Read nya huba Ibrani 4 Bible Online

Ibrani 4 - nya huba bible

Ibrani 4

¹Aka ənga ja, madangə alkawal nə gwa ku ɓəlsar nyi tsəutanyi ngyangyanyi ba'a sakana, mən gəla ngwa mada zhang ku huɗa hi da təutə tsa gwa ku ɓəlsar ngə wa.

²Aka a ngatə mən Mafakə Mənakə nda nja bəzə nə mən nda, wi nda nda məra; kəl ja, mafakə nda da ɗa na sakəda nənda wa, aka nji'inda tə ngatə a da nda daɓətə na jirikur wa.

³Sakana namən nda tə nənyi jiri ngə kwa gwa ku ɓəlsar nga. Wi nda Hyel tə na, “Ya səmfəla ku huɗətla ɗa, ‘A da nda kwa gwa ku ɓəlsar ɗa pa'a wa.’ ” Madangə wurandə təcha tlər nyi nə ɓatlə dunəya ɗəɗəməu.

⁴Aka a tə vanya mbwa cha ɓwanya təkəra məɗəfəkunya pəchi, ənda, “Pəshir məɗəfəkunya pəchi Hyel tə ɓəliyasar tsa tlər nyi.”

⁵Ana tsəu, nja ɓəla na ənda, “A da nda kwa gwa ku ɓəlsar ɗa pa'a wa.”

⁶Tsəutanyi laku ka alenya nji gwa ku ɓəlsar nga, ya nji'inda tə ghəya ngatə Mafakə Mənakə nda da gwa wa, aka kəla ngatəndərkur.

⁷Aka ənga, Hyel tə ɓəla fiya vanya pəchi, nda cho nga nyi “Ənya.” Ahir fa ɗang cha na təwa nya Dauda, wi nda nja ghəya na, “Ənya, ma hya ngatə kuraka cha, ngwa hya da mərtə ɗufwa hi ɓaɓal wa.”

⁸Aka macha Joshua nənda tə ɓəlsar, Hyel do nda ɓwanya təkəra vanya pəchi pam səkə wa.

⁹Aka ənga, Pəchir Ngyaməngya nə ɓəlsar ngya tə nə nji'inda nə Hyel.

¹⁰Aka dəhə ndə nda tə gwa ku ɓəlsar Hyel, kwa ɓəliyasar tsəu tsa tlər kənda, wi nda Hyel tə məra.

¹¹Mən mbadzə ja məna gwa ku ɓəlsar nga, aka mada ndə zhang ngwa cha tar gwa ku ɓəlsar ngə təwa nəu lakur kəla ngatəndərkur kənda wa.

¹²Aka ɓwanya Hyel ana pi cha ya kwa mər tləra. A ndiya tə kala katsakər nda na hira cha mətləu ana səma, kwa təkəbiya ma'a mambəl ana shanguɗəu, mədlə ana sahəu; kwa ngabiya jigadəma ana sənda ku ɗufəu.

¹³A vanya sə da ɗəwaɗəwanyi tə lya Hyel ku dəhə sənda cha ɓatlə wa. Kala sə tə babal nənyi, ya tuku a nənyi məno jiganda dəhə sənda məna məra.

¹⁴Aka əngə ja, mana uyatə mən dəgalər gau fərist nda gwatə mbwa nda Hyel ti, Yesu Zər Hyel, a mən gəzəya jirikur kəmən nə məno ɓwanya təkər nə tsa'anyata.

¹⁵Aka gau fərist kəmən ndə nda kwa ɗəngha na təutətəutəkur kəmən cha, ndə nda nja dzə ku kala chul laku nda nji kwa dzə mən ti, kəl ja, a da cha na səpəla'a wa.

¹⁶Aka əngə ja, mən shili dza dzəga təlkur nə papa'akur a da na kərmətlə wa, aka ga məna dləutsə təhuɗə ana mən uya papa'akur nda kwa hagwa mən chi ku bəjir chim kəmən.