aka ənga, manə daɓədzər njir ta'i tə ya mən ɓandə mən tə tsa'a, mən vakənda dəhə sənda kwa katə mən, ana dəhə səpəla'a nda tə gəzəya mən ɓaɓaləu, ətsəu mən məməla hwi nə biyaman mən na ana mbahuɗəu.

²Məna pətə lya mən tə Yesu, nda nacha ngə ghəya ana ɓələkər jirikur kəmən, nacha nda aka hirgyaɗi nda nja fiya biyama nyi cha səsə'utə taməngəla, ya a da cha ngatə kuzhi tsar wa, ngə cha ngyata nyi tə chisəma dzəga təlkur Hyel.

³Jigar ma dəma təkəra səsə'u nda cha səsə'u ana ngyanyi nda njir mər səpəla'a tə ngyanyi, tsa hya da həɗa, hya ngyar nənyi jiri.

⁴Aku pa kəhi ka səpəla'a a da nji ka hyo pənda mashi kəhi gwadagə wa.

⁵Ya fartə hi na ɓwanya tsəɗufəu nda nja kwa mərtə hi wi ngulisha'a, bəra, “Zər ɗa ngwa ka da hətə təɗəhimi Tlakə sə ɓwa'atanyi wa, ngwa ka da tsəya ɗufəu, ma cha tsə nghə wa.

⁶Aka Tlakə kwa ɓu nji'inda cho nyida, cha kwa ɓu kala ndə nda cha kwa dləu ka zər nyi.”

⁷Ɓwaɓwatə ngə hyo səsə'u nga ka ɓu ngani, Hyel kwa ɓu hi wi nguli nyi. Zər manə ngə nda Ada nyi da kwa ɓu nyi wa?

⁸Macha a da njo ɓu hi wa, yau ngulisha'a mazagwa hi, a da hi ngulisha'a jirijiri wa.

⁹A matsa ngə ma'a, Adan mən da nda yah mən ku dza kwa ɓu mən, ya məno nəu nya nda. A da ndiyavi məna nəu nya Adan mən nə shanguɗə ga məna ɗana pi ma?

¹⁰Ka adanə mən nə dunəya kwa ɓu mən nə bəji kushi ku laku nda tə ɗa mənakə nənda, kəl ja, Hyel kwa ɓu mən wa'atanyi ka sakəda kəmən, ka mən uya mbaɗə ku kartikur nyi.

¹¹Dəhə bəji nda njo ɓu ndə tə kwa ta, a da cha məsəɗakə wa. Kəl ja, ahir ənga kwa shili na zhar ngya tsa'atsa'a ana piyarɗufəu nə dəhə nji'inda tə uya ɓua.

¹²Aka ənga, hya nənyi dunama nə cha hi inga həɗa nga, ana undya hi ingə kəla dunama inga.[4]

¹³Hya ɓatlətə laku mənakə tsa njir gadal da ba ɗa ka nji təsəkən, təvira nda mbəa.[5]

¹⁴Hya mbadzə hya ngya na piyarɗufəu na dəhə nji, ana hya ɗa nji karti, aka ndə da kwa la'a Hyel wa, kəl ku kartikur.

¹⁵Hya gəla tsa vanya ndə da tar uya papa'akur Hyel. Hya gəla tsa vanya sər hya'a huɗətla da hya'atə cha shili na pa, ana cha mərtə nji ɗang dyadyaɓəu.[6]

¹⁶Hya gəla ngwa vanya ndə da ɗa ka ndər kasali, ndara cha ɗa ka ndə kəla ləvər Hyel wi Isuwa wa, ndə nda ka sərsum shala zhang cha dəlnda zə'ualkur nyi.[7]

¹⁷Ahir ənga wi nda hya zəndi, nda cha gwa'a cha uya papa'akur na, ngə nja ngya nyi, madangə cha gwa'a papa'akur nə na sələm, a da cha uya lakur ɓəlandə nyacha wa.[8]

¹⁸A da hya shili dza mə nda nja kwa nau tsəkari, nda kwa gəɗə hu'u, ndara kutla, ndara kutlə tuɗuməu, ndara gyang par,

¹⁹ndara mbəɗə tələm, ndara kurakə nda nji'inda ngatə kwa gədi ənda ngwa nda tso tsakətə ngatə wa.

²⁰Aka a da nda nau səsəutə tsaubar nda nja nənda, bəra, “Mada sərshishi ngə tə tsəkar mə nga, tuku nja vəvakənda nyi na hangu cha tah.”

²¹Səngə nda la'a nga sər ləvər cha, nda Musa ma'a tə na, “Dzaya kwa dzədzə na ləvəra.”

²²Kəl ja, shili tə hi dza dəgəl Sihiyona, shili dza Urshalima nə huɗamələm, mələm Hyel nda na pi. A shili tə hi da daɓədzər hirgyaɗi dlama nə chama i'i,

²³shili da njir nəuwa, nda yar tangərma, nji'inda na tləmən nda tsəfətsəfə nyi kya huɗamələm. A shili təhi da Hyel nda ndər mərtə nyi nəuma nə dəhə nji, ana shili da mambəl nji tsa'atsa'a, nji'inda nja mərtə nda nyinyinyi.

²⁴A shili təhi da Yesu ndə nda tə ɓatliya taɗər mbandər ku pama Hyel ka nji nyi, ana shili da mashi nda nja uchiya nda kwa pə ɓwanya nda ndiya na mənakəu, ndiya matsa nə Habila.

²⁵Hya gəla ja, ngwa hya da ngyar ndə nə kwa ɓwanya nə wa. Hya zəndə ənda nji inga ngyar dləutsə ndə nda tə ɓwanya nənda tə dunəya nə da kwa mbəɗə wa, mada namən ya, təwa bar məno uya mbəɗa ma məna ngyar ndə nda kwa ɓwanya nə mən səya kya huɗamələma?

²⁶Aku bəji nda, kuraka cha dzədzandə dunəya, kəl ja, sakana mərtə cha alkawal ənda, “Yo dzədzandə dunəya zhaka zhang səkəu, a da dunəya tanyi wa, ma'a huɗamələm.”

²⁷Ɓwanya nga “əsəkəu” a chari njo hənda sənda nja dzədzandi, nacha ngə, sənda nja ɓatla, aka ga sə'inda pa'a njo nau dzədzandə həyadza.

²⁸Aka əngə ja, mangə məno dləutsə təlkur nda pa'a njo nau dzədzandi, mən usaku, məna hətə nyi səli nda tsa'atsa'a nə Hyel ana səli ana ləvəra,

²⁹aka Hyel kəmən hu'u nda kwa ngi cha.[9]