Read nya huba Yakubu 2 Bible Online

Yakubu 2 - nya huba bible

Yakubu 2

¹Ka zamə ɗa, wi njir nəu Tlakən mən Yesu Kəristi nda na səli nyi 'ualəu, ngwa hya da tazhira wa.

²Ba'ada, wi ma ndər gəna tə handzə dzaki durdur nda njo ɗəl na gəna 'ualəu tə shili tə mbwar tsəmdzə kəhi, ana ndə ɗaliɗali tə handzə guzhalguzhal tə shili tsəu.

³Ya ngə hya hətə səlir ndə nda tə handzə dzaki mənakə nda ga nar nyi “Kəma, anda ka uya mbwar ngya mənakə na.” Kəl ja, ndə ɗaliɗali nda nənyi, hya kwa nar nyi “ta'ita nghə hingə nə ngha, ma'a da wa ngyata nghə tangnə hu'i.”

⁴Ma cha əngə hya kwa ɗa, bikə tsa hi, aka a tau tə hi kəl ku pama kərnəhi, ga wurandə nəuma ana jigadəma ɗimi ku ɗufwa hi.

⁵Ka zamə ɗa nda yo nyida, ngatə ma! Hyel tə ɗəmtsə nji'inda na ɗali tə dunəya ka ga nda ɗa ka njir gəna[1] nə jirikur, ana ga nda uya təlkur nda Hyel tə mər alkawal nə nji'inda kwa nyida nyi.

⁶Kəl ja, hya kwa həyatə nji ɗaliɗali, wa i ngə nji'inda kwa ɗa məndza'u na hi, kwa mbəla hi ya mar njir nəuma? A njir gəna i ngə ma?

⁷A na nda ngə nji'inda kwa pə nya ɗimi, nda kwa ngəl tləm mənakə nə Yesu Kəristi ngə njo nga hi nə ngə ma?

⁸Macha nda kwa nyabiya hi gadlagadla nə təlkur Hyel wi sənda tsəfətsəfə nyi ku Likatəkatə ɓwanya Hyel, a mərtə hi sə mənakəu, nacha ngə, “Ka nyida təwul ngha tang wi nda ko nyida kərngha.”

⁹Kəl ja, ma ngə hya tau kəl ku pama kərnəhi aka ngyakəngya kənda, a dləgəlnda təhi dəhə gadlagadla Hyel, ya ɗatə hi ka njir mər səpəla'a.

¹⁰Madawa tə ɓəlatə dəhə gadlagadla ga ngyar zhang dəhə nda cha ɓəlnda, ya a ɗa tə cha ndər bikəu.

¹¹Aka Hyel təkərnyi ngə tə na, “Ngwa ka da mər kasalikur wa,” nacha ngə tsəu tə na, “Ngwa ka da tsa ndə wa.” Mada a da ko mər kasalikur ja wa, ma ka tsəya ndəu, naka ɓəlatə gadlagadla wa, ya a ɗa tə kə ka ndər bikəu.

¹²Ɓwanya kəhi ana sənda hya kwa məra, cha ɗa wi nji'inda nja kwa mərtə nda nəuma ana gadlagadla nda kwa nənda dimukur.

¹³Aka Hyel da kwa təhuɗə təkəra ndə nda pa'a kwa ngatə təhuɗər kuvanyi wa. Kəl ja, ma hya ɗana təhuɗəu, Hyel tsəu cho ɗana təhuɗəu ma cho mərtə hi nəuma.

¹⁴Ka zamə ɗa, mi sakəda nyi ma ndə tə na, jirikur tsa cha ya ngə a da cha kwa mər tlər mənakə nda kwa char jirikur nyi wa? Chulkə ngəna jirikur ja ya, kwa dləuya nyi cha ya?

¹⁵Ma cha ɗa vanya ndər nəu da ku pama hi, ndara zama ndara kwama nda a da na sər handzə ndara sərsum wa,

¹⁶sakəda mi cha kwa mərtə hi ma hya nar nda, “Ma'i ma ana piyarɗufəu, ga Hyel cha nə hi sənda hyo gwa'a, ya a da hya nənda sənda nda kwa gwa'a wa?”

¹⁷Əngə tanyi tsəu, ma jirikur tə ɗa a da na tlər mənakə wa, jirikur tətə nda ya sakəda nyi da wa.

¹⁸Kəl ja, vanya ndə kwa nau na, “Jirikur tsa ka, naya tsəu tlər mənakə tsa ya,” aman ko ɗana nau char ɗa jirikur nghə ya a da kə na tlər mənakəu wa? Naya; yo char nghə jirikur ɗa təwa tlər mənakə nda yo məra.

¹⁹Ko na nənyi təkə jiri ənda Hyel zhang. Mənakə cha ənga! Ma a kwadzaɓi ma'a dləukərti, ya dəhə ka ənga nda kwa dzədzi ana ləvəra.

²⁰Nakə ndə dzadza, kəl nja nar nghə jirikur kəla tlər mənakə sakəda nyi da wa ya?

²¹A da hyo ɗənghatə ənda jival kəmən Ibrahim tə ɗa tsa'atsa'a mar Hyel, təwa sə mənakə nda cha mər ku bəji nda cho gwa'a hatəmachi na zər nyi Ishaku tə dzəgana nda ma?

²²A la'a təkə ma, jirikur nyi ana tlər nyi a mərtə tlər tsa'a kya'a. Tlər nyi nyabiya tə jirikur nyi.

²³Wi nda likatəkatə ɓwanya Hyel tə na, “Ibrahim tə nənyi jiri nə Hyel, ngə Hyel tə fiya nyi ka ndər mər sə tsa'atsa'a aka jirikur nyi.” Ma'a nja kwa nga nyi bazhinya Hyel.

²⁴Kwa la'a hi ma, ənda ndə kwa ɗa ka ndər mər sə tsa'atsa'a mar Hyel təwa tlər mənakə nda cha məra, a da kəl ka jirikur nyi tanyi wa.

²⁵Əngə tsəu Rahap zawar nda, a da cha ɗa ndər mər sə tsa'atsa'a mar Hyel təwa tlər nyi ma? Aku bəji nda cha ɗəwanda njir gwa'a hya mələm inda nja səa, ga lənda nda yiying təwa vanya laku paməu.

²⁶Wi ngə tə ma ndə tə ɗa a da kwa səpi wa, ndə tətə nda cha, əngə tanyi tsəu jirikur nda pa'a gyapə na tlər mənakəu tətə nyi nda.