Read nya huba Ibrani 3 Bible Online

Ibrani 3 - nya huba bible

Ibrani 3

¹Aka əngə ja ka zama inda karti, nahi nda nə Hyel, nda nja nga ka mbaɗər huɗamələm, hya fətə jigadəma kəhi təkəra Yesu nda nja səa, nda gau fərist nə jirikur nda məna nənyi jiri.

²Cha ɗa na jiri nə ndə nda tə tabiya nyi, wi nda Musa tə ɗa na jiri nə Hyel ku pama njir Isra'ila.

³Yesu tə ɗa na səli ndiya matsa Musa, wi nda ndər hər ki tə ɗa na səli matsa kərnya ki.

⁴Aka kala ki ndə ngə tə həra, kəl ja, Hyel ngə ndə nda tə hər kala səu.

⁵Musa tə ɗa na jiri wi mava ku pama njir Isra'ila nda njikə Hyel, kwa ɓwanya təkəra sənda kwa ɗa biyama.

⁶Kəl ja, Kəristi ndər jiri, wi zər nda təkəra njir nəu Hyel. Ya namən ngə nənyawa nji, ma məna ta'i təkəra tsəɗufəu ana fəkər ngə məno wovi nə nga.

⁷Əngə ja, wi nda Shanguɗə Karti tə na: “Ənya, ma hya ngatə kuraka cha,

⁸ngwa hya da ɗa ka nji ɓaɓalkər wa, wi nda hya mər ku mwali, ku bəjir dzə kwa takəu nda wa,

⁹tangnda jival kəhi tə dzə ɗa ga nda la'a nda mi yo məra, madangə la'atə nda sənda ya mər ku fa fwaɗəkumənyi.

¹⁰Nacha gwa'atə ya mər huɗətla na nda na zamin, ngə ya na, ‘Mada sakamani ɗufwa nda kwa tyati, ya a da nda zəndə laku ɗa wa.’

¹¹Ya ɓwanya na səmfəla ku huɗətla ɗa. ‘A da nda kwa gwa ku ɓəlsar ɗa pa'a wa.’ ”

¹²Gəla ma ja, ka zama, ngwa mada ndə zhang ku pama hi da ɗana səpəla'a, ndara ɗufəu nə tar nənyi jiri, nda kwa gwa'atə cha kwa sharnyi dagəryi nə Hyel nda na pi wa.

¹³Kəl ja, hya tsətə nyi ɗufəu nə kərnəhi kala pəchi, kəda ga cha ɗa njo nga nyi ənya, tsa səpəla'a da shandənyi kər nə mada zhang ku huɗahi cha mərtə ɗufwa hi ɓaɓaləu.

¹⁴Aka ma məna ɗa na jiri tsa'a ku udiya, məno nənyi jiri nə Hyel tsa'atsa'a wi nda məna təka nənyi jiri nda, məno uya dəhə sənda nə Kəristi.

¹⁵Wi nda nja na, “Ənya, ma hya ngatə kuraka cha, ngwa hya da mərtə ɗufwa hi ɓaɓal wi nda hya mər ku mwali nda wa.”

¹⁶Nanda ka wa ingə tə ngatə kuraka cha ga tlə mwalya? A da nanda nda Musa tə həbiya ku hə'i Masar nda ngə ma?

¹⁷Ya ana wa inda Hyel tə mər huɗətla fa fwaɗkumnya? A da na nji'inda tə mər səpəla'a, nji'inda dza nda tə ngya ku takə ma?

¹⁸Ya ana wa inda Hyel tə səmfəla ənda a da nda kwa gwa ku ɓəlsar nyi macha a nanda inda tə ngyar nəu nya cha wa?

¹⁹Aka ənga, a la'atə mən ənda a da nda nau gwa ku ɓəlsar nyi wa, aka tar nənyi jiri.