Read nya huba Ibrani 5 Bible Online

Ibrani 5 - nya huba bible

Ibrani 5

¹Kala gau fərist ku huɗa nji njo tabiya ka ga cha ɗa tə dəbar nji ku sə'inda nə Hyel, ga cha lə ga'a ana hatəmachi ka səpəla'a.

²Kwa nau cha nəuna nji'inda pa'a kwa zəndə səu ana nji'inda kwa tyatə tsa laku ana sənam, nda nacha ma'a ndə təutətəutə cha.

³Nacha gwa'atə tuku cho hatəmachi ka nə nyi na səpəla'a ana səpəla'a alenya nji.

⁴A vanya ndə da kwa nau hətə ngawa səli təkəra kərnyi wa; tuku kəl Hyel tə nga nyi, wi nə Haruna nda.

⁵Nacha gwa'atə tsəu Kəristi da hətə səli nə ɗa ka gau fərist təkəra kərnyi wa, kəl ja, Hyel tə nar nyi, “Nakə zər ɗa ka; ənya a ɗatə ya ka Ada ngha.”[1]

⁶Atə vanyi mbwa tsəu cha na, “Nakə ngə fərist ba'anawa, wi nda tə Malkizedek.”[2]

⁷Aku bəji nda Yesu na ngya tə dunəya, cha pətlənya ga gədi na kurakə bang ana sələm, a nə ndə nda kwa nau dləuya nyi tsa tah, ya a ngatə nyi tə nji aka cha ɗa kəriwa ga tashiya kərnyi.

⁸Madangə Zər Hyel cha, cha dlədləɓətə həsəli ku ɓwaɓwatə nda cha sa.

⁹Ahir nda cha nyabiyadza, kəl ngə cha ɗa ka lakur uya mbəɗə nə ba'anawa, a nə dəhə nji'inda kwa nəu nyacha.

¹⁰Ya ngə Hyel tə fiya nyi gau fərist wi nda tə Malkizedek.

¹¹Sər pə da tsa ea ɗang təkəra səna, kəl ja, dza'u njo nau dəkəbiya hi aka tədəɓə hi ku dlədləɓa.

¹²Jiri, madangə ku bəji na hyo kina ɗa ka njir dlədləɓə nə nji, kəl ja, hyo kina uya vanyi ndə cha dlədləɓtə hi jiri nda hyo kina zəndə tangərma ku ɓwanya Hyel. 'Ua hyo gwa'a, a da ɗəfə wa!

¹³Dəhə ndə nda kwa ngya ka 'ua, wi zərdizə cha, a da cha kwa zəndə sə təkəra tsa'atsa'akur wa.

¹⁴Kəl ja, ɗəfə kəl a nə nji dzangərdzangəra. Aka na nda kwa nau nda mər tlər na jigadəma kənda, nda kwa təkəbiya mənakəkur ana ɗimikur.