Read nya huba Yakubu 1 Bible Online

Yakubu 1 - nya huba bible

Yakubu 1

¹Hya'atə tsa Yakubu mava Hyel ana Tlakə Yesu Kəristi, ya kwa tsəfə nə njir nəu nda ku nyandəla njir Isra'ila kwabəmətlə nda tə wiɗətədzə tə dunəya dəhəu, ya kwa usa hi.

²Ka zamə ɗa sakanda dzə pampam tə uya hi 'ual'ualəu, kəl hya fiya ka sər hirgyaɗi.

³Aka a zəndətə hi dzə nda kwa shili nə hi, ka ga cha dzə jirikur kəhi ngani, ga cha tsakətə hi dunamar səsəuti.

⁴Kəl hya ngyar səsəu kəhi cha nyabiya tlər nyi aka ga hya ɗa nənə nyi, nda a da hyo tar madami wa.

⁵Kəl ja, madawa ku pama hi tə tar dəma kəl cha gədi tsa Hyel ndə nda kwa nənyi nə madawa, aka cha Hyel wung tanyi nə madawa, tsa'anyata cha kwa nənyi nə dəhə nji, a da na huhuni wa.

⁶Kəl ja, sakanda ndə kwa gədi aku pətlənya tə dəhəu, ngwa cha da ɗa na kəpal nya ta cha mada kush wa, kala ndə nda na kəpal nya ta cha tang wi ngə tə ɓitir dəl dəgal cha nda ma gyang tə fi kwa hə nyi, a da cha kwa ta'i tə mbwar zhang wa.

⁷Ngwa chulkə ndə wi ngə da har wi cho uya vanya sə tsa tlakə wa.

⁸Ndər ta mətləu, a da cha kwa nau ta'i təkəra sə zhang wa.

⁹Njir nəu Kəristi inda ɗaliɗali nyi kwa uya sər wovi ma Hyel tə hətə nda səli.

¹⁰Njir nəu Yesu inda na gəna tsəu nda wovi ənda Hyel tə tashiya nda, aka ndər gəna kwa tərabiya ana gəna nyi tang wi ngə tə mambəl wu kwa pəa.

¹¹Aka ma pəchi tə zədə ga dəda cha kwa titi'uanda wua, mambəl tsəu kwa pəa, ya gumagumakur nyi səuwa ti. Tang wi ngə tanyi tsəu ja ndər gəna kwa tah, mada ku sakanda cho gwa'a gəna ti.

¹²Ndə nda kwa mər hirgyaɗi nacha ngə ndə nda tə mbiyahuɗə ku dzəa, aka ma cha səsəuti, cho dləutsə wazəbar pi nda Hyel tə hətə salkur salkurnyi nə nji'inda kwa nyida nyi.

¹³Ma ndə nda gwa ku sərmbukəu, ngwa cha na Hyel ngə kwa dzə nyi na sərmbukə wa, aka ndə da kwa nau dzə Hyel na ɗimikur wa, ya səda kwa gwa'atə Hyel kwa dzə ndə wa.

¹⁴Kəl ja, sərmbukə kwa shili təwa huɓərsə nda nya ta mən, nda kwa shandə mən kər kwa sanda mən.

¹⁵Ma huɓərsə tə ghəya gwa ku ɗufwa ndəu, cho yabiya səpəla'a; ma səpəla'a tə hə tsə'u, cho shili na tah.

¹⁶Ka zamə ɗa nda yo nyida, ngwa nja shandə hi kər wa.

¹⁷Dəhə sə gumaguma ana sə mənakə nda hya uya hya'atə kya huɗamələm cha tsa Hyel, ndə nda tə mər huɗamələm ana dəhə sə'inda kwa mbəla səya kya ti. Hyel təkərnyi da kwa sha wi ngə tə shanguɗa kwa sha wa.

¹⁸Ana ikur nyi ngə cha shandə mən ka nguli nyi təwa mafakə nyi nda jiri, aka ga məna ɗa ka yar tangərma ku huɗa dəhə nji'inda cha məra.

¹⁹Zəndə ma nənnə ja ka zamə ɗa nda yo nyida, madawa cha fiya hima cha fwanghə cha ɗa ndər səhimi kuskusəu, ngwa cha da kusa ɓwanya wa, ya ngwa cha da hə huɗətla kuskus wa.

²⁰Aka huɗətla ndə da kwa mərtə sənda tsa'atsa'a mar Hyel wa.

²¹Aka ənga, təkəbiya ma kər na ɗimikur ana dəhə dliya nda nya ta hi. Pinda ma kərnəhi mar Hyel, hya dləukər ɓwanya nyi ngə cha chiya ku ɗufwa hi nga, nacha ngə sənda kwa nau dləuya hi.

²²Ngwa hya da ngatə ɓwanya Hyel na hima hi tanyi wa, ma hya mər ənga, kər ngə hya kwa sha nə kərnəhi. Kəl ja, sənda hyo kina məra, hya mər tlər na sənda hya ngati.

²³Madawa tə ngatə ɓwanya na hima cha tanyi, ya ngə a da cha mər tlər nə wa, cho ɗa tang wi ndə nda tə ndzamar kərnyi tə ɗauragal.

²⁴Cha kwa ndzamtə kərnyi mənakə tə ɗauragal, kəl ja, mangə cha təra ɗəɗəu tanyi cho far nda pabiya da mi nda huɗəma cha.

²⁵Kəl ja, ndə nda tə kəratsəntə gadlagadla Hyel nda kwa nənyi dimukur nə ndəu, cha kwa biyama na məra, a da cho far sənda ngatə cha wa, kəl ja, cho mər tlər nə wi nda ngatə cha, Cho ɗa ndər papa'akur aka sənda mər cha nda.

²⁶Ma ndə nda kwa jigadəma ənda ndər nəu Hyel cha, ya ngə a da cha kwa gəlatə kyara cha wa, nəu Hyel nyi kwa ɗa ka sə ɓwa'atanyi, ya kər ngə cha kwa sha nə kərnyi.

²⁷Chul nəu dur ana tsa'atsa'a nda Hyel Ada kwa dləukər nacha ngə; nja ɗənghatə na nguli mahə ka mahi'ifi ku bwabwatə kənda; ana cha ɓəlatə kərnyi tsa sər dunəya da ba'a səwandə nyi.