Read nya huba 1 Bitrus 1 Bible Online

1 Bitrus 1 - nya huba bible

1 Bitrus 1

¹Hya'atə tsa Bitrus nda changhabal Yesu Kəristi, a yada nji ɗəmɗəm nə Hyel, nji'inda mihiɓi tə wiɗətədzə tə hə'i Pantus, Galati, Kapadokiya, Asiya, ana Bitiniya.

²Hyel Ada wurtə zəndə hi ga ɗəmtsə hi ɗəɗəməu, ya Shanguɗə nyi mərtə hi tə ka nənyawa nji ka hya nəu sənda cho i, ya chinda hi tənji na mashi Yesu Kəristi. Papa'akur ana piyarɗufəu cha ɗa nəkə hi bwaɓu.

³Fal ngya tə nə Hyel Adanya Tlakən mən Yesu Kəristi! Aka təwa təhuɗə nyi cha nə mən taɗər pi təwa hya'andə Kəristi ku hwa. Sakana məno ngya kəmən na fəkər.

⁴Ya uyatə mən sər fa'aki nda nja piya ka mən kya huɗamələm, tangnda a do yiɗa, kikila, ndara zhazhə wa.

⁵Sər fa'aki nga nəkə hi nga, nahi nda Hyel tə ɓəlatə hi təwa jirikur kəhi, gyalkur Hyel kwa ɓəla hi kəl pəshi nda hya dləutsə dləuya, nda kwa chabiyadzə ku bəji batəbata.

⁶Ɗa ma na hirgyaɗi təkəra sə'inga, madangə ana huɗətla hi nə zər bəji kushəu, aka dəhə chulkə dzəa ana ɓwaɓwatəu.

⁷Sə'ingə kwa ɗa nahi ga cha char təkəɗəkura jirikur kəhi. Aku hu'u nji kwa dzar bəjingha kwa nda ɗana səli, əngə tanyi nja dzətə jirikur kəhi tsəu, nda tə ndiya bəjingha nda kwa səwa, ya ma jirikur kəhi tə ta'i na dunama təwa dzə ɗanghəu, cho shili nahi fal ana səli tə pəchi nda Yesu Kəristi kwa chabiyadzə nə dəhə dunəya.

⁸Hya kwa nyida nyi madangə a hya ta la'a nyi wa. Madangə a hyo la'a nyi sakanə wa, hya kwa nənyi jiri, ya hya kwa mər hirgyaɗi gagaɗa nda a ndə da kwa nau dəkəbiya wa.

⁹Aka dləuya kəhi ngə hya kwa dləuwa, nda nacha ngə sənda gwa'atə hya ɗana jirikur ku cha.

¹⁰Nəna dləuya nacha ngə njir mətakər tə gwa'a nda gwa'abiya sənda cha təkər mənakəu, ya nda bəzəya takər təkəra ɗanghali dləuya nda Hyel kwa nə hi.

¹¹Nda gwa'a nda zəndəbiya ndara nawa sə'ingə kwa ɗa ana ənda cho ɗa. Ku bəji nda Shanguɗə Kəristi kwa ɓwanya ku ɗufwa nda kwa cha ənda Kəristi kwa sa ɓwaɓwatə ana chul səli nda kwa nəuwahi.

¹²Sə'ingə nja chabiya nda nga, a da ka vala kərnənda ku bəji kənda wa, kəl nda kə'i hi. Hyel chabiya tə sə'inga. Njir mətakər ɓwanya tə təkəri, ya sakana ngatə təhi Mafakə Mənakə nga nda nja bəzə təwa gyalkur Shanguɗə Karti nda nja sətə səya kya huɗamələm. Ma'a Chama Hyel kwa gwa'a nda ngabiya chul ngəna səu.

¹³Aka əngə ja, ɓatliya ma ɗufwa hi ka tləra, hya ɓəlatə kərnəhi. Hya fətə dəhə fəkər kəhi təkəra ɗanghali nda kwa shili nə hi, ma Yesu Kəristi tə chabiyadzə nə dunəya.

¹⁴Aka ɗa tə tuku hya ngya wi nguli Hyel nda kwa nəu nyacha. Ngwa tsəu hya ɓəl yo ngya kəhi nda haaɗa nda, ka hya nyabiya sə'inda ɗufwa hyo i ku bəji nda hi ku tar zəndə nda wa.

¹⁵A təvəra ənga, hya ɗa ka nji karti ku dəhə sə'inda hyo məra, tang wi nda Hyel nda tə nga hi ndə karti.

¹⁶Aka tsəfətsəfə nyi cha, “Ɗa ma ka nji karti aka naya karti ya.”

¹⁷Ma hyo pətlənya hyo nga nyi “Ada,” nacha ngə kwa mərtə nyi nəuma nə kala ndə tsa'atsa'a na sənda cha məra, aka a da cho tazhira wa. Aka əngə ja, hya wurandə ngya kəhi na ləvəra ku ngyar mihiɓikur kəhi ku dunəya na.

¹⁸Aka zəndətə hi ənda Hyel ngə tə pəliya hi tsa ngya jwajwa'a nda hya fa'atə ki nə tsa jival kəhi nda. Ya zəndətə hi a da na chulkə sə'inda kwa səwa nja pəliya hi wi ka azurfa ana bəjingha wa,

¹⁹kəl ja, ana mashi Kəristi nda na səli 'ualəu, nda zər gam Hyel durdurəu, nda pa'a na mbwar kəti.

²⁰Hyel tə tabiya nyi təvi nja mər dunəya, kəl ja, cha chabiya nyi ku bəji batəbatə na aka sakəda hi.

²¹Təwa nyi ngə hya nənyi jiri nə Hyel, nda hya'andə nyi ku hwa ga nənyi səli, təwa ənga jirikur kəhi ana fəkər kəhi tə ɗa ku Hyel.

²²Sakanə ja, ma wurtə hi ɗa chichinyi təwa nəu jiri nda hi ni, ya ɗatə hi ku nyida jirijiri ka alenya njir nəuwa, hya nyida kərnəhi ja tsa'anyata ana dəhə ɗufwa hi.

²³Aka ɗatə hi ka taɗər nji wi nguli dizəu nə Ada nda pa'a kwa tah, təwa ɓwanya Hyel nda ba'anawa.

²⁴Wi nda ɓwanya Hyel tə na, “Dəhə sə ndəndəu wi sar nda, ya səli kənda wi mambəl sar takəu. Sar kwa titi'ua mambəl kwa pəa,

²⁵kəl ja, ɓwanya Hyel kwa ngya ba'anawa.” Nacha ngə ɓwanya Hyel nda nja bəzə nə hi nda.