Read nya huba Yakubu 3 Bible Online

Yakubu 3 - nya huba bible

Yakubu 3

¹Ka zamə ɗa, ngwa ɗang ku huɗa hi da gwa'a ɗaka maləm wa. Aka a zəndətə hi na ea njir dlədləɓə nə nji, nəuma kəea kwa ɗa tədəɓə matsa nə alenya nji.

²Dəhə mən kwa tləhi ku laku pampaməu. Macha vanya ndə da nda pa'a ta tləhi ana sənda cha kwa pə ana kyara cha, ndə nənə cha, ətsəu kwa nau cha gəlatə kərnyi ku dəhə səu.

³Ma məna dau lindzam ku nya taku kwa nau mən gəlatə nyi cha mər sənda məno i.

⁴Jigar ma dəma təkəra param, chul dəgalkura cha nga, nda kəl gyang tə fi 'ual'ualəu ngə kwa nau mbəlatə nyi, kəl ja, nja kwa nau ngiɗətə nyi na zər palai kushiu, cho ma'i ba nda ndər ngiɗə nyi kwa i ti.

⁵Əngə tanyi tsəu ana kyar, jan zər səu kushiu cha dzər ndəu, kwa nau wovi na səu wawa'a i'i. Jigar dəma ka la'a ənda kushkura jinatəu kwa nau nginda madiya kubu.

⁶Aka ənga kyar kərnyi hu'u cha. Nacha ngə dəhə ɗimikura dunəya ndəu. Nacha ngə kwa səwandə dəhə dza ndəu, kwa fəu zumkura ndə gu hu'u. Nacha təkərnyi kwa gwatə hu'u kəla ta.

⁷Nji kwa nau gəlatə dəhə chulkə sərshishi, eakəu, sər təɗə na ta, ana ka sər ɓiti,

⁸kəl ja, ndə da kwa nau gəlatə kyara cha wa. Ɗimikur kəla ɓəlsar cha, ya chaɓə cha na kəlpəu.

⁹Ana kyar ngə məna kwa fal Tlakə nda Adan mən. Ətsəu, ana cha ngə məna kwa ngəlnda kuvan mən ndə nda Hyel tə mər pabiya da cha.

¹⁰Aku nya zhang ngə ɓwanya fala ana ngəla kwa biya dəhəu. Ka zamə ɗa i'i, ngə na sə da tsa'atsa'a wa.

¹¹Lya tsədzəɗə zhang kwa nau biyandə ɓiti mənakə ana ɗəwatənyi ya?

¹²Ka zamə ɗa, kwa uya nji yayar kanda ku wur zaitun ya, aa kwa uya nji yayar anap ku kanda? A da pa'a wa! Əngə tanyi tsə'u ja, a tsədzəɗə ɓiti mənakə da kwa nau ɗiɗiltə ɓiti ɗəwatə wa.

¹³Wa na dəma ana ngabiya ku pama hya? Kəl cha chabiya na ngya mənakəu. Cha mər tlər mənakəu nda kwa ɗa aku həyakər, nda dəma kwa shili ni.

¹⁴Kəl ja, ma hya nyandə ɗufwa hi ana ndahuɗə ɗimi gyapə na ikər, ngwa hya da wovi ənda dəma tsahi wa, ya ngwa hya da mbuya jiri ana gəzhi wa.

¹⁵Chul ngə na dəma a da kya huɗamələm səya cha wa, nə dunəya nga, ya a da nə Shanguɗə Hyel ngə wa, nə sərtakə nga.

¹⁶Aka dəhə mbwa nda ndahuɗə na ikər ti, tangnda njo uya ngya ɓwaɓwa'a ana dəhə chul ɗimikur.

¹⁷Kəl ja, dəma nda tə səya tsa Hyel a bikə da kwa wa, ngə na dəma kwa shili na ngya mənakə ku pama nji, kwa hətə səlir alenya nji, kwa ngatə ndəra. Nyinyi nyi ana təhuɗəu ana tlər mənakəkur, a da kwa tazhira wa, ya kwa mər jirikur.

¹⁸Nji nda kwa shili na ngya mənakəu kwa tləka piyarɗufəu, nda kwa mərəya ngya tsa'atsa'a.