Read nya huba Ibrani 9 Bible Online

Ibrani 9 - nya huba bible

Ibrani 9

¹Tangərmar mbandər nda, tsaubar ənda njo həsəli nə Hyel da kwa, ana tsəu mbwa nda nja ɓatliya ka həsəli.

²Nja ɓatliya madləɓa həsəli, ku vi tangərma nə madləɓa nda nja fiya sər fə təkəsəu, tyaɓər ana gwazhilakə nda nja dzəvəya; nacha ngə njo na nə Vi Karti.

³A biyahir mətləkunya miɗi nda, vi da nda njo nga Vi nda Ndiya na Kartikur,

⁴nda na dzəgana bəjingha nda njo ngi sə shi'uni kwitəkwitə ti, ana gwarara dəgal nə mbandəra. Sə mətlə inga nja yahitə na bəjingha. Aku gwarara nda nja fiya giɗa bəjingha ana manna kwa, ana zəwa Haruna nda ɗəɗatə heli nda, ba'a təmbəl fafa nə gadlagadla inda.

⁵A gya kəra gwarara mbandər nda sə pipi da tsa'a mətləu nda na babəkə nda kwa cha səlir Hyel. Na nda ngə tsəu kwa fəkənyi shanguɗə nə mbwa nda njo nga mbwar hənda səpəla'a. Kəl ja, a da məno nau chukuɗabiya sə'inə sakanə wa.

⁶Ahir nja ɓatliya dəhə sə wi na, wa'atanyi ka fərist kwa gwa ku vi tangərma nda, ka nda mər tlər kənda.

⁷Kəl ja, kəl nda gau fərist ngə kwa gwa ku mətləkunya vi nda, zhaka zhang ku fa. Ya a da cho gwa kəla cha handa təmachi na mashi ka bikə nyi, ana nə nji'inda tə məra bikə ku tar zəndi wa.

⁸Ana ənga Shanguɗə Karti kwa char ənda lakur gwa ku pa'apa'anya mbwa nda ndiya kartikur da ta chabiyadzə wa, macha tsə'u tanyi madləɓa həsəli tangərma nda tə ta'i.

⁹Səna sər ba'ada cha nə bəji na. Kwa char ənda ga'a pampam ana hatəmachi inda nja kwa məra a da kwa nau chinda səpəla'a nji'inda kwa həsəli wa.

¹⁰Na nda nəkənda sənda təkəra sərsuma ana sər sa tanyi inga, ba'a tlal chi dza. Nanda nəkənda tsaubar nə ngyar dzə tanyi inga, nda nja piya təvi taɗər gadlagadla shili.

¹¹Kəristi tə shili təvira gau fərist nə sə mənakə inda tangna. Cha tərabiya ku madləɓa həsəli dəgalnyi ana nda ndiya na kartikur nda a da ndə tə mər wa. Sənga njo nau na a da ku huɗa sənda nja batlə tə dunəya wa.

¹²A da cha gwa na mashi kua ndara daləu wa, kəl ja, cha gwa ku Vi nda Ndiya Kartikur zhaka zhang tanyi ana mashi nyi. Ngə cha shili na mbəɗə nda ba'anawa.

¹³Mashi kua, hahaldi ana pətsəɗə mbugul nda njo uchikənyi nə nji'inda na hiɗa səpəla'a kwa chinda nda ga nda ɗa chichinyi biyabibiya.

¹⁴Təwa gyalkur Shanguɗə Hyel nda ba'anawa, Yesu Kəristi tə lətə kərnyi ka sər hatəmachi nə Hyel kəla sər ngəla. Məna kwa mər sənda kwa yi na mən ku tah, kəl ja, mashi Yesu kwa chinda jigadəma kəmən. Ga məna nau hətə nyi səli nə Hyel nda na pi.

¹⁵Aka əngə ja, Kəristi ngə ndər ta'i ku pam nda tə shili namən taɗər alkawal, ga nji'inda Hyel tə nga nda dləutsə sər fa'aki nə ba'anawa nda nja mər alkawal alkawal nyi, nda wurtə cha tah wi sər ki məl ka ga cha pəliya nda tsa səpəla'a nda nda məra a da kiɗa tangərmar alkawal nda.

¹⁶Ma vanya ndə tə təkə nda sər fa'aki nyi təcha na pi, a ɗatə tuku kəl cha tə gwadagəu njo dzəgwa mər tlər təkəri.

¹⁷Aka alkawal nda ndə tə mər təkəra sər fa'aki nyi da kwa ɗa na gyalkur wa, kəl ma cha tah. A da njo mər tlər nə ya tsəutanyi ndə nda mər na pi wa.

¹⁸Nacha gwa'atə a da njo mər tlər na alkawal tangərma da kəla nja pənda mashi wa.

¹⁹Ahir nda Musa tə dəkarnyi nə dəhə nji kala gadlagadla nda kwa dlədləɓa, cho hətə mashi daləu ana nə kua ana ɓiti. Kəl cho hətə chi kətəng dəzəu ana heli izob, cho uchikənyi mashi nda gwaɗəgwaɗə nyi na ɓiti nda nə likatəkatə ana nji dəhəu.

²⁰Kəl cho na, “Nənə ngə mashi alkawal nda Hyel tə nar hi hya ɓəlati.”

²¹Əngə tanyi cho uchikənyi mashi nda nə madləɓa həsəli, ana dəhə sənda njo mər tlər nə ka həsəli.

²²Jiri gadlagadla kwa gwa'a nja chinda badəgal səu na mashi ya macha a pənda mashi da wa, farbikə da wa.

²³A ngya tə tuku, kala sənda pabiya da sər huɗamələm nja chinda na sər hatəmachi ina, kəl ja, sənda nə huɗamələm təkərnənda kwa gwa'a sər hatəmachi mənakəu ndiya matsa ina.

²⁴Aka Kəristi da gwa ku madləɓa həsəli nda ndə tə ɓatla, nda pabiya da nə jiri jirinyi wa. Cha gi huɗamələm ka cha ta'i mar Hyel ka mən.

²⁵Ya a da cha gi huɗamələm ka cha hatəmachi na kərnyi atə vanyi atə vanyi, wi nda gau fərist kwa gwa ku Vi nda Ndiya Kartikur kala va ana mashi nda a da nənyi wa.

²⁶Macha ənga cho nda ɗa Kəristi kwa nda sa ɓwaɓwatəu zhaka ɗang fwatə ku ghəyar dunəya. Kəl ja, sakana Kəristi tə chabiyadzə zhaka zhang tanyi, aka dəhə nji ku udiyar bəji aka cha hənda səpəla'a təwa handa təmachi na kərnyi.

²⁷Tang wi nda nja təttənyi nə ndəu, cha tə zhaka zhang, ahir nga kəl nəuma.

²⁸Əngə tanyi nja handa təmachi na Kəristi zhaka zhang ka nja hənda bikər nji ɗanghəu; ya cho ɓəla chabiyadzə nə mətləkunyi, a da ka cha hətə bikə wa, kəl ja, ka cha shili na mbəɗa nə nji'inda kwa səkə nyi.