Read nya huba 1 Bitrus 5 Bible Online

1 Bitrus 5 - nya huba bible

1 Bitrus 5

¹Naya nda ndəradəgal wi nahi, ya kwa tsəfə nə njirawawa'a njir nəuwa nda ku pama hi ka ya tsətə hi ɗufəu. A la'a təya ɓwaɓwatə nda Kəristi tə sa, ya yo uya mbaɗə ku səli nyi ma tə chabiyadza.

²Hya ɗa ka njir ɓəla dangal nda Hyel tə tsau ku cha hi. Ngwa hya da mər wi nja chiu hi kwa na tuku wa, kəl ja, aku ikur kəhi wi nda Hyel kwa i. Əngwa hya mər ka sənda hyo uya kwa wa, kəl nda ana hirgyaɗi aka mər tlər nə Hyel.

³Ngwa hya gwa'a cha gyalkur nə nji'inda ku cha hi wa, kəl nda hya ɗa ka sər dlədləɓa.

⁴Təwa ənga, ma Dəgalər Ndər Ɓəla tə da chabiyadza, hyo dləutsə pahuɗə kər nə səli, nda a do ɗəzə pa'a wa.

⁵Nahi nguli tlakala tsəu, hya nəu nya njirawawa'a. Dəhə hi, hya mər tlər nə kərnəhi na həyakər, aka ɓwanya Hyel tə na, “Hyel kwa mər dawa na njir həkəra kərnənda, kəl ja, cha kwa char nyi ɗanghali nə njir həyakər.”

⁶Aka ənga ja, hya tashiya kərnəhi mar Hyel nda na dəhə gyalkur, aka ga cha har hi gi ku bəji nda cha i ti.

⁷Ngya nyi ma na dəhə sənda kwa wendə hi nə Hyel, aka nacha ngə ndər ɓəla hi.

⁸Hya ngya na ɓəla, hya ɓatliya kərnəhi. A nə ndər dawa kəhi sərtakəu kwa ghərti wi ləvari, cho gwa'a ndə nda cho ɗinya.

⁹Hya ta'ita'i ku jirikur kəhi, ngwa hya nənyi laku nə sərtakə wa, aka a zəndətə hi alenya njir nəu nda ku dəhə dunəya kwa sa chulkə ngəna ɓwaɓwatəu.

¹⁰Kəl ja, ma hya sa ɓwaɓwatə nə zər bəji kushiu, Hyel nə dəhə ɗanghali, nda nga hi ka hya ɗana səli ba'anawa təwa Kəristi Yesu, cho ɓəla mərtə hi nyinyinyi, cho tsakətə hi dunama, cho chiya hi.

¹¹Gyalkur ngya tə ngyangyanyi nənyi ba'anawa! Aɗəmja.

¹²Ya tsəfətə hi kainau tsau na, təwa hagwachi nə Sila ndər nəu nda ya dləukər ni. Ya kwa i ya tsətə hi ɗufəu, ya dəkəbiya hi tə babal, jirikura ɗanghali Hyel. Hya ta'i na dunama kwa.

¹³Nanda njir nəu nda vu Babila nda Hyel tə tabiya kwa usa hi. Zər ɗa Markus, nacha ma'a cho usa hi.

¹⁴Hya usar kərnəhi na gaɓədzə nda kwa char nyida wi njir nəuwa. Piyarɗufəu cha ngya tsa'a kə'i hi dəhə hi, nahi nda ku Kəristi.